Hura rau hi to Ibrani
Popailodoa
Hura ei mai laitulihika hi to Yahudi, to nabiaha laiuli to Ibrani. Hira ee mai to neparahayaramo hi Yesus. Moma laincani hema to notulihi hura ei mai, apa moma naria laitulihina hangana. To laincani, to notulihi hura ei mai hadua to neparahaya hi Yesus pade nangincani mpuu ihi Buku Potipa to Nahae.
Ane tabaha ihi hura ei mai, tancanimi ane to Yahudi to neparahaya hi Yesus napepa iepera laihehaki, hampena nariara to negoli nculi nantuku agama Yahudi. Patuju hura ei mai laitulihi, mampakaroho rarara to Yahudi bona mantaha motora rahehaki pade nemora megoli lako peparahayara hi Yesus (2:1-4).
To potulihi hura ei mai nampakanoto potipa Alatala to nabou hante karata Yesus Kristus. Iulina rara hurana ei, ane potipa to nabou ee neliupi kabelona lako potipa to nahae to laitukura to Yahudi (8:1-13). Laipalingainara bona nemora megoli lako peparahayara hi Kristus, apa Alatala mei mampahuku humawee manuhia to nadaa ingkura (10:26-31).
Hura hi to Ibrani ei mai nampakanoto ane Yesus ee mai Ana Alatala to neliu kabaraka-Na lako Musa bo nabi-nabi ntanina (3:1-6), lako malaeka-malaeka Alatala (1:1-14) bo lako humawee to pangkeni to Yahudi owi. Yesus eemi to laiongko nawali Imam Bohe to neliu kabaraka-Na lako imam bohe to Yahudi (7:11-28). Hiami to nampatolohi doha manuhia hante nampopewai woto-Na laipatehi bo laisalib nampahambei manuhia to nadoha (9:12-15).
To potulihi hura ei mai nanguli bona marohota meparahaya hi Yesus pade nemota maeka hante pehehakia to tatarima (10:19-39). Pade nemota mentuu mampemabohe hanga Alatala bo moingku belo halaku tauna to neparahaya hi Yesus (13:15-16).
Ihi buku ei
1. Alatala nololita hi manuhia nampake ana-Na (1:1-4)
2. Neliupi kabaraka Yesus lako malaeka Alatala (1:1–2:18)
3. Neliupi kabaraka Yesus lako nabi Musa (3:1–4:13)
4. Yesus ee Imam Bohe to neliu kabaraka-Na lako imam bohe to Yahudi (4:14–7:28)
5. Kabelo pobago Yesus halaku Imam Bohe nelabipi lako kabelo pobagora imam bohe to Yahudi (8:1–10:18)
6. Patudu bona nemo mentuu meparahaya hi Kristus (10:19–12:29)
7. Patudu kahuduana pade tabe (13:1-25)