Rodua nabi Alatala
11
1 Napu ee mai, laiwaika'amo hangu pohuka to ewa lua, pade laiulika'a iwei, “Koimoko mohuka Hou Alatala pade meja pantunua kurban, pade reke hangkua kadeara to nepue hi Alatala i rarana. 2 Naupawee nemo muhuka karawaa to i hawaliku Hou Alatala, apa laipopewai hi todea to moma nangincani Alatalami. Hira ee mei moparenta ngata to laipotowe Alatala mantuku dota rarara opo mpulu romula kahaena. 3 Pade Kutudu mei rodua nabi-Ku moparata peboha Alatala hancobu roatu ono mpulu eo kahaena hante mampake waru to laipake tempo kamatea.” 4 Rodua nabi eera mai to lairapaika rompuu kau zaitun pade rongu pobolia poindo to nokangkore i tingoo Pue to nabaraka i humangkulili dunia. 5 Pade ane maria tauna madota mobabei to nadaa hi hira, mehuwu mei apu lako ngudura mampakapapu to nampobalira ee mai. Iweemi mei kamatera butu tauna to mingki mobabei to nadaa hi hira. 6 Nabi to rodua ee mai nabarakara motaha uda bona nemo maudaa bulara moparata peboha Alatala, pade nabarakara mobali humawee ue mawali raa pade mampahuku dunia hante humawee hilaka, butu ngkanina rapodotara.7 Ane mahudurapa moparata peboha Alatala, mehuwumi mei binata lako lowu to moma namala laihuka kandalana mampohiwalikara. Binata ee mei mampadagira bo mampatehira. 8 Pade watalokara mei rapalele maboli i karajaa ngata bohe, i rima Puera laisalib. Ngata bohe ee mai lairapaika Sodom pade Mesir. 9 Tauna lako butu ngata, butu muli, butu baha pade butu hampo'ompia mampahilo watalokara tolu eo hantanga kahaena, pade tau-tauna ee mampetagii watalokara ratana. 10 Magoe mpuura tauna to no'oha i dunia to nadaa ingkura habana kamatea rodua nabi ee mai. Rababeira huha pade momepakatui hadia, apa rodua nabi ee mai nangkeni pehehakia hi humawee tauna to no'oha i dunia.
11 Kaganana tolu eo hantanga ee, Alatala nampawaikara inoha katuwua hampena kadodola nokangkoreramo. Humawee tauna to nampanaara nawulunga. 12 Napu ee nabi to rodua ee mai nangepe to pojarita narimboho lako huruga nangulikara iwei, “Pengkahemo komi tumai!” Lauparia nateongkoramo hante gawu rau i langi, lainaa bali-balira.
13 Tempo ee mui nadupami linu bohe pade hangu bagia lako hampulu bagia ngata bohe ee mai naropo. Pitu ncobu dua tauna namate habana linu ee mai, pade hira to ntanina nawulunga bo nampemabohe Alatala to naria i huruga.
14 Hilaka to karongaana naliumi. Epe, hilaka katoluna para muimi marata.
Tarompe kapapituna laitawui
15 Napu ee malaeka kapapituna notawui tarompena, pade laiepemi nariara to pojarita narimboho i rara huruga nanguli iwei,
“Welau ei dunia laiparenta Pue Alatalatami
pade Magau to Pepakahalama to laitipa-Na.
Pade Hia moparenta halaku Magau duu kahae-haena.”
16 Nangepe lauria, to pangkeni to rompulu opo dua to noncuna i poncunaara i tingoo Alatala, notingkodu pade nampasombaa Alatala, 17 nanguli iwei,
“Nosukuru kami hi Iko Pue, Alatala to Nabaraka,
to naria welau ei pade to naria amimo-Ko,
apa laipahiloi-Mumi baraka-Mu to nabohe,
pade nopamulamo-Ko noparenta halaku Magau.
18 Nahodora humawee tauna to moma nangincani-Ko,
naupawee naratami tempona Mupahiloi hodo-Mu.
Temponami tau-tauna to namate Mubotuhi
pade temponami Muwaika tomo hi nabi-nabi to nampobagoka-Ko,
pade hi todea-Mu to nengkoru hi Iko,
belo todea biaha, belo mui hira to laipemabohe.
Pade temponami Mupakaropura tauna to nampatehi tau-tauna i dunia.”
19 Napu ee natebeami Hou Alatala i huruga, pade laihilomi peti potipa-Na i rara Hou-Na ee mai pade nadupami kila, berehe, linu pade uda es to nabohe.