Buku to laisegel pade Ana Bimba
5
1 Pade laihiloku i pale kana Tauna to noncuna i poncunaa magau ee mai, halulu buku to laitulihi mali rarana pade mali hawalikuna pade laisegel hante papitu segel. 2 Pade laihiloku hadua malaeka to naroho, nongare narimboho nanguli iwei, “Hema to mahipato molali papitu segel pade mobole buku to lailulu ee mai?” 3 Naupawee moma hema to i huruga ba to i dunia, ba to i une dunia, to mamala mobole buku to lailulu ee mai pade to mamala mampahilo mali rarana. 4 Lauparia, najuu mpuu raraku pade nakeo'amo, apa moma hema to mahipato mobole buku to lailulu ee mai ba mampahilo mali rarana. 5 Nojaritami hadua lako to pangkeni ee mai hi aku, “Nemoko makeo! Hilo, Singa lako muli Yehuda nopabetami. Hia ee mai muli Magau Daud. Hia to mamala molali papitu segel pade mobole buku to lailulu ee mai.”6 Napu ee laihiloku hamaa Ana Bimba nokangkore i lentongo poncunaa magau ee mai, laipalentongoira opo to natuwu to ewa tari binata pade hira to pangkeni ee mai. Laihiloku Ana Bimba ee mai ewa naria walea pohamalea-'I. Papitu tonu-Na pade papitu mata-Na. Papitu mata-Na ee, namparapaika papitu Inoha Alatala to laihuro rau i humangkulili dunia. 7 Lauparia naratami Ana Bimba ee mai pade nantarima buku to lailulu ee mai lako pale kana Tauna to noncuna i poncunaa magau ee mai. 8 Pangala-Na buku ee mai, notingkoduramo opo to natuwu to ewa tari binata pade rompulu opo dua to pangkeni ee mai i tingoo Ana Bimba ee. Hore-horera nangkakamu hangu kahapi pade hangu mangko bulawa, naponu hante dupa. Dupa ee mai namparapaika hambayara todea Alatala. 9 Pade laipouliara hangu ulia to nabou, iwei,
“Iko mahipato mantarima buku to lailulu etu
pade molali papitu segelna,
apa laihamalemo-Ko
pade hante raa-Mu laitolohi-Muramo todea-Mu
lako butu muli, butu baha, butu hampo'ompia pade butu ngata,
bona mawali jumaa Alatala.
10 Laipahiromu-Muramo nawali todea i rara poparentaa-Mu,
pade laiongko-Mura nawali imam-imam Alatalata,
pade hira mei moparenta halaku magau i dunia.”
11 Napu ee laihiloku mui pade iepeku nojaritaramo malaeka to moma natebila kadeara. Malaeka eera mai nokangkore i humangkulili poncunaa magau pade i humangkulilira to natuwu to ewa tari binata bo to pangkeni eera. 12 Hante narimboho pojaritara nanguli iwei,
“Ana Bimba to laihamale mahipato raune baraka-Na bo kahugia-Na bo noto-Na bo roho-Na.
Hiami to mahipato rabila, rapemabohe pade raune!”
13 Napu ee iepeku humawee to natuwu i huruga pade to i dunia pade to i une dunia pade to i tahi hingkani-ngkani nanguli iwei,
“Iko to noncuna i poncunaa magau pade Iko Ana Bimba,
mahipato Komi raune, rabila bo rapemabohe,
pade nabaraka Komi duu kahae-haena!”
14 Lauparia opo to natuwu to ewa tari binata ee mai nanguli, “Amin.” Pade to pangkeni-to pangkeni ee mai notingkodu nesombaa.