Yesus mahipato rabila melabi lako Musa
3
1 Ompi-ompi to laipelihi Alatala pade laikio-Na mehua i rara huruga, pekiri belo mpuu nangkambelai Yesus ei. Alatala moto to nantudu-'I nawali Rasul bo Imam Bohe rara agama to laitukuta. 2 Natigu-'I hi Alatala to nampelihi-'I nobago, nahibali hante Musa natigu'i nobago nantulungi todea to Yahudi, to lairapaika hou Alatala. 3 Naupawee mahipatopi Yesus rabila melabi lako Musa, nahibali hante kapala tuka hou, neliupi pampabila'i lako hou to laibabeina. 4 Apa butu hou laibabei hadua kapala tuka hou. Naupawee koro kapala tuka hangu hangaa Alatala aga. 5 Musa ee mai natigu nampobagoka Alatala nampatulungi todea-Na. Musa mamala rarapaika ewa hadua batua to natigu nampatulungi maradikana rara hou. Napa to laibabei Musa lauria, wule nampagambara napa to madupa i eo ngkapurina. 6 Naupawee, Kristus ee mai Ana Alatala, moma-'I batua. Natigu-'I nampobago bago-Na nampauruhi todea Alatala to lairapaika hou Alatala. Kita eimi tauna to lairapaika hou Alatala, ane maroho moto oa peparahaya bo peharumakata hi Yesus hante goe rarata.Nemo megoli lako peparahaya hi Alatala
7 Aji, pairara mpuu lolita Inoha to Nagaha to nanguli iwei,
“Ane welau ei miepe Alatala mojarita,
8 nemo mipakakoo rarami ewa tumpulokomi owi,
to nampaewa Alatala pade nampehori pohabara-Na i tongo mpada to nabai.
9 Naupa laihilorami humawee to laibabei-Ku opo mpulu mpae kahaena,
batena motora nampehori-'A.
10 Etu pade nahodo mpuu-'A hi hira,
pade iuli-Ku, ‘Nahalatara oadi rarara,
moma laituruhira parenta-parenta-Ku.’
11 Nahodo mpuu-'A hampena nosumpa, iuli-Ku,
moma amira Kupaliu mehua i pentuua to laipahadia-Ku hi hira pade mo'oha hingkani-ngkani hante Aku.”
12 Etumo ompi-ompiku, kana mainga komi, bona nemo maria lako hi komi to madaa rarana pade momami meparahaya, alaana megolimi lako peparahayana hi Alatala to natuwu. 13 Naupawee, pomepatudumo komi hadua bo hadua butu eona, lawina nariadipi loga “welau ei,” bona nemo maria lako hi komi to mawali makoo rarana habana laipatiwoo doha. 14 Apa kita ei mai, ane batena motota matigu duuta mamate rara kaparahayaata to pamulana, etu batuana lairatatami bagiata i rara Kristus. 15 Ewa to laitulihi i rara Buku to Nagaha iwei,
“Ane welau ei miepe Alatala mojarita,
nemo mipakakoo rarami ewa tumpulokomi owi,
to nampaewa Alatala.”
16 Hemara to nangepe Alatala nojarita pade ne'ewa hi Hia? Natantu amimi tauna to laipakeni Musa nehuwu lako Mesir. 17 Pade hema to laipakahodo Alatala opo mpulu mpae kahaena? Natantu amimi hira to nobabei doha pade to namateramo i tongo mpada to nabai. 18 Hemara to laiposumpaka Alatala momara Napaliu mehua i pentuua to laipahadia-Na pade mo'oha hingkani-ngkani hante Hia? Natantu amimi hira to ne'ewa hi Alatala. 19 Weemi to mamala tahilo, momara laipaliu-Na nehua i pentuua to laipahadia-Na, habana momara neparahaya hi Hia.