To Israel to laimere wingkera
7
1 Napu ee laihiloku opo dua malaeka nokangkore i opo huno dunia notaha opo ngolu dunia, bona nemo maria ngolu mantawiri i lorena ba i tahi ba i kau-kau. 2 Pade laihiloku hadua malaeka ntanina nehuwu lako mali mataeo nangkeni pomere Alatala to natuwu, pade nongare'i nangulikara opo dua malaeka to laiwai baraka mampakagero dunia pade tahi. 3 Malaeka ee nanguli iwei, “Nemo olu mipakagero dunia ba tahi ba kau-kau, kapomana kimere wingkera batua Alatalata!” 4 Pade iepeku kadeara to laimere ee mai, hatu opo mpulu opo ncobu dua lako muli hampulu rodua ana Yakub to laiuli to Israel.5 Lako muli Yehuda hampulu roncobu dua to laimere,
lako muli Ruben hampulu roncobu dua,
lako muli Gad hampulu roncobu dua,
6 lako muli Asyer hampulu roncobu dua,
lako muli Naftali hampulu roncobu dua,
lako muli Manasye hampulu roncobu dua,
7 lako muli Simeon hampulu roncobu dua,
lako muli Lewi hampulu roncobu dua,
lako muli Isakhar hampulu roncobu dua,
8 lako muli Zebulon hampulu roncobu dua,
lako muli Yusuf hampulu roncobu dua,
lako muli Benyamin hampulu roncobu dua.
Todea to nampake waru to nabula
9 Napu ee laihiloku mui hangu kahiromua bohe tauna to moma namala laibila kadeara, lako humawee ngata pade muli pade hampo'ompia pade baha i dunia, nokangkore i tingoo poncunaa magau pade i tingoo Ana Bimba, nampake waru to nabula pade nangkakamu tawe-tawe palem. 10 Pade nongarera nanguli iwei,
“Kahalamaa narata lako Alatala kami
to noncuna i poncunaa magau
pade lako Ana Bimba!”
11 Pade humawee malaeka nokangkore natiku i poncunaa magau, to pangkeni-to pangkeni pade opo to natuwu to ewa tari binata ee mai. Notingkodura i tingoo poncunaa magau ee mai nampasombaa Alatala, 12 nanguli iwei,
“Amin!
Laiune kami-Ko Pue Alatala kami,
laipemabohe kami hanga-Mu,
laipolinga kami kanoto-Mu,
nosukuru kami hi Iko,
laibila kami-Ko,
laitutura kami karoho-Mu pade kabaraka-Mu
welau ei duu kahae-haena,
Amin!”
13 Pade hadua lako to pangkeni eera mai nampekune'a, “Hemara to nampake waru to nabula lauria pade lako rimara?”
14 Nehono'a hi hia iwei, “Moma ncaniku tuama. Iko moto to nangincani.”
Lauparia iulikana'a iwei, “Hira ei mai tauna to nehuwu lako kahehaa bohe. Laitopohirami warura pade laipakabulara hante raa Ana Bimba. 15 Etu pade nokangkorera i tingoo poncunaa Alatala pade nampalayani-'I eona bo bengina i rara Hou-Na to Nagaha. Pade Hia to noncuna i poncunaa magau ee mai narata dohera bona mampodoora. 16 Momaramo maoro ba mabai wuura. Pade kapane eo mpoeo lia momami rarasaira. 17 Habana Ana Bimba to i lentongo poncunaa magau ee mai mampaewura pade mopanuntura rau i mata ue katuwua. Pade Alatala mampurihi humawee ue matara.”