UYeesu iikuva amalago ulwa kibomolwa inanda imbaagule
24
1 UYeesu wáwuukhaga wáahuma mu lukeeke lwa nanda imbaagule iya kifuunyila.
Wáganile kihuma,
avamanyisiwa vaakwe vamulutiile kiija,
vamusoonele uwusengaaji wa nanda imbaagule iya kifuunyila ni nanda isinji sina siyipiliime.
2 Leelo uYeesu wávajovela wáaja,
“Mukigaaga goona aga?
Shiyooli nikivajovela kusiina ilingʼanga lina likhasigala pashaanya ya lingʼanga liyine.
Goona ago gakhagwisiwa!”a
Amalava amakhome gina gakhayinsa
3 Lino uYeesu wálutile ku shidunda sha Miseyituni,
avamanyisiwa vaakwe vakhamulutiile kushipata,
vamuposa vaajova,
“Tujovela,
gakhawonekha yooli ago goona?
Khanji,
shimanyilo shishi shina shikhatuwulanisa pina wiyinsa kitema,
na kiyinsa kwa wudugo wa luhaavi uluvi ulo?”
4 UYeesu wávayankha wáaja,
“Muveesaje meeho,
asilaave avajanje muunu yoyoona!
5 Kiiva vakhayinsa avaanu vinshi kwa litaawa lyangu,
vakhajova,
‘One yuune Mukulusaaji!’
b Woope vakhava vikivajanga avaanu vinshi.
6 Mu luhaavi ulo mukhava mupulikha imola ni pwepwesi sa wulugu,
leelo musikhatungumalaji.
Ago goona mbakha gawoneshe,
leelo uluhaavi ulwa wudugo lukhava lushaanali.
7 Insiku iso inyi yimo yikhalwa ni nyi iyinji,
uwutwa wumo wukhalwa nu wutwa uwunji.
Injala yikhagwa,
imbali soona kukhava mudegenkho.
8 Ago goona gakhava ngaja shiyanso sha wuvafi uwa washimaayi pina ali nkholeela kisava.
9 “Mu luhaavi ulo,
avaanu va nyi yoona vakhavakhalalila omwe,
kwa kiiva omwe muli vamanyisiwa vangu.
Avayeenyu avamonga vakhakhatwa na kivatova,
avanji vakhabudwa.
10 Baheene avaanu vinshi vakhanilekha kinifwata one.
Vakhava vidolelana,
vakhava vikhalalilana veene.
11 Mu luhaavi ulo,
vakhava viyinsa avakuwamalago vinshi avadehi na kivajanga avaanu vinshi.
12 Khanji,
kwa kiiva uwunansi wukhava wuyonjelela mandu,
avaanu vinshi vakhalekha kiganana.
13 Leelo umuunu yoyoona yuna akhajimba mbakha kuwudugo,
uNguluvi akhamukulusa.
14 Khanji iMola iNofu iya Wutwa wa Nguluvi yikhakhomwa mu nyi soona,
baheene avaanu woona mu nyi vakhayipulikha.
Apo baheene uluhaavi ulo ulwa wuhigo wa nyi wukhayinsa.
Ishiinu shina shikhalasa shinansi
15 “Ino,
mu luhaavi ulo mukhashaaga ‘ishiinu shina shikhalasa’c shiyiimile uluvala ulwa panofu.
Ishiinu isho shisheene shajowaagwa nu mukuwamalago uDaniyeli (yuna iyimba amanyaje).
16 Pina mukhagaaga amaswi aga,
vala vina vali ku nyi ya Yudeya vasijilaje ku fidunda.
17 Umuunu yuna ali pashaanya ya nanda,
asikhayiikhaga na kitoola shoshoona mukhati.
18 Woope yuna ali ku mugunda,
asikhagomokhaga kukhaaya kitoola umutote gwakwe.
19 Leelo aka,
avashimaayi vina vakhava vana lwanda na vina vakhava viyonsa mu nsiku iso!
20 Fuunyaji kwa Nguluvi kiija,
pina mukhava mwisiga lusilaave luve luhaavi lwa shipepo shikhali awu lijuva lya Sabaato.d
21 Kwa kiiva mu luhaavi ulo,
avaanu vakhapata amalava makhome mandu gina gasinawonekhaje kaa,
kihuma pina uNguluvi wáwumbile inyi,
mbakha iminsiyaano.
Khanji amalava ago,
gasikhawonekha kaa.
22 UNguluvi nda akhalekha kisheepusa insiku iso isa malava,
kukhava kusiina umuunu yuna akhakulukha kiifwa.
Leelo kwa kiiva ya vabaagule vaakwe,
uNguluvi akhasisheepusa insiku iso.
23 “Lino mu luhaavi ulo,
umuunu nda ikivajovela kiija,
‘Loleela,
uMukulusaajie ali apa!’
Awu ‘Ali kula!’
musikhahuvililaga.
24 Kiiva vakhayinsa avakuwamalago avadehi na vaanu vina vakhava viijova uwudehi kiija,
aveene vakulusaaji.
Awo vakhava viigaha amabikha makhome ga miitu,
baheene vakhavajanga avaanu na kiija,
nda yikwiliile vavajanje hata avabaagule va Nguluvi.
25 Muveesaje meeho,
kiiva navajovela nkhaani goona ago,
pina uluhaavi lusinaafishe.
26 Lino avaanu nda vikivajovela kiija,
‘Loleela,
uMukulusaaji ali kula ku luvanda!’
musikhajelaga kiluta kiloleela.
Awu vikivajovela viijova,
‘Loleela,
atyejile mu nanda yila!’
