Bangkele hante ule naga to nabohe
12
1 Napu ee laihilo hangu tanda to nabohe i langi, hadua bangkele nampowaru eo. Paana nentodu i wula pade woona notali patoko hampulu rongu betue. 2 Bangkele ee bulana notiana. Nongare'i nekakai nantodokaha, apa temponami moana. 3 Napu ee laihilo mui hangu tanda ntanina i langi, hamaa ule naga bohe to nalei, nowoo papitu pade notonu hampulu. I butu woona naria tali patoko. 4 Lelona noweba hangu bagia lako tolu bagia betue i langi pade betue ee laitadina i dunia. Ule naga ee nokangkore i tingoo bangkele to lau moana ee, bona ane moana'i bangkele ee, kadodola naomemi ngana to naote bangkele ee. 5 Bangkele ee noana hadua Ngana balailo to moparenta humawee manuhia hante roho-Na to ewa karoho lua ahe. Ngkali lairampakimi Ngana ee lako bangkele ee, laikeni rau hi Alatala i poncunaa-Na. 6 Bangkele ee nalai rau i tongo mpada to nabai, rau i po'ohaa to laipahadiaka Alatala hi hia. I hee, bangkele ee rapiara hancobu roatu ono mpulu eo kahaena.Ule naga laidagi
7 Napu ee, neumba pohiwali i huruga. Mikhael hante malaeka-malaeka to nantuku'i nampaewa ule naga ee mai. Ule naga ee muihawo ne'ewa laitulungira malaeka to nantuku'i. 8 Naupawee, ule naga hante malaeka-malaeka to nantuku'i ee nadagi, pade momaramo laipaliu no'oha i huruga. 9 Ule naga bohe ee laitadi rau i hawaliku huruga. Hiami ule ntua to laikahangai to Pepakudaa ba Magau Heta, to nampakahalatara humawee manuhia i dunia. Ule naga ee laitadi rau i dunia hante humawee malaeka to nantuku'i.
Ulia popabeta
10 Napu ee, laiepeku to pojarita narimboho i huruga nanguli iwei,
“Welau ei naratami tempona Alatala nampakahalama todea-Na.
Laipahiloi-Nami baraka-Na noparenta halaku Magau.
Naratami tempona Magau to Pepakahalama to laitipa Alatala nampopahiloi baraka-Na.
Apa laitadi rau hawaliku hurugami
to eona bo bengina nampahalaira ompita to hangu kaparahayaa. i tingoo Alatala.
11 Ompi-ompita to hangu kaparahayaa nampadagi'i
hante raa Ana Bimba
pade hante pohabira nangkambelai kaparahayaara.
Moma'i laipotowera tuwura,
batena motora nohabi naupa laihehaki duura namate.
12 Etumo, kagoe puramo komi,
humaweemi to no'oha i rara huruga!
Naupawee mahilakamo komi to no'oha i dunia bo i tahi,
apa Magau Heta nehompo tulau hi komimi.
Nadea mpuu gigi rarana,
apa laincanina hodidimi logana mepahalatara.”
Ule naga nampadapa bangkele
13 Hangka laincanina ule naga ee ane laitadi rau i dunia'imi, laidapana bangkele to nangote Ngana balailo ee. 14 Naupawee bangkele ee laiwaika rongu kapi to nabohe ewa kapi tonci lowe bona mamala'i meworo rau i po'ohaana i tongo mpada to nabai, na'awa lako ule naga ee. I hee, bangkele ee rapiara tolu mpae hantanga kahaena. 15 Ule naga ee nampopehuwu ue lako nguduna ewa kabohe ue koro hi bangkele ee bona maonu'i. 16 Naupawee, dunia nantulungi bangkele ee. Dunia nobea nguduna nangome ue to nehuwu lako ngudu ule naga ee. 17 Nahodo mpuu'i ule naga hi bangkele ee, hampena rau laipohiwalikana muli to ntanina lako bangkele ee, etumi humawee tauna to nanturuhi parenta-parenta Alatala pade to batena motora nohabi nangkambelai Yesus. 18 Napu ee ule naga ee mai nokangkore i wiwi tahi.