Hura rau hi jumaa i Efesus
2
1 “Tulihimi hi malaeka to nampodoo jumaa i Efesus, iwei:Eimi lolita lako hi Hia, to nangkakamu papitu betue i pale kana-Na pade nomako i lentongo papitu pobolia poindo bulawa.
2 Laincani-Ku humawee pokaingkumi, belo pobago ntomomi, belo mui pohabarami laihehaki. Laincani-Ku ane moma komi nampalelera tauna to nadaa ingkura. Pade tau-tauna to nangaku ane hira ee mai rasul bo momara rasul, laipehorimiramo pade lairatami ane hira ee nokalowo. 3 Batena moto komi nohabara pade naheha habana nantuku Aku, pade moma nalente peparahayami.
4 Naupawee, laihalai-Ku komi, apa towemi momami ewa to pamulana. 5 Etumo kana milinga ane nandala mpuumo komi nanawu! Kancoromo pade poingkumo ewa ingkumi to pamulana. Apa ane moma iwee, marata-'A mei hi komi pade Kuala pobolia poindomi, ane moma komi mancoro. 6 Naupawee ei to naria hi komi, laipodaami ingkura to pantuku Nikolaus. Wee moto mui Aku, nampodaa ingkura.
7 Hema to natalingaa, epe belo napa to laiuli Inoha to Nagaha hi jumaa-jumaa. Hema to mopabeta, hia mei Kupakoni lako wua kau katuwua to natuwu i Firdaus Alatala.
Hura rau hi jumaa i Smirna
8 Pade tulihimi hi malaeka to nampodoo jumaa i Smirna, iwei:
Eimi lolita lako Hia to laiuli to Pamulana bo to Kahuduana, to namate pade natuwu nculi.
9 Laincani-Ku naheha komi pade nakahiahi, naupawee nahugi komi. Laincani-Ku ane moma nakono humawee pepakudaa to iulira to nangaku to Yahudi nangkambelai komi. Hira ee mai kakonona jumaa Magau Heta. 10 Nemo maeka hante kahehaa to kana mikolo! Kakonona Magau Heta mei mopahua bahangkua dua lako hi komi i rara tarungku bona rapehori komi, pade maheha komi hampulu eo kahaena. Kana matigu komi duumi mamate. Pade Kupopewai mei hi komi katuwua to moma maria kahuduana halaku tomo popabetami.
11 Hema to natalingaa, epe belo napa to laiuli Inoha to Nagaha hi jumaa-jumaa. Hema to mopabeta, kahehaa kamatea karongkanina moma mei madupa hi hia.
Hura rau hi jumaa i Pergamus
12 Pade tulihimi hi malaeka to nampodoo jumaa i Pergamus, iwei:
Eimi lolita lako hi Hia to naria tono lampa-Na to natada pade nomata ntimalia.
13 Laincani-Ku i rima komi no'oha. Ngata po'ohaami etu, poncunaa Magau Heta noparenta. Naupawee natigu moto komi hi Aku, pade moma laipehapukami ane neparahaya komi hi Aku, naupa Antipas habi-Ku to natigu laipatehi i rara ngatami, po'ohaa Magau Heta.
14 Naupawee naria bahangkua ngaa ingkumi to moma laipokono-Ku. Naria bahangkua dua lako hi komi to nantuku patudu Bileam. Bileam ee mai to nopatudu Balak mopahalatarara to Israel, bona to Israel eera mai mantuku todea Balak nangkoni pangkoni to laikeni nepue hi Pue ntanina pade mobabei pogau hala. 15 Naria mui komi to nantuku patudu to pantuku Nikolaus. 16 Etumo, kancoromo komi! Apa ane moma komi mancoro, marata-'A mei hi komi pade mampohiwalika komi to nantuku patudu to moma nakono ee hante tono lampa to naria i ngudu-Ku ei.
17 Hema to natalingaa, epe belo napa to laiuli Inoha to Nagaha hi jumaa-jumaa. Hema to mopabeta, hia mei Kuwaika manna to lailerua. Kuwaika mui'i mei watu to nabula to laipotulihii hanga bou, to moma hema haduaa nangincani, wuwu to nantarima aga.
Hura rau hi jumaa i Tiatira
18 Pade tulihimi hi malaeka to nampodoo jumaa i Tiatira, iwei:
Eimi lolita Ana Alatala, to mata-Na ewa baa apu pade paa-Na ewa tambaga. 19 Laincani-Ku humawee pokaingkumi. Belo towemi, belo peparahayami hi Aku, bewa pometulungimi hadua bo hadua, pade bewa pohabarami i rara kahehaa. Laincani-Ku mui ane nadeapi to laipobagomi welau ei lako to laipobagomi pamulana.
20 Naupawee laihalai-Ku komi, apa laipalelemi hadua bangkele to laikahangai Izebel, to nangaku ane hia nabi, to nopatudu pade nopahalatara batua-batua-Ku bona mogau halara pade nangkoni pangkoni to laikeni nepue hi Pue ntanina. 21 Laiwai-Kumi loga bona mancoro'i lako pogau halana, naupawee moma'i nadota nancoro. 22 Hilo motomi, Kupopepana'i mei i lolo poturua to pohaki, pade hira to nogau hala hante hia Kupopepana i rara kahehaa bohe, ane momara mancoro lako ingkura to nahibali hante bangkele ee mai. 23 Pade hira to pantukuna Kupatehi, pade humawee jumaa mei mangincani ane Akumi to nangincani pampekiri bo rara tauna, pade Kubalahi butu tauna mantuku ingkuna moto.
24 Naupawee hi komi to ntanina i Tiatira, to moma nantuku patudu ee mai pade to moma nampegurui to laiuli tauna ‘pangincani-pangincani Magau Heta to laileru,’ Ku'ulika komi, moma-'A madota mampatambai pangkolomi. 25 Naupawee, napa to naria hi komi, kakamumi etu duu karata nculi-Ku.
26 Hema to mopabeta pade mampobago bago-Ku duu kahuduana, hia mei Kuwai baraka moparenta ngata-ngata ntanina. 27 Hia mei moparentara hante rohona to ewa karoho lua ahe, pade mampakarutura ewa kura tana. Baraka to Kuwaika'i nahibali hante to laitarima-Ku lako hi Tuama-Ku. 28 Pade Kuwai mui'i mei betue to nehuwu parabaa. 29 Hema to natalingaa, epe belo napa to laiuli Inoha to Nagaha hi jumaa-jumaa.”