Ana Bimba nolali segel kapapituna
8
1 Polali-Na Ana Bimba ee mai segel kapapituna, nalino mpiimi i huruga, maria hantanga jaa kahaena. 2 Napu ee laihiloku papitu malaeka to nokangkore i tingoo Alatala, laiwaika papitu tarompe. 3 Napu ee naratami hadua malaeka to ntanina rau nokangkore namohu meja pantunua kurban. Rara mpalena naria pantunua dupa to laibabei lako bulawa. Pade hia laiwaika nadea dupa, bona natunu napopewai hingkani-ngkani hante hambaya humawee todea Alatala i meja pantunua kurban to laibabei lako bulawa to i tingoo poncunaa magau ee mai. 4 Lauparia nengkahemi rangahu dupa to laikakamu malaeka ee mai hingkani-ngkani hante hambayara todea Alatala rau i tingoo Alatala. 5 Napu ee malaeka ee mai nangala pantunua dupa ee mai, laikahinina hante apu lako meja pantunua kurban, pade laipopetadina rau i dunia. Lauparia laiepemi moni berehe to narimboho hante kila, pade nadupami linu.Opo dua malaeka notawui tarompera
6 Napu ee papitu malaeka to nangkakamu papitu tarompe ee mai, nahadiaramo motawui tarompera. 7 Lauparia malaeka to pamulana notawui tarompena, pade ngkali nariami uda es pade apu nogalo hante raa, pade humaweena ee laitene rau i dunia hampena nampakapapu hangu bagia lako tolu bagia dunia hante puu-puu kauna bo humawee rumpuna.
8 Napu ee malaeka karoduana notawui tarompena, pade naria to ewa bulu bohe to nabaa ewa apu laitene rau rara tahi. Pade hangu bagia lako tolu bagia tahi ee mai nawali raa, 9 pade namateramo hangu bagia lako tolu bagia humawee to natuwu i rara tahi, pade hangu bagia lako tolu bagia kapala-kapala tahi nagero puraramo.
10 Napu ee malaeka katoluna notawui tarompena, pade nanawumi lako langi hangu betue to nabohe, nabaa ewa hulu, pade namparumpihi hangu bagia lako tolu bagia ue-ue koro bo mata-mata ue. 11 Hanga betue ee mai Apsintus, batuana: Napai. Kanawuna betue ee i rara ue, hangu bagia lako tolu bagia ue nawali napai, hampena nadea tauna namate habana nanginu ue to napai ee.
12 Napu ee malaeka kaopona notawui tarompena, pade naria to nampaweba eo, wula bo betue, hampena hangu bagia lako tolu bagia lako eo, wula bo betue eera mai nawali nalimau. Hangu bagia lako tolu bagia mpoeo nalimaumi, wee mui hangu bagia lako tolu bagia ngkawengia nawali nalimau ngkii.
13 Napu ee laihiloku pade iepeku hamaa tonci lowe neworo i langi, pade nanguli hante narimboho iwei, “Mahilaka! Mahilaka! Mahilakaramo to no'oha i dunia, habana ratawuirami tolu malaeka ntanina ee tarompera.”