Musikhavahuvililaji.
27 Kwa kiiva kiyinsa kwa one Lusawo lwa Muunu kukhava kwa kitinuhisa ngaja lumuli lwa noonya,
pina luyinsa nyangu nyangu na kimulikha imbali soona mu wulanga.
28 Uluvala luna inkhanu yifwiliile,
lulwene luna inumbusi sikungaana.
Kiyinsa khanji kwa Lusawo lwa Muunu
29 “Pina lukhashila uluhaavi ulwa nsiku iso isa malava,
‘Ilijuva likhaseetulwa nshiisi,
umwesi gusikhangʼaala khanji.’
‘Inondwe sikhagwa kihuma kushaanya.
Nafi fiinu fina fili kushaanya fikhadegenkha.’f
30 “Mu luhaavi ulo ifimanyilo ifya Lusawo lwa Muunu fikhawonekha kushaanya,
baheene avaanu va nyi soona vakhatungumala na vakhakhoola,
avaanu woona vakhanyaaga one Lusawo lwa Muunu niyinsa mu mafunde ni ngufu nu wutupikho wukhome.g
31 Baheene nikhavafilikha avamalayikha vangu,
kuno viitova ibalagumu kwa shawuti khome.
Woope vakhavakungaania avabaagule vangu kihuma imbali soona isa nyi,
kihuma kuwudugo uwa wulanga mbakha kuwudugo uwunji.”
Ishihwano sha mujombe
32 UYeesu wáyitenekhaga kilogola wáaja,
“Yimanyisaaji ishihwano kihuma ku mujombe.
Kwa kiiva,
nda amansamba na mahamba galembwile,
baheene mwimanya kiija,
uluhaavi lwa mingo luli nkholeela.
33 Shiisho ndeeno,
na yuumwe pina mukhagaaga ago goona gisenjekha,
manyaji kiija,
one Lusawo lwa Muunu nili nkholeela kiyinsa.
34 Shiyooli nikivajovela kiija,
ishisafi ishi shisikhashila mbakha aga goona pina gakhava gasenjekha.
35 Uwulanga ni nyi fikhashila,
leelo amaswi gangu gakhava ga shiluta.
Kusiina yuna ameenye uluhaavi ulwa kiyinsa uYeesu
36 “Leelo ulwa lijuva lila nu lwa luhaavi lula,
kusiina umuunu yuna iimanya,
hata avamalayikha va kushaanya wala Lusawo lwa Nguluvi,
leelo yu Daada mwene duguli yuna ameenye.
37 Kwa kiiva,
kiyinsa one Lusawo lwa Muunu,
kukhava ngaja shina yikhandi mu nsiku sa Nuhu.
38 Mu nsiku iso,
uluhaavi ulwa noonya iya lufuwukho pina yikhandi yishaanali kiyinsa,
avaanu vakhandi viilya na kiingʼwa,
vitoola na kitoolwa mbakha ilijuva lila pina uNuhu iyinjila mu shipugo ishikhome.
39 Avaanu awo vasikhameenye shoshoona kiija,
shishi shikhawonekha mbakha pina inoonya iya lufuwukho pina yayinsaga na kivabuda woona.
Shiyooli,
shiisho ndeeno shina yikhava ilijuva lila pina nikhava niyinsa,
one Lusawo lwa Muunu.
40 Mu luhaavi ulo nda avaanu vavili vakhava vali mu mugunda,
yumo akhatoolwa nu Nguluvi,
uyunji akhalekhwa.
41 Khanji kukhava na vashimaayi vavili vakhava vihaawula lumo pa lyala,
yumo akhatoolwa nu Nguluvi,
uyunji akhalekhwa.
42 Lino muveesaje meeho,
kiiva musiimanya ilijuva ilyo lina uMutwa weenyu akhayinsa.
43 Leelo mumanyaje wunofu kiija,
umunya nanda nda wáali amanye uluhaavi luna umuhiiji iyinsa,
wáali iikhala meeho kiija,
amusigame umuhiiji asikhabomolaga inanda yaakwe.
44 Ndeeno,
na yuumwe yipinyangaji uluhaavi loona kwa kiiva one Lusawo lwa Muunu,
nikhayinsa mu luhaavi luna musihuviliile.”
Ishihwano sha vavanda vavili
45 UYeesu wávaposa avamanyisiwa vaakwe wáaja,
“Lino yu naani muvanda muyinatifu,
khanji munya luhala?
Yumwene muvanda yuna umukhome waakwe amuviishile ave muyimililaaji wa vayine mu nanda yaakwe,
baheene ave ikivapeela ishakiilya uluhaavi luna lufwaya.
46 Shiba umuvanda uyo,
pina umukhome waakwe iitina,
ikimwaga iigaha gina wámulajisaaga.
47 Shiyooli nikivajovela kiija,
umukhome waakwe akhamuviikha umuvanda yula,
ave muyimililaaji wa fiinu fyakwe fyona.
48 Leelo umuvanda umuvi,
nda ahiive kiija,
‘Umukhome wangu idiila kitina,’
49 baheene iyansa kivatova avavanda vayine,
iilya na kiingʼwa lumo na vagaasi.
50 Umukhome waakwe,
nda atine ilisiku nu luhaavi luna umuvanda yula asihuviilila,
na ikimwaga iigaha aganji,
51 akhamupeela ululawo lukhome na kimuviikha lumo na vamyansi vayine.
Ukho kukwene avaanu awo vakhakhoola na kigegejula ameeno kwa kiiva ya wuvafi wukhali.”