Papitu malaeka hante papitu mangko hodo Alatala
15
1 Napu ee laihiloku naria tanda ntanina i huruga, nabohe pade neherai mpuu. Naria papitu dua malaeka hante papitu ngaa hilaka to kahuduana. Ane mahududimi hilaka to kahuduana ee, mahudumi hodo Alatala. 2 Pade laihiloku naria to ewa tahi to laibabei lako kaca nogalo apu. I wiwi tahi ee laihiloku muira tauna nokangkore. Tauna eeramo to nampadagi binata to nehuwu lako rara tahi pade patung binata ee. Laidagira mui lamoro to laipohanga binata ee. Hira to nopabeta ee nangkakamu kahapi to laiwaika-Nara Alatala. 3 Laipouliara ulia Musa batua Alatala pade ulia Ana Bimba. Iwei monina,“Oo Pue Alatala to Nabaraka,
nabohe pade nepakahera mpuu humawee to laibabei-Mu.
Oo Magau humawee ngata i dunia,
nakono pade nanoro mpuu ingku-Mu.
4 Humawee tauna mei mengkoru hi Iko Pue
pade mampemabohe hanga-Mu,
apa Iko aga to nagaha.
Tau-tauna lako humawee ngata mei marata mampasombaa-Ko,
habana laihilorami kanoro-Mu nobabei hangu hangaa.”
5 Nahudura noulia, laihiloku natebeami Hou Alatala i huruga to laiuli mui Kemah Po'ohaa Alatala. 6 Napu ee papitu dua malaeka hante papitu ngaa hilaka nehuwu lako rara Hou Alatala. Malaeka eera nowaru to nabula neringkila pade nampake pohabea lako bulawa. 7 Hadua lako opo to natuwu i huruga to ewa tari binata, nampawaikara papitu dua malaeka ee papitu mangko bulawa to naponu hante hodo Alatala. Hiami Alatala to natuwu duu kahae-haena. 8 Laihiloku, Hou Alatala i huruga ee naponu hante rangahu lako kabohe hanga bo baraka Alatala. Moma hema haduaa mamala mehua i rara Hou Alatala ee, ane poma'i mahudu papitu hilaka lako papitu malaika ee.