Ana Bimba nolali ono segel
6
1 Napu ee laihiloku Ana Bimba ee mai nolali segel to pamulana lako papitu segel ee mai. Iepeku hadua lako opo to natuwu to ewa tari binata ee mai nojarita narimboho ewa moni guru nanguli iwei, “Maimoko!” 2 Laihiloku naria hamaa jara to nabula. Jara ee laihawi hadua tauna to nangkakamu hamata parewa pohiwali, pade hi hia laiwaika hangu tali patoko. Hia ee halaku to pedagi rau i dunia mampadagira humawee balina.3 Pade hangka Ana Bimba ee mai nolali segel karonguna, laiepeku to ewa tari binata karonguna nanguli iwei, “Maimoko!” 4 Lauparia nehuwu mui hamaa jara ntanina to nalei jore pade to nencawi jara ee mai laiwaika baraka mampakaronto pohingkabelo i dunia bona tauna i dunia momepatehi. Pade laiwaika mui'i hamata tono lampa to nabohe.
5 Polali-Na Ana Bimba ee mai segel katoluna, iepeku to ewa tari binata katoluna nanguli iwei, “Maimoko!” Pade laihiloku naria hamaa jara to nawuri pade to nencawi jara ee nangkakamu hangu daci potimba. 6 Pade iepeku ewa naria to pojarita lako lentongora opo to natuwu to ewa tari binata ee mai nanguli iwei, “Halite labu gando nahibali hante tomo tauna nobago haeo, pade tolu lite labu jelai nahibali hante tomo tauna nobago haeo moto mui. Naupawee nemo rapakagero pampa zaitun bo pampa anggur.”
7 Napu ee Ana Bimba ee mai nolali segel kaopona pade iepeku to ewa tari binata kaopona nanguli iwei, “Maimoko!” 8 Pade laihiloku naria hamaa jara to narangkuni. Tauna to nencawi jara ee mai hangana Kamatea, pade naria to nantuku'i, to laiuli Po'ohaara to Mate. Hi hira to rodua ee mai laiwaika baraka mepatehi i hangu bagia lako opo bagia dunia hante tono lampa, oro mpai, haki bohe pade binata-binata to nekoni.
9 Napu ee Ana Bimba ee mai nolali segel ka'alimana. Laihiloku i une meja pantunua kurban naria waora to laipatehi habana nangkarebai lolita Alatala pade nohabi nangkambelai peparahayara hi Yesus. 10 Inoha-inoha ee mai nongare nanguli iwei, “Oo Pue to Nabaraka, to nagaha pade nakono, hangkuapi kahaena pade Mubotuhi bo Mubalahika kami tauna to nampatehi kami?” 11 Pade hore-horera laiwaika hantau waru to nabula. Laiulikara bona hangonirapa mo'oha duuna magana kadea doo hampobagoara bo ompi-ompira to hangu kaparahayaa to rapatehi nahibali hante hira.
12 Napu ee laihiloku Ana Bimba ee mai nolali segel kaonona. Polali-Na segel ee, nadupami linu bohe, eo nawali nawuri ewa kae to nawuri, pade wula nawali nalei ewa raa. 13 Pade betue-betue i langi narona i dunia ewa wua kau ara to namata narona tempona laitawiri ngolu bohe. 14 Lauparia natelulumi langi ewa buku to lailulu pade bulu-bulu bo lewuto-lewuto noencu lako katidaara.
15 Tempo ee magau-magau i dunia, hira to napangkaa, hira komandaa tantara, hira to nahugi, pade hira maradika bo humawee batua pade hira to moma laipobatua, nentaleru i rara gua-gua bo i olo-olo watu i bulu. 16 Pade hira nangulika bulu-bulu bo watu-watu to i bulu ee mai, “Katorimo mamparumpihi kami pade lerumo kami lako hi Hia to noncuna i poncunaa magau pade lako hodo Ana Bimba etu mai. 17 Habana naratami eo kahudua dunia to nepaekai, tempo Alatala pade Ana Bimba mampopehuwu hodoRa. Moma hema haduaa mampabuku mantingohi pehukuRa.”