Ihi papitu mangko hodo Alatala laibubu
16
1 Lauparia, laiepeku to pojarita narimboho lako rara Hou Alatala nangulikara papitu malaeka ee iwei, “Koimo komi pade bubumi ihi papitu mangko hodo Alatala etu i dunia.”2 Napu ee raumi malaeka to pamulana pade laibubunami ihi mangko to laikakamuna ee i dunia. Lauparia, neumbami bihu to mpuu-mpuu nepaekai to nampakaheha humawee tauna to nampake tanda lako binata to nehuwu lako rara tahi ee pade to nampasombaa patungna.
3 Napu ee malaeka karoduana nobubu ihi mangko to laikakamuna ee i tahi. Lauparia, ue tahi nobali nawali raa, ewa raa to mate. Alaana namate pura humawee to natuwu i rara tahi.
4 Napu ee mui malaeka katoluna nobubu ihi mangko to laikakamuna ee i ue-ue koro pade i mata-mata ue. Alaana ue-ue koro bo mata-mata ue nobali nawali raa.
5 Pade laiepeku malaeka to nampodoo ue nanguli iwei,
“Oo Alatala to Nagaha,
to naria amimo-Ko lako pamulana duu welau ei,
pehuku-Mu ei moma nantomo hamika,
6 apa tau-tauna i dunia nampatehira todea-Mu pade nabi-nabi-Mu.
Welau ei laipainu-Mu muirahawo hante raa, apa nahipato ami ee ratarimara!”
7 Laiepeku mui to pojarita lako meja pantunua kurban nanguli iwei,
“Pue Alatala to Nabaraka,
humawee pehuku-Mu nakono pade moma nantomo hamika!”
8 Napu ee malaeka kaopona nobubu ihi mangko to laikakamuna ee i eo, lauparia eo ee laiwaika baraka mampakalopa manuhia hante peinona to ewa apu. 9 Manuhia nalopa lai'ino eo ee, etu pade manuhia nampakamo Alatala to nobabei humawee hilaka ee. Naupawee momara nancoro lako dohara pade momara nadota nampaune Alatala.
10 Malaeka ka'alimana nobubu ihi mangko to laikakamuna ee i poncunaa kamagaua binata to nehuwu lako rara tahi ee. Alaana humawee ngata to laiparenta binata ee nawali nalimau. Tau-tauna to nantuku'i nekakai nantaha kadua iepera. 11 Pade laikamora Alatala to i rara huruga habana kadua iepera pade bihura. Naupawee moma oara nancoro lako ingku-ingkura to nadaa.
12 Napu ee malaeka kaonona nobubu ihi mangko to laikakamuna ee i ue koro to nabohe to laikahangai Ue Efrat. Lauparia nabangimi ue koro ee, hampena namalaramo magau lako mali mataeo nantara i hee. 13 Pade laihiloku tolu anudaa ewa tari tarakakoa. Hamaa tarakakoa ee nehuwu lako nganga ule naga, hamaa nehuwu lako nganga binata to nehuwu lako rara tahi, pade hamaa nehuwu lako nganga nabi to moma nakono. 14 Hira eemi anudaa to nobabei tanda-tanda to nepakahera. Tolu anudaa ee mai rau hi humawee magau i dunia, mopahiromura bona mampohiwalika Alatala i eo to nepaekai to laipakatantu Alatala to Nabaraka.
15 Yesus nanguli iwei, “Marata-'A mei ewa karata to pangio! Morahimi tauna to nainga moto oa'i pade nojagai powaruna, bona nemo'i momako mpoleno pade moma'i maea rahilo tauna.”
16 Inoha to nadaa eera nopahiromu humawee magau i dunia i Harmagedon. Hanga ee laiala lako baha Ibrani.
17 Napu ee, malaeka kapapituna nobubu ihi mangko to laikakamuna ee i roelawa. Lauparia laiepemi to pojarita narimboho lako poncunaa magau i Hou Alatala nanguli iwei, “Nahudumi!”
18 Naliu ee nonetuku-tukumi kila pade berehe to narimboho bo linu to nabohe mpuu. Poma naria linu ewa ee kabohena hinungkai manuhia laipajadi. Eemi linu to neliu mpuu kabohena! 19 Ngata to nabohe ee nabikami nawali tolu mpobagia, pade humawee ngata i dunia naropomi. Lauparia, lailinga-Nami Alatala kadaa ingkura todea ngata Babel to laipolinga manuhia ee, etu pade laiwaika-Nara ue anggur hodo-Na.