Halulu buku kodi to natebole
10
1 Pade aku nampahilo hadua malaeka ntanina to naroho, nehompo lako huruga. Malaeka ee laibungu gawu, pade naria tereue i wongko woona. Lencena ewa eo, pade paana ewa tinca apu. 2 Rara mpalena laikakamuna halulu buku kodi to natebole. Paa kanana nentodu i tahi pade paa kaina nentodu i lorena. 3 Pade hia nongare narimboho ewa karimboho poau singa. Napu malaeka ee mai nongare, nojaritaramo papitu berehe. 4 Napurapa papitu berehe ee mai nojarita, madota kutulihidipi, laiepekumi to nojarita lako huruga nanguli iwei, “Popalerui napa to laiuli papitu berehe etu mai, nemo mutulihi.”5 Pade laihiloku malaeka to nentodu i tahi pade nentodu i lorena ee mai, no'ongko pale kanana rau i langi. 6 Pade malaeka ee nosumpa hante hanga Alatala to natuwu duu kahae-haena, to nopajadi langi hante humawee ihina, pade dunia hante humawee ihina, pade tahi hante humawee ihina, nanguli iwei, “Momami Nasoro Alatala tempo-Na mobabei napa to laipoliwoi-Na! 7 Apa ane natawuidimi malaeka kapapituna tarompena, temponami Alatala mopaganai patuju-Na to ilodo laipopalerui-Na hi manuhia. Patuju-Na ee mai laiuli-Na amimi hi nabi-nabi to nampobagoka-'I.”
8 Pade to pojarita to laiepeku lako langi ee mui nangulika'a iwei, “Koimoko, alami buku kodi to natebole rara mpale malaeka to nentodu i tahi pade nentodu i lorena etu mai.”
9 Napu ee rau'amo hi malaeka ee mai pade nerapi hi hia, bona napopewai buku kodi ee mai hi aku. Iulikana'a iwei, “Alami pade konimi. Ane mukoni buku etu, mapoi mei rara ntaimu, naupawee i rara ngudumu mei mamomi ewa ue wani.” 10 Lauparia laialakumi buku kodi ee lako pale malaeka ee mai, pade laikoniku. Pangkoniku buku ee, lairasaiku i nguduku namomi ewa ue wani, naupawee hangka laiomeku, napoimi rara ntaiku. 11 Napu ee laiulika'a iwei, “Kana muparata peboha Alatala to ntaninapi nangkambelai napa to madupa hi madea magau pade todea lako madea ngata, muli bo baha.”