Ngata Babel naropo
18
1 Napu ee laihiloku hadua malaeka ntanina nehompo lako huruga. Nabohe barakana. Humangkulili dunia nabaa laiwanta baa barakana. 2 Malaeka ee nongare nanguli iwei,“Naropomi! Naropomi Babel to laipolinga manuhia!
Ngata ee nawali po'ohaara hetami pade pentaleruara anudaa,
pade pentalerua humawee tonci to nekarungkui to laipodaa tauna.
3 Apa humawee ngata lai'inurami ue anggur pogau halana
pade magau-magau i dunia nogau hala hante hia.
Pade to podaga-to podaga i dunia nawali nahugi lako hangu hangaa to nahuli
to laipobalura hi hia to moma namala nantanee dota rarana.”
4 Naliu ee, laiepeku mui to pojarita ntanina lako huruga nanguli iwei,
“Petibomo komi todea-Ku,
petibomo komi lako ngata etu.
Nemo mituku humawee dohana,
bona nemo komi mambela humawee hilaka to mamparumpa ngata etu!
5 Apa nadea mpuumi dohana, noneduncu-duncu rata i langi,
pade lailinga-Nami Alatala humawee kadaa ingku ngata ee.
6 Balahimi hi ngata etu nahibali hante ingku daa to laibabeina.
Balahimi ingku daana ee rongkani kadaana lako to laibabeina.
Kahini panginuana hante inua to rongkani kapaina lako kapai inua to laipainukana tauna.
7 Pakaheha'i pade pakadua rarana
mahibali hante pampemabohena wotona bo kahugia to laikarahakana.
Apa rara bongona nanguli iwei,
‘Aku ei mai magau bangkele to noparenta!
Moma'a to nabalu,
pade moma maria hangkania madua raraku!’
8 Etu pade rarana haeo aga humawee hilaka ngkali marata mamparumpa ngata ee.
Hilaka ee mai kamatea, dua rara pade oro mpai.
Hia mei rapapuhi hante apu,
apa Pue Alatala to mampabotuhi'i, nabaraka.
9 Magau-magau i dunia to nogau hala hante ngata ee pade natuwu nampakaoha dota rarara hante hangu hangaa to nahuli to lairatara lako ngata ee, mangkakeohi bo motantangihi ngata ee ane rahiloradimi rangahu apu to mampakapapu'i. 10 Magau-magau ee mokangkore ma'awa lako ngata ee apa maekara mambela hilakana. Hira mei manguli iwei,
‘Nahilakami! Nahilakami ngata to laipolinga manuhia ee,
ngata Babel to naroho!
Rarana hajaa aga, ngkali laihukumi!’
11 To podaga-to podaga i dunia majuu rarara pade mangkakeohi ngata ee, apa momami maria to mangoli balu-balura. 12 Balu-balura ee: bulawa, halaka, watu to nahuli olina pade mutia. Naria mui kae bula to naludu, kae to naungu, kae sutra, pade kae to nalei jore. Naria mui nengila parewa to laibabei lako ngihi gajah, kau to nahuli olina, tambaga, ahe pade watu pualam. 13 Naria mui kanino, rampa-rampa, wongi-wongi, mur, dupa, ue anggur, lana zaitun, labu gando pade wuli gando. Naria mui japi, bimba, jara, kereta, pade manuhia to laipobatua. Moma wuwu ee, hante inoha manuhia mui laipobalura. 14 Hira to podaga ee mai mangulika ngata ee, ‘Momami naria humawee kasanaa to laipokailumu. Narontomi kahugia bo pampolingako, momami murata nculi!’ 15 Humaweera to podaga to nahugiramo habana nodaga i ngata ee, mokangkore i ka'awaana apa maekara mambela hilaka to mamparumpa ngata ee. Makeora pade majuu mpuu rarara. 16 Hira mei manguli iwei,
‘Nahilakami! Nahilakami ngata to laipolinga manuhia ee!
Biahana'i nampake waru lako kae bula to naludu, kae to naungu pade kae to nalei jore,
hante ramba-ramba bulawa, watu to nahuli olina pade mutia!
17 Naupawee rarana hajaa aga, ngkali naronto purami kahugiana!’
Humawee to popajala kapala tahi, to pencawi kapala tahi, to nobago i rara kapala tahi hante humawee tauna to nopaelo i tahi, mokangkore ma'awa lako ngata ee. 18 Mampahilo rangahu apu to mampakapapu ngata ee, hira mei mongare manguli iwei, ‘Moma naria ngata ntanina i dunia to nahibali hante ngata to laipolinga mairia!’ 19 Lauparia rahawura awu i woora, pade hamalira makeo bo motantangi, mongarera manguli iwei,
‘Nahilakami! Nahilakami ngata to laipolinga!
Kahugiana nampakahugira humawee tauna to naria kapala tahira.
Naupawee rarana hajaa aga, ngkali naronto purami humawee kahugiana!’ ”
20 Naria to pojarita lako huruga nanguli iwei,
“Kagoemo komi to i huruga habana naropomi ngata ee.
Kagoemo komi todea Alatala, rasul-rasul pade nabi-nabi,
apa laihuku-Nami Alatala ngata ee mai
nampabalahi kadaa ingkuna hi komi!”
21 Napu ee, hadua malaeka to naroho no'ongko hangu watu ewa kabohe watu pogilia to nabohe pade laitadina i rara tahi. Pade malaeka ee mai nanguli iwei,
“Weemile Babel to laipolinga manuhia ee rapopepana rau nauna
pade momami rarata nculi.
22 Momami maria raepe moni kahapimu, to pouliamu, moni tulalimu
pade moni tarompemu!
Momami maria to nataualumu,
pade moni watu pogiliamu momami maria raepe.
23 Baa poindomu momami maria rahilo
pade momami maria raepe huha ponikaamu.
Apa to podagamu wengi laipemabohe i dunia,
pade laipahalataramu humawee ngata i dunia hante kapore pangincanimu.
24 I rara ngata ee mai lairata raa nabi-nabi, raa todea Alatala,
pade raa humawee tauna to laipatehi i dunia.”