Ana Bimba pade to pantuku-Na to laitolohi-Na
14
1 Napu ee, laihiloku Ana Bimba nokangkore i Bulu Sion nodohe hante hatu opo mpulu opo ncobu dua tauna. I wingkera to laipodohe-Na ee laitulihi hanga Ana Bimba ee pade hanga Tuama-Na. 2 Pade laiepeku to nomoni lako huruga ewa posoro ue mowo pade ewa moni berehe i langi to nelabi karimbohona. To laiepeku ee mui ewa moni kahapi to laikadora to pokahapi. 3 To hatu opo mpulu opo ncobu dua ee laitolohiramo lako dunia. Hira nampoulia ulia bou i tingoo poncunaa magau pade i tingoo opo to natuwu to ewa tari binata bo to pangkeni-to pangkeni ee. Moma hema ntanina to namala mampegurui ulia ee, wuwu hira to laitolohi ee aga. 4 Hira ee mai tauna to pomara naria noturu hante bangkele, nagaha mpuu katuwura. Hira ee nantuku oa Ana Bimba rima karaua-Na. Hira eemi to laitolohi lako humawee manuhia pade laipopewai hi Alatala pade Ana Bimba, nahibali ewa wua tinuda pamulana to laipopewai hi Alatala. 5 Momara naria nokalowo ba nakahalaia.Tolu malaeka Alatala nangkewo nangkambelai pobotuhi
6 Napu ee mui laihiloku hadua malaeka ntanina neworo i langi. Malaeka ee nangkeni Kareba Belo to moma naria pobaliana duu kahae-haena. Kareba Belo ee nakarebaika hi manuhia i dunia, hi butu ngata, butu muli, butu baha pade butu hampo'ompia. 7 Malaeka ee nongare narimboho nanguli iwei, “Pengkorumo hi Alatala pade pemabohemi hanga-Na, apa naratami tempona Alatala mampabotuhi manuhia. Pesombaamo komi hi Hia to nopajadi langi, tana, tahi hante humawee mata ue.”
8 Naria mui malaeka karoduana netuku pade nongare nanguli iwei, “Naropomia! Naropomi ngata Babel to laipolinga manuhia! To Babel eeramo to nopalangu tauna lako humawee ngata pade nampabawaira nantuku dota rarara to moma natimotoa!”
9 Napu ee netuku mui hadua malaeka katoluna pade nongare narimboho nanguli iwei, “Hema-hema to mampasombaa binata ee bo patungna pade mantarima tanda binata ee i wingkera ba i palera, 10 tauna eera mei manginu ue anggur hodo Alatala to laitoli-Nami i panginua-Na. Ue anggur hodo Alatala ee moma'i ragalo hante ue. Tauna eera mei rapakaheha rara apu pade belerang i tingoora malaeka to nagaha pade i tingoo Ana Bimba ee. 11 Apu to mampakaheha tauna eera mabaa dola duu kahae-haena. Eona bo bengina moma maria pentuuara rapakaheha. To rapakaheha ee tau-tauna to nampasombaa binata hante patungna, to hi hira naria tanda hanga binata ee.”
12 Koropokona i hei, todea Alatala to nanturuhi parenta-parenta Alatala pade to natigu hi Yesus kana mohabara.
13 Napu ee laiepeku to pojarita lako langi nanguli iwei, “Tulihimi ei: Mopamula welau, morahi mpuura tauna to natuwu nohangu rara hante Pue duura mamate.”
Inoha to Nagaha nanguli iwei, “Nakono mpuu etu! Mentuuramo mobago ntomo, apa lako pobago ntomora ee ratarimara mei tomo lako Alatala.”
Ihi dunia laisangki
14 Napu ee laihiloku, naria gawu to nabula. I gawu ee noncuna hadua to ewa Ana Manuhia. I woo-Na naria tali patoko lako bulawa pade pale-Na nangkakamu sangki to natada. 15 Napu ee naria hadua malaeka ntanina nehuwu lako Hou Alatala i huruga. Malaeka ee nongare narimboho nangulika Tauna to noncuna i gawu ee iwei, “Pakemi sangki-Mu etu pade posangkimo-Ko. Temponami dunia rasangki, apa natahami.” 16 Lauparia to noncuna i gawu ee nampake sangki-Na, pade laisangki-Nami dunia.
17 Napu ee laihiloku hadua malaeka to ntanina mui nehuwu lako Hou Alatala i huruga. Hia ee mui nangkakamu sangki to natada. 18 Pade narata muimi hadua malaeka ntanina lako meja pantunua kurban. Hiami malaeka to laiparahaya nampodoo apu i meja pantunua kurban ee. Nongare'i nangulika malaeka to nangkakamu sangki ee iwei, “Pakemi sangkimu pade tompomi wua anggur i dunia, apa nataha purami.” 19 Aji, malaeka ee nampake sangkina notompo wua anggur i dunia, pade anggur ee laitenena rau i popiea anggur hodo Alatala to nabohe. 20 Wua anggur ee mai laipie i hawaliku ngata. Lako popiea ee noilimi raa ewa ue koro, tolu atu kilo ka'awana noili, pade kandalana ba maria hamete hantanga.