22
1 Napu ee malaeka ee nantudoka'a ue koro to nampawai katuwua. Ue koro ee nanonto ewa kaca, nehuwu lako poncunaa Alatala pade Ana Bimba 2 rau i lentongo dala ngata ee. Ntimalia wiwi ue koro ee, naria puu-puu kau to nampawai katuwua. Puu-puu kau ee hampulu rongkani nowua rarana hampae. Hamula hangkani'i nowua. Tawena rapake mampakulihira tauna i humangkulili dunia. 3 I rara ngata ee momami maria to laikamo Alatala. Poncunaa Alatala pade Ana Bimba ee maria i rara ngata ee. Batua-batua-Na mepue hi Hia 4 pade mampanaa lence-Na. Hanga Alatala maria i wingkera. 5 Momaramo mamparaluu poindo ba eo, apa momami maria ngkawengia. Pue Alatala motomi mampakabaara. Hira ee mai moparenta halaku magau duu kahae-haena.Yesus momami mahae marata
6 Lauparia, malaeka ee nangulika'a iwei, “Humawee jarita to laiepemu ei mai nakono pade mamala raparahaya. Pue Alatala to nampawai noto hi nabi-nabi-Na bona mamalara moparata peboha-Na. Pue Alatala ee nantudu malaeka-Na nampahiloira batua-Na humawee to momami mahae madupa.”
7 Iuli-Na Yesus iwei, “Epe belo ei! Moma-'Amo mahae marata. Morahi mpuura tauna to nanturuhi peboha Alatala to laitulihi rara buku ei!”
8 Aku, Yohanes, nangepe pade nampanaa mata humaweena ei. Kahuduna laiepeku bo lainaaku, notingkodu'a i tingoo malaeka to nantudoka'a humawee lauria, mingki'a mampasombaa'i. 9 Naupawee iulikana'a iwei, “Nemo! Nemo aku musombaa! Sombaami Alatala! Apa aku ei mui batua Alatala ewa iko, pade ewa nabi-nabi ntanina bo humawee tauna to nanturuhi humawee to iuli rara buku ei!” 10 Iulina mui malaeka ee iwei, “Nemo mupopalerui peboha Alatala to i rara buku ei, apa namohumi tempona humaweena ei madupa. 11 Tauna to nadaa ingkuna, palelemi mobabei dola ingkuna to nadaa. Tauna to moma natimotoa ingkuna, palelemi mopadola ingkuna to moma natimotoa. Tauna to nanoro ingkuna, palelemi manoro dola ingkuna, pade tauna to nagaha rarana i tingoo Alatala, palelemi matuwu magaha i tingoo Alatala.”
12 Iuli-Na mui Yesus iwei, “Epe belo komi, moma-'Amo mahae marata mangkeni tomo pade mobalahi humawee ingku to laibabei butu dua tauna. 13 Akumile Alfa pade Omega, batuana: to Pamulana pade to Kahuduana. Akumi to nopamula pade to nopahudu.
14 Morahi mpuura tauna to notopohi warura hampe nagaha. Hira ee mamala mangkoni wua kau to nampawai katuwua pade mamala mehua mantara womo pehuaa rara ngata ee. 15 Naupawee, tauna to nadaa kehira, to pedoti, to pogau hala, to pepatehi, to nepue ntani, pade to pokalowo, momara laipaliu mehua i rara ngata ee.
16 Aku, Yesus, nantudu malaeka-Ku tulau nangkewo humaweena ei hi komi jumaa. Aku eimi muli Magau Daud. Akumi betue to nehuwu parabaa, to neliu kabaana.”
17 Inoha to Nagaha pade pongante bangkele to rapemuai ee nanguli iwei, “Maitamo!” Hema-hema to nangepe lauria, kana nauli, “Maitamo!” Hema-hema to nabai wuuna, maimo komi! Hema-hema to mingki manginu, alamo komi ue to nepakatuwu ei. Ue ei rapopewai mara moto hi komi.
Peboha kahuduana
18 Aku Yohanes, mampalingai humawee tauna to nangepe peboha Alatala rara buku ei. Ane maria tauna motambai ihi peboha Alatala ei, Alatala mui mei motambai hi hia hilaka-hilaka to laitulihi rara buku ei. 19 Ane maria tauna mampakakura ihi peboha Alatala ei, Alatala mei mangala bagia tauna ee lako puu kau to nampawai katuwua pade lako ngata to laipotowe Alatala to laitulihi rara buku ei.
20 Yesus to nangkarebai humaweena ee nanguli iwei, “Nakono! Moma-'Amo mahae marata!”
Aku Yohanes nanguli iwei, “Amin. Karatamo-Ko Pue Yesus!”
21 Kabohe towe Pue Yesus mampodohe komi humawee todea Alatala. Amin.