Pehiloa Yohanes
Jarita pamulana nangkambelai ihi buku ei
1
1 Ihi buku ei nangkambelai kajadia-kajadia to kana madupa to laikewo Alatala hi Yesus Kristus bona Napahiloira batua-Na napa to momami mahae kana madupa. Yesus nampahuro malaeka-Na, nampahiloi humaweena ee hi Yohanes batua-Na. 2 Yohanes nampotutura humawee to laihilona. Laitulihina humawee peboha Alatala pade kajadia-kajadia to laipahiloi Yesus Kristus hi hia. 3 Morahimi tauna to mobaha pade hira to mangepe peboha Alatala ei, pade manturuhi napa to laitulihi i rarana, habana humawee to laitulihi i rara buku ei momami mahae madupa.Tabe hi papitu jumaa
4 Tabe lako hi aku, Yohanes, rau hi papitu jumaa to i propinsi Asia. Mohambaya'a bona Alatala to naria amimi lako pamulana, to naria tempo ei, pade to maria oa duu kahae-haena mampawaika komi kabohe towe-Na bo katuwu to nanone. Kabohe towe bo katuwu to nanone ee mui mitarima lako papitu inoha to i tingoo poncunaa Alatala, 5 pade lako Yesus Kristus, habi to mamala raparahaya, to pamulana ntoto natuwu nculi lako lentongora to mate, pade to noparenta humawee magau i dunia ei. Hia nampotoweta pade nampabakahata lako dohata hante raa-Na. 6 Laipakawali-Na todea-Natamo i rara poparentaa-Na pade laiongko-Natamo nawali imam-imam Alatala, Tuama-Na. Yesus Kristus eemi to nabaraka pade mahipato rapemabohe duu kahae-haena. Amin.
7 Hilo, narata-'Imi i lolo gawu pade humawee tauna mampanaa-'I, wee mui hira to nampatohu-'I hante tawala. Humawee ngata i dunia makeo motantangi habana Hia to narata ee. Ei mai mpuu-mpuu kana madupa. Amin.
8 Pue Alatala nololita iwei, “Akumi to pamulana pade to kahuduana. Akumi to naria ami lako pamulana, to naria tempo ei, pade to maria oa duu kahae-haena. Akumi to Nabaraka.”
Ana Manuhia nerawa rara pehiloa Yohanes
9 Aku ei mai Yohanes, ompimi hangu kaparahayaa. Nahibali hante komi, aku mui laihehaki, aku mui nawali todea poparentaa Alatala, pade aku mui nohabara tempoku laihehaki habana nohangu rara hante Yesus. Aku laiencu i lewuto Patmos habana noparata lolita Alatala pade pohabi to laiuli Yesus. 10 Tempo eo Pepuea, aku naponu hante Inoha to Nagaha pade laiepeku lako talikuaku to nojarita narimboho, ewa moni tarompe. 11 To pojarita ee mai nanguli iwei, “Napa to ihilomu, tulihimi rara buku pade pakatu rau hi papitu jumaa ei: i Efesus, i Smirna, i Pergamus, i Tiatira, i Sardis, i Filadelfia pade i Laodikia.”
12 Pangepeku lauria, neili'a mangkahilo hema to nojarita hi aku. Hangka laipeiliku, laihiloku naria papitu pobolia poindo to laibabei lako bulawa. 13 Pade i lentongo pobolia poindo ee mai naria ihiloku hadua to ewa Ana Manuhia, nowaru nalanga rata paa-Na, pade bamara-Na nampohabea kae lako bulawa. 14 Wulua-Na nabula ewa kabula wulu bimba, pade mata-Na ewa baa apu. 15 Pade paa-Na neringkila ewa tambaga to nabaa rara popapuhia, pade pojarita-Na ewa moni ue mowo. 16 Pade i pale kana-Na laikakamu-Na papitu betue, pade lako ngudu-Na nehuwu hamata tono lampa to natada ntimalia, pade lence-Na nabaa ewa eo neino mpoeo lia.
17 Hangka laihiloku-'I, nadungka'a i tingoo paa-Na ewa to mate. Naupawee laidama-Na'a hante pale kana-Na, pade iuli-Na, “Nemo maeka! Aku ei to pamulana bo to kahuduana, 18 pade to natuwu. Namate-'Amo, naupawee hilo motomi, natuwu-'A duu kahae-haena. Pade laikakamu-Ku humawee pobihoki kamatea pade Po'ohaara to Mate. 19 Etumo, tulihimi humawee to ihilomu, belo to nadupa tempo ei mai, belo mui to madupa i eo ngkapurina mei. 20 Papitu betue to laihilomu i pale kana-Ku pade papitu pobolia poindo bulawa ee mai laipopaleruidipi batuana hi iko. Aji, Kukewokamoko batuana. Papitu betue ee mai malaekara papitu jumaa, pade papitu pobolia poindo ee mai papitu jumaa ee.”