5
1 Butu dua imam bohe laipelihi lako lentongora to Yahudi, pade laiongko nampobagoka Alatala. Bago imam bohe ee mai nojuju pewai-pewai pade kurban-kurban todea hi Alatala, bona dohara todea ee Na'ampuni. 2 Imam bohe ee mai nadea kalenteana. Etu pade nadole'i hi tauna to momara nengkao napa-napa pade to nahalatara. 3 Aji, ane imam bohe ee mojuju kurban hi Alatala mampakagaha doha todea, kana najuju mui kurban mampakagaha dohana moto. 4 Moma hema haduaa no'ongko wotona moto mawali imam bohe. Alatala to nampaongko tauna nawali imam bohe ewa to nadupa hi Harun.5 Wee moto mui Kristus. Moma laiongko-Na moto woto-Na nawali Imam Bohe. Alatala moto to nampaongko-'I nawali Imam Bohe, ewa to iulika-Na-'I rara Buku to Nagaha iwei,
“Ikomi Ana-Ku.
Welau ei Aku nawali Tuama-Mu.”
6 I bagia ntanina rara Buku to Nagaha, Alatala nololita iwei,
“Iko nawali Imam duu kahae-haena,
nahibali hante Imam Melkisedek.”
7 Rara katuwu Yesus halaku manuhia, naharo-'I nohambaya nerapi tulungi hi Alatala hante nakeo bo nekakai. Apa laiparahaya-Na ane Alatala mamala mampakahalama-'I lako kamatea. Alatala nangepe hambaya-Na habana natigu-'I nanturuhi Alatala. 8 Naupa Yesus ee mai Ana Alatala, laikolo-Na kahehaa, pade hante kahehaa-Na ee mai laipegurui-Na bewa manturuhi Alatala. 9 Naganapi humawee ee mai lairasai-Na, Hia nampawaika humawee tauna to nanturuhi-'I kahalamaa duu kahae-haena. 10 Pade Alatala nampaongko-'I nawali Imam Bohe nahibali hante Imam Melkisedek.
Pepalingai bona matuwu ewa hira to nantarima tipa Alatala
11 Kakonona, nadea ngaadipi to kana kiulika komi nangkambelai pobago Yesus halaku Imam Bohe. Naupawee nakoro nangulika komi, apa nalera gaga pampahami. 12 Apa ane rahilo lako kahaemi nawali to pantuku Yesus, mahipatomo komi mawali guru, naupawee paraluu oadipi mopatudu komi nangkambelai koropoko patudu lolita Alatala. Komi etu mai ewa ngana lei to nanginu ue huhu oadapa komi, poma komi namala nangkoni pangkoni to nakadu. 13 Apa hema-hema to nanginu ue huhudipi, moma'i laipahana patudu nangkambelai to nakono, habana hia ee mai ngana leidipi. 14 Naupawee tauna to naumururamo, pangkoni to nakadumi to kana rakonira, apa nabelomi pampekirira, ncanirami uma to nabelo pade uma to nadaa.