Pehiloa Yohanes
Popailodoa
Buku ei nampojarita pehiloa to laipopahiloi Yesus Kristus hi ana guru-Na to laikahangai Yohanes. Rara pehiloa ei, Yesus nampahiloi Yohanes woto-Na pade kajadia-kajadia to kana madupa mei i huruga bo i dunia. Aji Yesus moto to nampopahiloi pehiloa ee, pade Yesus moto mui to laihilo Yohanes rara pehiloana. Pamulana, Yesus laihilo Yohanes ewa hadua Ana Manuhia to nojarita lako olo papitu pobolia poindo (1:9-20). Napu ee, Yesus laihilo ewa Ana Bimba to nokangkore i tingoo poncunaa kamagaua Alatala i huruga (5:6-14). Kahuduana, Yesus laihilo ewa to Pencawi jara to nabula (19:11-16).
Buku ei laitulihikara to Karahitee owi tempora laihehaki habana peparahayara hi Yesus. Tempo ee mai, humawee todea Roma laipahuru mepue hi Magau Bohe to rara baha Yunani laiuli ‘Kaisar.’ Nariara to Karahitee ee laipatehi habana momara nadota nepue hi Magau Bohe. Naria muira to nekangkaura peparahayara habana naekara rahehaki ba rapatehi. Aji, buku ei laitulihikara to Karahitee bona maroho rarara pade moma mekangkaura peparahayara hi Yesus naupa laihehakira.
Ihi buku ei nampotutura bahangkua ngaa to laipahiloi Yesus hi Yohanes. Nadea pehiloa laiparata hante nampake porapa.
Koropoko patuju to potulihi buku pehiloa ei, mampakaroho wuku pade mampakaroho rara humawee to Karahitee to mobaha buku ei bona moma mekangkaura peparahayara hi Pue Yesus tempora rahehaki i dunia ei. Habana Yesus ee nabaraka mampadagi Magau Heta pade bali-bali-Na to ntanina pade moparenta duu kahae-haena. Pade tauna to batena moto'i meparahaya hi Yesus, mamparata kahalamaa pade moparenta hingkani-ngkani hante Hia i dunia to nabou duu kahae-haena.
Ihi buku ei
1. Jarita pamulana (1:1-8)
2. Ana Manuhia pade hura-hura rau hi papitu jumaa (1:9–3:22)
3. Papitu segel pade papitu tarompe (4:1–11:19)
4. Ule naga pade romaa binata to nampaewa Alatala (12:1–13:18)
5. Ana Bimba, tolu dua malaeka pade to Posangki (14:1-20)
6. Papitu mangko hodo Alatala (15:2–16:21)
7. Ngata Babel naropo (17:1–19:10)
8. Binata, nabi to moma nakono pade Magau Heta laidagi (19:11–20:10)
9. Pehuku to kahuduana (20:11-15)
10. Langi to nabou, dunia to nabou pade Yerusalem to nabou (21:1–22:5)
11. Yesus momami mahae marata (22:6-21)