Binata to nehuwu lako rara tahi
13
1 Napu ee laihiloku naria hamaa binata nehuwu lako rara tahi. Hampulu tonuna pade papitu woona. I butu tonuna ee naria tali patoko. I butu woona naria laitulihi hanga to laipakena nampahibali wotona hante Alatala. 2 Binata to laihiloku ee mai ewa tari harimau, paana ewa paa beruang pade nguduna ewa ngudu singa. Ule naga ee nampawai binata ee rohona, poncunaa kamagauana pade barakana to nabohe noparenta. 3 Hangu lako papitu woona ee ewa nambela baka to nepakamate, naupawee bakana ee naurimi. Etu pade humawee tauna i dunia nampolinga pade nantuku binata ee. 4 Manuhia i dunia nampasombaa ule naga ee apa hia nampawai binata ee baraka. Binata ee mui laisombaara pade iulira iwei, “Moma hema to nahibali hante binata ei! Pade moma hema to mampadagi'i!”5 Binata ee laiwaika baraka manguli hangu hangaa to mahombo pade mampopore Alatala. Laiwaika mui'i baraka mobabei dotana opo mpulu romula kahaena. 6 Lauparia laipamulanami binata ee nampahauru Alatala. Laipoporena hanga Alatala, po'ohaa Alatala, pade hira to no'oha i huruga. 7 Laiwaika mui'i baraka mampohiwalika todea Alatala bo mampadagira. Pade laiwaika mui'i baraka moparenta butu muli, butu hampo'ompia, butu baha pade butu ngata. 8 Binata ee laisombaa humawee tauna i dunia to moma laitulihi hangara i rara Buku Katuwua hinungkai dunia laipajadi. Buku Katuwua ee, Ana Bimba to laihamale tumpuna.
9 Hema to natalingaa, epe belo komi!
10 Hema to laipatantui ratawani, kana ratawani. Hema to laipatantui rapatehi hante tono lampa, kana rapatehi hante tono lampa.
Koropokona i hei, todea Alatala kana mohabara pade matigu.
Binata to nehuwu lako rara tana
11 Napu ee laihiloku hamaa binata ntanina nehuwu lako rara tana. Binata ee rongu tonuna. Tonuna ewa tari tonu bimba naupawee pojaritana ewa pojarita ule naga. 12 Binata to nehuwu lako rara tana ee, laitudu binata to nehuwu lako rara tahi. Aji humawee baraka binata to nehuwu lako rara tahi laipake binata to nehuwu lako rara tana. Humawee manuhia to no'oha i dunia laipahuruna mampasombaa binata to nehuwu lako rara tahi to naurimi bakana to nepakamate ee. 13 Binata to nehuwu lako rara tana ee nobabei tanda-tanda to nepakahera. Laipopehompona apu lako langi rau i dunia i tingoo humawee tauna. 14 Laibabeina tanda-tanda to nepakahera ee hante baraka lako binata to nehuwu lako rara tahi. Hante tanda to nepakahera ee, laipahalataranara tauna to no'oha i dunia. Laitudunara mobabei hangu patung to ewa tari binata to nehuwu lako rara tahi to nabakami nambela tono lampa naupawee natuwu moto'i.
15 Binata to nehuwu lako rara tana ee laiwaika baraka bona mamala'i mampawaika patung ee inoha, hampena mamala'i patung ee mojarita pade moparenta bona humawee tauna to moma mampasombaa patung ee rapatehi. 16 Humawee tauna, belo to laipemabohe, belo mui todea biaha, to nahugi bo to nakahiahi, batua bo tauna to moma laipobatua, laipahuru binata ee mantarima tanda to raboli i pale kanara ba i wingkera. 17 Moma hema haduaa mamala meoli ba mobalu hangu hangaa ane moma maria tanda ee hi hia. Tanda ee hanga binata to nehuwu lako rara tahi ee. Tanda ee mamala mui rauli lamoro to laipohanga binata ee.
18 Koropokona i hei, kana maria noto. Tauna to nanoto mamala moreke batua lamoro binata ee, apa lamoro ee mai nampahambei hanga hadua tauna. Lamorona 666.