Bangkele to nobalu wotona
17
1 Napu ee naratami hadua lako papitu malaeka to nangkakamu hangu lako papitu mangko ee he hi aku pade nangulika'a iwei, “Maiko hei, bona kupahiloiko bewa Alatala mampahuku bangkele to nobalu wotona to laidulu ncani, to noncuna i humpii kadeaa ue koro noili. 2 Magau-magau i dunia nogau hala hante bangkele ee, pade tau-tauna i dunia nalangu hante anggur pogau halana.”3 Napu ee naponu hante Inoha to Nagaha'amo pade malaeka ee nangkeni'a rau i tongo mpada to nabai. I ria laihiloku hadua bangkele noncuna i tongo hamaa binata to nalei jore. I woto binata ee nahobo hante hanga-hanga to laipakena nampahibali wotona hante Alatala. Binata ee papitu woona pade hampulu tonuna. 4 Bangkele ee nampake waru to naungu pade nalei jore to lairambai hante bulawa, watu to nahuli olina pade mutia. Bangkele ee nangkakamu panginua lako bulawa to naponu hante hangu hangaa to nepakaea bo nekarungkui to lairatana lako pogau halana. 5 I wingkena laitulihi hanga to laipopalerui batuana. Hanga ee mai, “Babel to laipolinga manuhia, tinara humawee bangkele to nobalu wotora pade humawee to nadaa ingkura i dunia.” 6 Laihiloku bangkele ee nalangu hante raa todea Alatala, to laipatehi habana natigura nampangaku Yesus halaku Puera.
Pangkahiloku bangkele ee, nahera mpuu'a. 7 Lauparia malaeka ee nangulika'a iwei, “Wetumoko mahera. Kukewokadamoko to laipopalerui nangkambelai bangkele ee pade nangkambelai binata to laihawina to papitu woona pade hampulu tonuna ee. 8 Binata to laihilomu etu, naria'i wengi natuwu, namatemi. Naupawee momami mahae mehuwu nculi lako lowu to moma namala laihuka kandalana, pade rapakaropu. Tauna to natuwu i dunia to hangara moma laitulihi rara Buku Katuwua hinungkai dunia laipajadi mahera mpuura mampahilo binata ee, apa binata ee naria'i wengi natuwu pade namatemi, naupawee meumba nculi moto'i mei.
9 Koropokona i hei, kana manoto pampahata. Papitu woo ee mai, batuana: papitu bulu to laiponcunai bangkele ee. 10 Papitu woo ee mui, batuana: papitu magau. Alima lako papitu magau ee mai momaramo noparenta. Hadua noparentadipi. To hadua poma'i nehupa. Ane marata'i, hangoni'i aga moparenta. 11 Binata to naria'i wengi natuwu pade namatemi ee, hiami magau kawaluna. Hia nahibali hante to papitu magau ee. Hia mei rahuku duu kahae-haena.
12 Pade hampulu tonu to laihilomu ee, batuana hampulu magau to pomara noparenta. Naupawee rawaikara mei baraka moparenta hingkani-ngkani hante binata ee hajaa kahaena. 13 Hampulu magau ee, nahintuwuramo matundu hi binata ee pade mampopewai barakara moparenta mantuku dota binata ee. 14 Mohiwalira mei mampaewa Ana Bimba. Naupawee, Ana Bimba hante humawee to pantuku-Na to natigu, to laikio-Na bo laipelihi-Na, mampadagira magau ee, apa Ana Bimba ee mai Pue lako humawee pue pade Magau lako humawee magau.”
15 Malaeka ee mui nanguli iwei, “Humawee ue koro to i humpii poncunaa bangkele to nobalu wotona to laihilomu etu, batuana: humawee ngata, humawee todea, humawee muli bo humawee baha. 16 Hampulu tonu to laihilomu pade binata ee mei mampodaa bangkele to nobalu wotona ee. Rarampakira humawee gaguna pade ralenoira'i. Rakonira ihina pade rapapuhira'i duuna mawali awu. 17 Habana laibabei-Nami Alatala rarara magau ee, mahintuwu mobabei napa to laipodota-Na pade mampopewai barakara moparenta hi binata ee, duuna humawee lolita Alatala rapaganai. 18 Bangkele to laihilomu ee batuana: ngata bohe to noparenta humawee magau i dunia.”