Poparentaa to hancobu mpae
20
1 Napu ee laihiloku hadua malaeka nehompo lako huruga nangkakamu kunci lowu to moma namala laihuka kandalana pade hangu rante bohe. 2 Laihokona ule naga ee, to laiuli mui ule ntua, to laikahangai to Pepakudaa ba Magau Heta. Laihiluna'i hancobu mpae kahaena, 3 pade laitenena i rara lowu to moma namala laihuka kandalana. Laiwuntana lowu ee pade laiboliina segel, bona nemopi mampakahalatara humawee ngata kapomana mahudu tempo to hancobu mpae ee. Mapu ee mei kana rabakaha'i, naupawee hangoni aga.4 Napu ee laihiloku poncunaa-poncunaa kamagaua, pade tauna to noncuna i butu poncunaa ee laiwaika baraka mobotuhi tauna. Laihiloku mui inohara tauna to laihamale habana nohabi nangkambelai Yesus pade lolita Alatala, to momarahana nampasombaa binata ee bo patung binata ee pade moma mui naria tanda binata ee i wingkera ba i palera. Natuwu nculiramo pade noparenta halaku magau hingkani-ngkani hante Kristus hancobu mpae kahaena. 5 Hira eemile to laipakatuwu nculi Alatala pamulana. Moma maria to ntanina to rapakatuwu nculi. Mahududimi to hancobu mpae ee pade rapakatuwu nculi purarada.
6 Morahi mpuura to rapakatuwu nculi pamulana ee. Hira ee todea Alatala. Momaramo mamate karongkanina. Hira mei mawali imam Alatala bo Kristus, pade hira mei moparenta halaku magau hingkani-ngkani hante Kristus hancobu mpae kahaena.
Magau Heta rahuku
7 Mahudupi hancobu mpae ee, rabakahami Magau Heta ee lako pampahilua'i ee, 8 pade rau'i mampakahalatara manuhia i humawee ngata i dunia, to laikahangai Gog pade Magog. Hira ee mei napahiromu rau mohiwali. Kadeara mahibali hante kadea talabone i wiwi tahi. 9 Hira ee mei rau mohena mampatikuhi po'ohaa todea Alatala i dunia, etumi ngata to laipotowe Alatala. Naupawee, manau apu lako i langi mampakapapura. 10 Pade Magau Heta to nampakahalatarara ee ratene i rara tahi apu to nogalo belerang, kariaa binata to nehuwu lako rara tahi pade nabi to moma nakono ee. Hira mei rapakaheha eona bo bengina duu kahae-haena.
Pehuku to kahuduana
11 Napu ee, laihiloku hangu poncunaa magau to nabula pade nabohe, hante Hia to noncuna i lolona. Habana baraka-Na to noncuna ee, ngkali naronto hingkanimi langi bo dunia, pade momami naria. 12 Pade laihiloku tauna to namateramo, to laipemabohe bo todea biaha, nokangkore i tingoo poncunaa magau ee. Laibukami buku-buku, pade laibuka mui hangu buku to ntanina, eemi Buku Katuwua. Tauna to namateramo laibotuhi mantuku ingkura to laitulihi rara buku-buku ee. 13 Tau-tauna to namate i rara tahi laipakatuwu nculi, wee moto mui humawee tauna to i rara Po'ohaara to Mate. Pade butu tauna eera laibotuhi mantuku ingkura moto. 14 Napu ee, kamatea pade Po'ohaara to Mate laitene rara tahi apu. Pehuku i rara tahi apu eemi kamatea karongkanina. 15 Butu tauna to moma naria hangana laitulihi rara Buku Katuwua laitene rara tahi apu ee.