Pentuua to laipahadia Alatala
4
1 Ompi-ompi, duu ei laiwaika-Natadapa Alatala loga mehua i rara pentuua to laipahadia-Na. Etu pade kana mainga moto oata, bona nemo maria lako hi komi to moma mehua i rarana. 2 Apa kita ei, laiepetami Kareba Belo nahibali hante tumpulokota owi. Hi hira, kareba ee moma naria bununa, apa nau laiepera'i moma iparahayara. 3 Naupawee, kita to neparahaya mehua i pentuua to laipahadia Alatala ee mai. Bo nangkambelai tauna to moma neparahaya, Alatala nanguli iwei,“Nahodo mpuu-'A hampena nosumpa, iuli-Ku,
moma amira Kupaliu mehua i pentuua to laipahadia-Ku hi hira pade mo'oha hingkani-ngkani hante Aku.”
Alatala nanguli iwee, naupa kakonona nahudumi bago-Na nopahadia pentuua hinungkai dunia laipajadi-Na. 4 Apa nangkambelai eo kapapitu, naria laitulihi rara Buku to Nagaha iwei, “Nentuumi Alatala lako humawee bago-Na i eo kapapituna.” 5 Nangkambelai lauria, naria mui laitulihi rara Buku to Nagaha iwei, “Moma amira Kupaliu mehua i pentuua to laipahadia-Ku hi hira pade mo'oha hingkani-ngkani hante Aku.”
6 Hira to noilodoramo nangepe Kareba Belo ee, momara nehua i pentuua Alatala habana momara natigu neparahaya hi Hia. Naupawee patuju Alatala, kana maria mei tauna to mehua i pentuua to laipahadia-Na ee mai. 7 Etu pade Alatala nampakatantu mui eo ntanina bona manuhia mamala mentuu hingkani-ngkani hante Hia. Eo to laipakatantu Alatala ee mai, iuli-Na “welau ei,” apa bahangkua atu mpae lako nabi Musa, Magau Daud notulihi lolita Pue, to nanguli iwei,
“Ane welau ei miepe Alatala mojarita,
nemo mipakakoo rarami.”
8 Apa ane ke laikeninarapa Yosua nehua i pentuua to laipahadia ee, momami maria Nauli Alatala nangkambelai eo to ntanina. 9 Aji, hi todea Alatala nariadipi tipa bona mamala mentuu hingkani-ngkani hante Alatala. Lauria mamala rapahibali hante Alatala nentuu nobago i eo kapapituna. 10 Apa hema-hema to nehuami i pentuua to laipahadia Alatala, nentuumi lako humawee bagona, nahibali hante Alatala nentuu lako bago-Na. 11 Etumo, kana tapehimukui mpuu bona mamalata mehua i pentuua to laipahadia Alatala ee. Nemo maria haduaa lako hi kita to moma mamala mehua i pentuua to laipahadia Alatala ee, ewa tumpulokota owi habana momara natigu neparahaya hi Alatala.
12 Apa lolita Alatala ee natuwu bo nabaraka pade neliupi katadana lako tono lampa to nomata ntimalia. Lolita Alatala ee mai netohu duuna katoa pekirita bo inohata, pade duuna katoa unto wukuta bo lehoka wukuta. Pade lolita ee mai namala nobea bo nopareha pekirita pade patuju rarata. 13 Moma naria to natuwu i wongko dunia ei nateleru i tingoo Alatala. Apa humaweena narawa lainaa-Na pade kita kana mampangaku humawee ingkuta hi Hia.
Yesus ee Imam Bohe
14 Kita ei mai naria Imam Boheta to nengkahemi rau i huruga, Hiami Yesus Ana Alatala. Aji, kana maroho mpuuta mangkakamu kaparahayaa to ipangakuta ane Yesus ee Pueta. 15 Imam Boheta ee mai lairasai-Na muihawo kalentea-kalentea to lairasaita. Apa nahibali hante kita, Hia muihawo laipehori rara hangu hangaa, naupawee moma-'I nobabei doha. 16 Etumo, nemota maeka marata i tingoo Alatala to noparenta hante kabohe towe-Na, bona tatarima ahi rara-Na pade tarata kabohe towe-Na ane temponapi taparaluu.