Luuka 18

Kimufuunya uNguluvi kugaya kikhatala

1 UYeesu wávajovela avamanyisiwa vaakwe ishihwano kwa kivamanyisa kiija, vave vikimufuunya uNguluvi luhaavi loona, kugaya kikhatala. 2 Wávajovela wáaja, “Akhandi akwali umuhigaaji mu lijumbi limonga. Umuhigaaji uyo, asikhandi ikimutiila uNguluvi, khanji asikivatuna kivatanjilisa avanji. 3 Lino, mu lijumbi ilyo, akhandi akwali umufwile yumonga yuna akhandi iiluta wiila wiila kunyaakwe kilomba umutango, akhandi iijova, ‘Nilomba uhije umukhole, kiija umulugu wangu aleshe kitoola ifya kunyangu.’

4 “Nsiku nyinshi sashilaga, umuhigaaji yula akhandi apiyiteneeshe kikhaana kimutanga umufwile yula. Baheene kuwudugo, wáhiivile mu numbula yaakwe wáaja, ‘Hata nda nisikimutiila uNguluvi, wala kivatuna avaanu kivatanga, 5 leelo, kwa kiiva umufwile uyu ikinilafya mandu, lino nisiihije umukhole gwakwe, baheene aleshe kiyinsa wiila wiila!’”

6 Baheene uMutwa uYeesu wáaja, “Yimanyisaaji kwa muhigaaji yula umunansi, ngaja shina wálamulaga kisenga! 7 Lino! UNguluvi, asikwiliile kivasenjela wunofu avabaagule vaakwe vina vikimufuunya ishilo ni shiminsi? Wuli, asidiile kivatanga? 8 Nikivajovela kiija, uNguluvi asivasenjele nyangu gina gisakulwa. Lino, one uLusawo lwa Muunu pina nikhava niitina mu nyi, nikhavaaga avaanu vina vikinihuviilila?”

Ishihwano sha Mufalisaayo nu mutofya khoodi

9 Baheene uYeesu wávajovela kwa shihwano avaanu vina vayiwonaga kiija vagolofu na vina vavasalaga avayaanave woona, wáaja, 10 “Avaanu vavili vakhalutile kifuunya ku nanda imbaagule iya kifuunyila, yumonga akhandi Mufalisaayo, uyunji akhandi mutofya khoodi. 11 UMufalisaayo yula wáyiima mwene duguli wáfuunya wáaja, ‘Wee Nguluvi, nikikuhonjesa, kwa kiiva one nisili ngaja avaanu avanji, avapokhaaji, avanansi na vaafu, khanji nisili ngaja umutofya khoodi uyu! 12 One niilekha kiilya mala khavili kwa lijuma, kwa kiiva ya kifuunya. Khanji, niihumya isadaakha shipuga shimo mu fipuga ishumi mu fiinu fyangu fyona.’ 13 Leelo umutofya khoodi yula, wáyiimile kutali asungeeme, ikiyitova tova pa shifuva kwa kisugumilwa, iijova, ‘Wee Nguluvi, unisungupile, kwa kiiva one nili munansi!’” 14 Baheene uYeesu wáaja, “Nikivajovela kiija, umutofya khoodi wáwuyaga kukhaaya avasiiwe kiiva mugolofu pa Nguluvi. Leelo uMufalisaayo yula asikhavasiiwe! Kiiva, umuunu yoyoona yuna ikiyitufya, uNguluvi akhamuyiisa. Umuunu yoyoona yuna ikiyiyiisa, uNguluvi akhamutufya.”

UYeesu ikivayimiilila avaana avanangʼana

(Mataayo 19:13-15; Maluko 10:13-16)

15 Ilijuva limonga avaanu vakhandi vikimuleetela uYeesu avaana vanangʼana, kiija avaviishile amawokho gaakwe baheene avayimiilile. Avamanyisiwa vaakwe vaganile kilyaga ilyo, vayansa kivakhajila avasafi va vaana. 16 Baheene uYeesu wávashemeela avaana valute kunyaakwe, wáaja, “Valeshi avaana avanangʼana vayinse kunyangu, musikhavakhaanaji, kwa kiiva uWutwa wa Nguluvi wuli kwa vaanu vina vali ngaja avaana ava. 17 Shiyooli nikivajovela, umuunu yoyoona yuna asikimuhuviilila uNguluvi ngaja umwana umunangʼana, asikwiliile kiyinjila mu Wutwa wa Nguluvi hata lijuva limo.”

