Hura to Laitulihi Yudas
Tabe
1
1 Lako Yudas, batua Yesus Kristus, ompi Yakobus. Hura ei laipakatuku hi komi ompi-ompi to laipelihi bo laipotowe Alatala Tuama, pade to laijagai-Na duu karata nculi Yesus Kristus karongkanina. 2 Mohambaya'a bona ahi rara, katuwu to nanone pade towe Alatala mampodohe moto oa komi hante pelabi-labina.Pehuku to ratarimara to nobaliki ihi patudu Kareba Belo
3 Ompi-ompi to laipotoweku, mingki mpuu'a motulihi hura hi komi nangkambelai kahalamaata pura. Naupawee nangepe napa to nadupa, pekiriku paraluu kutulihi hura ei hi komi mampakaroho rarami bona mipehimukui mpuu mampaewa tauna to madota mobaliki kaparahayaata nangkambelai Yesus to laipopewai-Nami Alatala hi todea-Na pade moma mamala rabaliki. 4 Apa nariaramo tauna to nehua bongo dohemi. Lako owi, tauna eera mai laipakatantu amiramo rahuku. Hira ee mai kakonona momara neparahaya hi Pue. Laibalikira patudu nangkambelai kabohe towe Alatala hante nanguli moma mongkua mogau hala apa natowe-'I Alatala hi kita pade momata Nahuku. Pade laihapuakara ane hadua Yesus Kristus aga Magau bo Pueta.
5 Kana kupalingai moto komi naupa laincanimimi ane Pue nampakahalama todea to Israel lako Mesir, naupawee eo ngkapurina to moma neparahaya laipakaropu-Na. 6 Linga mui, malaeka to momara neturuhi, to nampaliu katoa baraka to laiwaika-Nara Pue pade nampalahi po'ohaara. Pue nampatarungkura pade nampahilura hante rante to moma mamala rabakaha i rara dunia to nalimau duu eo pobotuhia. 7 Malaeka-malaeka ee nahibali ingkura hante Sodom pade Gomora pade ngata-ngata i humangkulilina to nogau hala pade nodapa kaohaa rara to moma nahipato. Laihukura hante apu to moma maria kaoraa baana duu kahae-haena bona mawali pepalingai hi humawee tauna.
8 Wetu moto muira tauna to nehua hi komi etu, iulira naria pangipira to laitarimara lako Alatala bo moma'i nakono. Pangipira ee mai laipotancera nobabei pogau hala to nampakarumu wotora moto, nampahapuaka baraka Alatala pade nampopore humawee inoha to nabaraka i huruga. 9 Kapala malaeka moto, to ikahangai Mikhael, moma'i naria nobabei ingku ewa hira ee mai. Tempona nonehono hante Magau Heta nampomealai wataloka Musa, moma'i nabia Mikhael namparai Magau Heta ee hante baha to nepopore. Wule ei aga iulina, “Kuperapi Pue mampokahodoko.” 10 Naupawee tauna to nehua bongo etura nampopore hangu hangaa to kakonona moma incanira. Hira etu mai nahibali hante binata-binata to momara nampekiri, wule nantuku dota rarara, etumi habana pade rapakaropura. 11 Mahilakaramo tauna etu! Habana dala to laitara Kain laitukura. Nahibalira hante Bileam, to bona mamparata doi nadota'i nobabei ingku to nadaa. Pade hira etu mai laipakaropu habana nampaewa Alatala ewa Korah. 12 Tempomi nangkoni hingkani-ngkani rara kahiromua jumaa, hipara negigii mporara habana moma naria eara nangkoni hante kadokora pade nampomaihi wotora moto. Hira etu mai nahibali hante gawu to laitawiri ngolu, hampena moma naria uda nanau. Nahibali muira hante kau to moma naria wuana naupa tempo powuaa kau. Namate mpuuramo ewa kau to natewuka hante larina. 13 Hira etu ewa balumba tahi to nabohe pade nadea wurana to nakotoro, wule nampahiloi ingku-ingkura to nepakaea. Nahibali muira hante betue to tabubua pomakoana i langi, to laipakatantu amiramo raboli i kalimauana duu kahae-haena. 14 Owi, naria amimi peboha Alatala laiuli Henokh, muli kapapitu Adam iwei, “Kakonona Pue marata hante nadea ncobu malaeka-Na, 15 mampabotuhi humawee tauna pade mampahukura humawee tauna to moma neparahaya hi Alatala pade nadoha habana ingkura to nadaa, pade habana humawee to iulira nampaewa bo nampopore Pue.”
16 Tauna to moma neparahaya hi Alatala etu, bagora nangkaranguhi oa aga pade nampahalai doo. Natuwura nantuku dota rarara moto pade nahombo jaritara. Laipokonora nampatende tauna bona rawaikara napa to laipodota rarara.
Patudu bona momepakaroho peparahaya
17 Naupawee komi ompi-ompi to laipotoweku, kana milinga moto napa to ilodo laiulikara komi rasul-rasul Pueta, Yesus Kristus. 18 Apa iulikara amimo komi rasul, “I eo lau kahudua dunia mei, mariara tauna to mampopore komi. Tauna eera mai matuwu mantuku dota rarara to nadoha.” 19 Hira etumi to nampakagero hintuwumi. Moma naria Inoha to Nagaha rara katuwura, wuwu ingku to nampomaihi dunia ei aga. 20 Naupawee komi ompi-ompi to laipotoweku, momepakaroho moto oa komi bona miparahaya mpuu patudu to nagaha to laiparata hi komi. Pade mohambaya moto oa komi hante petulungi Inoha to Nagaha. 21 Batena moto oa komi matuwu mampalinga pampotowe-Na komi Alatala, bulami nampopea ahi rara Yesus Kristus Pueta to mampawaikata katuwua to moma maria kahuduana. 22 Kana ma'ahi rarami hi tauna to nokarara peparahayara. 23 Dungku tulungi muira tauna to nahalatara kaparahayaara bona mahalamara, ewa pampadiimi tauna lako rara apu. Kana ma'ahi mui rarami hi tau-tau ntanina naupawee nemo mituku ingkura to nadaa. Podaa ingkura to laipakakotoro dota rara to nadaa.
Peune hi Alatala
24 Raunemi Alatala habana nabaraka-'I nampodoo komi bona nemo komi megoli lako kaparahayaami, pade mangkeni komi i tingoo kabohe baraka-Na hante moma makahalaia pade magoe mpuu rarami. 25 Hia aga Alatala, to nampakahalamata hante raa Yesus Kristus, Pueta. Hiami Alatala to nabaraka pade laikatongko lako owi, to mahipato rapemabohe pade rabila, welau ei, duu kahae-haena! Amin.