Tarompe ka'alimana laitawui
9
1 Napu ee malaeka ka'alimana notawui tarompena, pade laihiloku hangu betue narona lako langi rau i dunia. Betue ee laiwaika kunci womo lowu to moma namala laihuka kandalana. 2 Lauparia laibeanami womo lowu ee mai, pade nengkahemi rangahu lako rara lowu ee ewa rangahu pampa to laihuwe. Eo bo roelawa nawali nalimau habana rangahu ee mai. 3 Lako rara rangahu ee mai nehuwumi hokoa-hokoa rau i dunia, pade hokoa eera mai laiwaika baraka mampatuhi manuhia hante bisa to nahibali hante bisa ntole to laiuli mui bandowi to natuwu i dunia. 4 Hokoa eera laiboha bona nemora mampakapumpu kawoko, dunumpu ba kau-kau i dunia, wuwu manuhia to moma naria mere Alatala i wingkera aga to rahehakira. 5 Momara laiwaika baraka mopatehi manuhia to moma naria mere Alatala i wingkera ee. Hokoa eera wuwu laiwaika baraka mohehaki manuhia hante tuhira alima mula kahaena. Kadua petuhira ewa kadua petuhi ntole. 6 Tempo ee mai tau-tauna mampehimukui bona mamateramo, naupawee momara mamate. Mingki mpuura mamate, naupawee moma oara mamate.7 Hokoa-hokoa ee mai tarina nahibali ewa jara to laipahadia rau mohiwali, pade i woora naria to ewa tali patoko bulawa, pade lencera ewa lence manuhia. 8 Wuluara nahibali hante wulua bangkele, pade ngihira nahibali hante ngihi singa. 9 Bamarara lailawa hante waru ahe, pade moni kapira ewa moni kereta-kereta to laidii nadea jara, to nolumba rau i rara pohiwalia. 10 Lelora nahibali hante lelo ntole naria bisana, pade i rara lelora ee mai naria baraka mampahehaki manuhia alima mula kahaena. 11 Magau to noparentara hokoa ee mai, malaeka to nampodoo lowu to moma namala laihuka kandalana. Rara baha Ibrani hanga malaeka ee laiuli Abadon pade rara baha Yunani laiuli Apolion, batuana: to Pepatehi.
12 Hilaka to pamulana naliumi. Epe, rongaapi hilaka to kana madupa.
Tarompe kaonona laitawui
13 Napu ee malaeka kaonona notawui tarompena, pade laiepeku to nojarita lako opo tonu to naria i huno-huno meja bulawa pantunua kurban to i tingoo Alatala. 14 To nojarita lako meja pantunua kurban ee mai nanguli hi malaeka kaonona to nangkakamu tarompe ee mai iwei, “Bakaharamo opo malaeka to laihilu i ue bohe Efrat etu.” 15 Lauparia laibakahanaramo opo malaeka to laipakatantu amimi tempona bo eona bo wulana bo mpaena, mampatehi hangu bagia lako tolu bagia manuhia. 16 Kadeara tantara to nantuku opo malaeka ee mai roatu juta tantara to nojara. Wee kadeara to laiepeku.
17 Rara pehiloaku ee mai, laihiloku jara-jara pade tau-tauna to nencawi jara ee. Tauna to nencawi jara ee mai nampake waru ahe to nalei ewa apu, to noawu ewa rangahu pade to narangkuni ewa belerang. Woo jara-jara ee mai ewa woo singa, pade lako ngudura nehuwu apu, rangahu pade belerang. 18 Hangu bagia lako tolu bagia manuhia i dunia laipatehi tolu ngaa to nepakahilaka, etumi apu, rangahu pade belerang to nehuwu lako ngudura jara ee mai. 19 Barakara jara ee mai i rara ngudura pade i lelora. Apa lelora nahibali hante ule, naria woona. Lelora to naria woona eemi to nampahehaki manuhia.
20 Naupawee manuhia ntanina to moma namate habana hilaka ee mai, momara nancoro pade momara nadota nampalahi to laibabei mpalera. Momara nentuu nampasombaa anudaa-anudaa pade pue-pue ntani to laibabeira lako bulawa, halaka, tambaga, watu pade kau to moma namala nenaa, ne'epe ba nomako. 21 Pade momara nancoro nepatehi, nedoti, nogau hala pade nangio.