Poncunaa Alatala i huruga
4
1 Napu ee laihiloku mui, naria hangu womo natebea i huruga pade laiepeku to pojarita ewa moni tarompe to iepeku wei, nangulika'a iwei, “Pengkahemoko tumai bona Kupahiloiko napa mei to kana madupa mapu ei.” 2 Ngkali naponu hante Inoha to Nagaha'amo, pade laihiloku i huruga naria hangu poncunaa magau pade i poncunaa ee mai noncuna hadua Tauna. 3 Tauna ee newanta ewa watu yaspis pade watu sardis, pade hangu tereue to neringkila ewa zamrud nampalilikohi poncunaa magau ee mai. 4 Pade natiku i poncunaa magau ee mai, naria rompulu opo poncunaa kamagaua laiponcunai rompulu opo dua to pangkeni to nowaru nabula pade notali patoko bulawa i woora. 5 Pade lako poncunaa magau ee mai nehuwu kila pade moni berehe to narimboho, pade papitu hulu nabaa i tingoo poncunaa magau ee mai. Eemi papitu Inoha Alatala. 6 Pade i tingoo poncunaa magau ee mui mai naria to ewa tahi to laibabei lako kaca neringkila ewa kristal.I humangkulili poncunaa magau ee naria opo to natuwu to ewa tari binata to naponu hante mata mali tingoora bo mali talikuara. 7 To pamulana ewa singa, pade to karonguna ewa japi tuama, pade to katoluna lencena ewa lence manuhia, pade to kaopona nahibali hante tonci lowe to bulana neworo. 8 Pade opo to natuwu to ewa tari binata eera mai hore-hore nokapi ono, natiku kapira pade mali rara kapira naponu hante mata, pade momara naria nentuu noulia butu eo bo bengina, iulira,
“Nagaha, nagaha, nagahami Pue, Alatala to Nabaraka,
to naria amimi lako pamulana, to naria welau ei pade to maria oa duu kahae-haena.”
9 Pade butu ngkanira to natuwu to ewa tari binata ee mai nampaune, nampemabohe pade nosukuru hi Hia to noncuna i poncunaa magau ee mai to natuwu duu kahae-haena, 10 rompulu opo dua to pangkeni ee mai notingkodu i tingoo Tauna to noncuna i poncunaa magau ee mai, pade hira nampasombaa-'I to natuwu duu kahae-haena. Laibolira tali patokora i tingoo poncunaa magau ee mai, pade nanguli iwei,
11 “Oo Pue pade Alatala kami,
mahipato-Ko mantarima peune, pebila pade baraka,
habana laipajadi-Mumi hangu hangaa.
Humaweena lauria naria pade laipajadi nantuku dota-Mu.”