Ulia kagoea habana ngata Babel laipakapapumi
19
1 Napu ee, laiepeku ewa naria tauna to nadea nojarita narimboho i huruga nanguli iwei,“Unemi Pue!
Hiami Alatalata to nepakahalama, to laipemabohe hanga-Na pade nabaraka.
2 Unemi Pue, apa pobotuhi-Na nakono pade moma nantomo hamika!
Laihuku-Nami Alatala bangkele to nobalu wotona to laidulu ncani ee,
to nampakagero dunia hante gau halana,
pade laibalahika-Naramo batua-Na to laipatehi bangkele to nobalu wotona ee.”
3 Iulira mui tauna to nadea ee iwei,
“Unemi Pue!
Rangahu apu to nampakapapu ngata bohe ee
batena moto'i morangahu duu kahae-haena!”
4 Rompulu opo dua to pangkeni pade opo to natuwu to ewa tari binata ee notingkodu nepue hi Alatala to noncuna i poncunaa magau ee nanguli iwei,
“Amin! Unemi Pue!”
5 Lauparia laiepeku to pojarita lako poncunaa magau ee nanguli iwei,
“Unemi Alatalata,
komi humawee batua-Na,
komi to nengkoru hi Hia,
belo to laipemabohe, belo mui todea biaha!”
Ponikaa Ana Bimba
6 Napu ee laiepeku ewa naria tauna to nadea nojarita narimboho ewa posoro ue mowo pade ewa moni berehe i langi to nelabi karimbohona nanguli iwei,
“Unemi Pue!
Apa Pue Alatalata to Nabaraka noparentami halaku Magau.
7 Maitamo magoe-goe bo masana rarata,
pade mampemabohe Alatala.
Apa naratami eo ponikaa Ana Bimba,
pade nahadiami pongante bangkele-Na.a
8 Pongante bangkele ee laiwaika powaru lako kae bula to naludu,
to neringkila bo nagaha.”
Powaru lako kae bula to naludu ee batuana: ingku belo todea Alatala.
9 Napu ee malaeka ee nangulika'a iwei, “Tulihimi ei: Morahiramo tauna to laioka rau ponikaa Ana Bimba.” Iulikana mui'a, “Lolita ei nakono. Lolita ei lako Alatala moto.”
10 Notingkodu'a i paana mingki mampasombaa'i, naupawee iulikana'a, “Nemo aku musombaa! Aku ei mui batua, nahibali hante iko hante hira ompimu hangu kaparahayaa to noparata pohabi to laiuli Yesus. Alatala aga to musombaa. Apa tau-tauna namparata noto lako pohabi to laiuli Yesus hampena mamalara moparata peboha Alatala.”
Lolita Alatala nampadagi binata
11 Napu ee laihiloku huruga natebea. Laihiloku naria hamaa jara to nabula. To nencawi jara ee laikahangai “to Natigu bo Nakono.” Moma-'I nantomo hamika nobotuhi pade nohiwali. 12 Mata-Na nabaa ewa baa apu. I woo-Na nadea tali patoko. I woto-Na naria laitulihi hanga to moma hema haduaa nangincani, Hia moto aga to nangincani. 13 Hia ee nampake waru to napumi lailome i rara raa. Hanga-Na “Lolita Alatala.” 14 Humawee tantara huruga nantuku-'I hante nencawi jara to nabula, nowaru kae to naludu, nabula pade nagaha. 15 Lako ngudu-Na nehuwu hamata tono lampa to natada, to Napake mampadagira humawee ngata. Hia mei moparentara hante roho-Na to ewa karoho lua ahe. Pade Napie mei ue anggur rara popiea ue anggur hodo Alatala to Nabaraka. 16 I waru-Na pade i timpu-Na laitulihi hanga iwei, “Magau lako humawee magau pade Pue lako humawee pue.”
17 Napu ee laihiloku mui hadua malaeka nokangkore i rara eo pade nongare hi humawee tonci to neworo i langi nanguli iwei, “Mai komi hei, popahiromumo komi pade tukumi huha bohe to laibabei Alatala, 18 bona mikoni ihira magau, ihira komandaa tantara, ihira tantara, ihi jara bo to pencawi jara, pade ihi humawee tauna, batua ba tauna to moma laipobatua, todea biaha ba to laipemabohe.”
19 Napu ee, laihiloku binata to nehuwu lako rara tahi pade magau-magau i dunia hante tantarara nahiromu mampohiwalika to Pencawi jara to nabula ee, hante tantara-Na. 20 Naupawee binata ee laihoko dohe nabi to moma nakono to nobabei tanda-tanda to nepakahera hante baraka binata ee hampena nampakahalatara to nantarima tanda lako binata ee pade nampasombaa patung binata ee. Hira ee laitene tuwu rara tahi apu to nogalo belerang. 21 Humawee to nantuku binata ee laipatehi hante tono lampa to nehuwu lako ngudu to Pencawi jara to nabula ee. Nabohu humawee tonci nangkoni ihira.