Iliposo lya muunu umunya wusi

(Mataayo 19:16-30; Maluko 10:17-31)

18 Umukhome yumonga wámuposa uYeesu wáaja, “Wee Mumanyisaaji munofu, nigahe shishi baheene nipate uwuumi wa shiluta?” 19 UYeesu wámugomosesa wáaja, “Kwashi ukinijova kiija nili munofu? Kusiina yuna munofu, leelo yu Nguluvi mwene duguli! 20 Usimeenye indaji sa Nguluvi, ‘Usikhawafukhaga, usikhabudaga, usikhahiijaga, usikhagabedelaga aga wudehi, uvatiilaje uwiiho nu maayi waakho.’” 21 Umwene wáaja, “Indaji iso soona, nisikheete kihuma uwaana wangu.”

22 UYeesu wáganile kipulikha ago, wámujovela wáaja, “Ugayile shiinu shimo. Lutaga uguse ifiinu fyona fina unafyo, ihela sina usiipate, uvagavile avapiina. Nda ugahe ndeeno, usiive wayivishilisa uwusi kwa Nguluvi. Baheene uyinse, unifwataje.” 23 Umukhome yula, wáganile kipulikha ago, wásugumiilwe mandu, kwa kiiva akhandi ana wusi winshi mandu. 24 UYeesu pina wámwajile kiija asugumiilwe, wáaja, “Lukhamu mandu avanya wusi kiyinjila mu Wutwa wa Nguluvi! 25 Lupeefu ingamiya kishila mu mulindi gwa muhonelo, kulikho umunya wusi kiyinjila mu Wutwa wa Nguluvi!”

26 Avaanu vina vapulikhaga ago, vaaja, “Lino yu naani yuna akwiliile kikwava uwuumi wa shiluta?” 27 UYeesu wávajovela wáaja, “Gina vigombola kisenga avaanu kwa ngufu saanave, kwa Nguluvi gisenjekha.” 28 Apo, uPetulo wámujovela uYeesu wáaja, “Loleela, ose tifileshile ifiinu fyona, tikikufwata owe!” 29 UYeesu wáaja, “Shiyooli, nikivajovela kiija, umuunu yoyoona yuna aleshile inanda yaakwe, umudala waakwe, avalukholo lwakwe, avasafi vaakwe awu avanaakwe, kwa kiiva ya Wutwa wa Nguluvi, 30 uyo pina ali mu nyi muno iyanushila finshi kishila fina afileshile. Khanji, uluhaavi luna luyinsa, akhapeelwa uwuumi wa shiluta.”

UYeesu ilogola ulwa wutatu shina asiifwe na kifyukha

(Mataayo 20:17-19; Maluko 10:32-34)

31 UYeesu wávatoola avamanyisiwa vaakwe ishumi na vavili, wáava na woope palubali, baheene wávajovela wáaja, “Loleeli! Titaana kiluta ku Yelusalemu. Ukho kukwene, goona gina avakuwamalago vagayandikhaga aga one, yuna nili Lusawo lwa Muunu, giisa kisenjekha. 32 Kiiva vasinitawule ku vaanu vina vasili Vayahuudi. Baheene vasinibede, vasinilije na kinifuunyila amata. 33 Khanji, vasinitove na majalidi na kinibuda, leelo mu lisiku ilya wutatu, nikhafyukha.”

34 Leelo avamanyisiwa vaakwe vasikhagameenye gina akhandi ikivajovela, kwa kiiva vafihwagwa uluganulo lwa maswi aga. Woope vasikhameenye kiija uYeesu ilogolela shiinu shishi.

UYeesu iiponia umupofu

(Mataayo 20:29-34; Maluko 10:46-52)

35 UYeesu na vamanyisiwa vaakwe pina vakhandi vali nkholeela ni lijumbi lya Yeliko, umuunu yumonga yuna akhandi mupofu akhandi akheele mulubali mu nsila, ilomba ifiinu. 36 Wáganile kipulikha avaanu vinshi viishila, wávaposa wáaja, “Kuna shi?” 37 Vamujovela vaaja, “UYeesu uwa ku Nasaleti iishila.” 38 Baheene wámushemeela uYeesu kwa ngufu wáaja, “Wee Yeesu, wee Lusawo lwa mutwa uDawudi, unisungupile!” 39 Avaanu vina vakhandi vamulongwele uYeesu, vaava vikimukhajila kiija asisime. Leelo umwene wáshisaaga kimushemeela mandu wáaja, “Wee Lusawo lwa mutwa uDawudi, unisungupile!”

40 UYeesu wáyiima, wávalajisa kiija vamutwale kunyaakwe. Umupofu yula wáganaga kivejeela pa Yeesu, uYeesu wámuposa wáaja, 41 “Wisakula nikugahile shishi?” Umupofu yula wáaja, “Wee Mutwa, nisakula kiloleela.” 42 UYeesu wámujovela wáaja, “Lino uloleelaje! Waapona kwa kiiva wanihuviilila one.” 43 Luhaavi luulo umupofu yula wáloleela, baheene wáava ikimufwata uYeesu, kuno ikimusufya uNguluvi. Avaanu woona, pina vagaagaga ago, woope vamusufyaga uNguluvi.