Hura rau hi jumaa i Sardis
3
1 “Pade tulihimi hi malaeka to nampodoo jumaa i Sardis, iwei:Eimi lolita lako hi Hia to nangkami papitu Inoha Alatala pade papitu betue ee mai.
Laincani-Ku humawee pokaingkumi. Komi etu laihilo tauna natuwu, bo kakonona namatemo komi! 2 Pematamo pade pakoroho peparahayami to nariadipi to parami mamate, habana moma naria hangua ingkumi to lairata-Ku mpuu-mpuu nakono i tingoo Alatala. 3 Aji linga belo bewa komi nantarima pade nangepe popatudu. Turuhimi ee pade kancoromo! Apa ane moma komi mainga, marata-'A mei ewa to pangio, pade moma'i mincani bulauma-'A marata hi komi.
4 Naupawee i Sardis naria bahangkua dua to moma nampakawata warura. Hira mei momako hante Aku mampake waru to nabula, habana mahipatora ewa ee. 5 Hema to mopabeta, hia mei mampake waru to nabula ewa ee mai. Moma'i Kupakaronto hangana lako rara Buku Katuwua. Naupawee Kupangaku'i halaku to pantuku-Ku i tingoo Tuama-Ku pade i tingoora malaeka-Na. 6 Hema to natalingaa, epe belo napa to laiuli Inoha to Nagaha hi jumaa-jumaa.
Hura rau hi jumaa i Filadelfia
7 Pade tulihimi hi malaeka to nampodoo jumaa i Filadelfia, iwei:
Eimi lolita lako hi Hia to Nagaha bo to Nakono. Hiami to nangkakamu kunci poparentaa Magau Daud. Ane Hia mobea, moma hema to mamala mowunta. Ane Hia mowunta, moma hema to mamala mobea.
8 Laincani-Ku humawee pokaingkumi. Hilomi, laibeaka-Kumo komi womo to moma hema mamala mowunta. Laincani-Ku ane karohomi moma'i hangkuana, naupawee komi nanturuhi lolita-Ku pade moma-'A laipehapukami. 9 Hilomi bahangkua duara lako jumaa Magau Heta. Hira ee mai to nangaku ane to Yahudira, naupawee moma nakono, nokalowora. Kupopewaira mei hi komi. Kutudura mei marata pade motingkodu i paami pade mangaku ane Aku nampotowe komi. 10 Kupotolawai komi mei tempo pehehakia to marata mampehori humawee manuhia i dunia, apa natigu komi nampopea-'A ewa to laiparentaka-Ku komi.
11 Moma-'Amo mahae marata. Kakamumi napa to naria hi komi, bona nemo maria to mamparampaki tomo to laiwaika-Ku komi halaku tauna to nopabeta. 12 Hema to mopabeta, hia mei Kuongko mawali tinca i rara Hou Alatala-Ku, pade mo'oha'imi i hee duu kahae-haena. Pade i wotona Kutulihi hanga Alatala-Ku, hanga ngata Alatala-Ku, etumi Yerusalem bou to nehompo lako huruga lako Alatala-Ku, pade hanga-Ku to nabou. 13 Hema to natalingaa, epe belo napa to laiuli Inoha to Nagaha hi jumaa-jumaa.
Hura rau hi jumaa i Laodikia
14 Pade tulihimi hi malaeka to nampodoo jumaa i Laodikia, iwei:
Eimi lolita lako hi Hia to laikahangai Amin, batuana: Habi to natigu bo nakono. Hante Hiami Alatala nopajadi langi bo dunia.
15 Laincani-Ku humawee pokaingkumi. Moma komi nalengi, moma mui komi napane. Nabelo mpuu ane ke nalengi ba napane komi! 16 Aji apa naomu moto komi, moma komi nalengi ba napane, Kulua komi lako rara nganga-Ku. 17 Komi nanguli, ‘Nahugi kami pade nagana katuwu kami, moma kami nakakuraa napa-napa.’ Naupawee moma incanimi ane netowei mpuu katuwumi, mahipato komi ratulungi, nakahiahi komi, naburo pade noleno. 18 Aji, Kupatudu komi bona mioli lako hi Aku bulawa to napumi laipakagaha hante apu, bona mahugi komi. Oli mui waru to nabula lako hi Aku mipowaru, bona nemo rahilo polenomi to nepakaea. Pade oli mui lana mipake mampakagaha matami, bona mamala komi menaa.
19 Hema to laipotowe-Ku, hia Kukamaro pade Kuweba. Etumo nemopi makoo rarami, kancoromo! 20 Hilo, Aku nokangkore i tingoo womo pade nokado. Ane maria to mangepe-'A nekio pade mobeaka-'A womo, mehua-'A mampotomuka'i pade mangkoni-'A hante hia, pade hia hante Aku.