6
1 Etumo, nemotapa wuwu mampekiri patudu nangkambelai Kristus to pamulana aga. Kana tapeguruimi patudu kapolaana bona mantambai pampahata. Nemotapa manculiki mampegurui patudu pamulana nangkambelai kancoroa lako ingku to nadaa to moma nobunu bo patudu mamparahaya Alatala aga, 2 ba patudu nangkambelai ada popadiu, podama tanuana tauna, ba katuwu nculi tauna to namateramo bo pehuku duu kahae-haena. 3 Ane Napodota Alatala, aginatapa mampegurui kapolaa patudu nangkambelai Kristus.4 Habana nariara tauna to ilodo no'oha rara baa Alatalaramo pade lairasairami napa to laipopewai Alatala. Laitarimara muimi Inoha to Nagaha. 5 Laincanirami ane lolita Alatala ee mai nabelo, pade lairasairami baraka Alatala, to nahibali hante baraka to tarasai mei i dunia to nabou. 6 Naupawee negoliramo lako kaparahayaara. Momami naria dalana mopanuntura bona mancorora lako doha-dohara. Apa ane iwee, mamala rauli laisalibra nculimi Ana Alatala pade laipoporera-'I i tingoo todea.
7 Apa tauna namala rarapaika rongaa tana. Tana to hangaa, nohode oa ue uda pade nampakatuwu hinua to nobunu hi tauna to nampobago tana ee. Tana ee laitiroi Alatala. 8 Naupawee, tana karongaana laikatuwui dono pade dunumpu rui moto'i, hampena tana ee moma naria bununa. Tana ee mai momami mahae Nakamo Alatala, pade kahuduana mei kana rapapuhi.
9 Naupawee ompi-ompi to laipotoweku, naupa iuli kami ewa ee hi komi, laiparahaya kami mpuu ane moma komi ewa tana to moma naria bununa ee. Apa laincani kami mpuu ane naria poingkumi to neliu kabelona, etumi poingku to nahipato hi tauna to laipakahalama. 10 Alatala moma-'I nantomo hamika. Lailinga-Na moto bagomi pade towemi hi Hia to laipopahiloimi i rara bagomi nampatulungi todea Alatala to laipobagomi dola duu welau ei. 11 Mingki mpuu kami bona butu duami maroho moto oa wukumi mampobago bagomi ee duu kahudua tuwumi, hampena mitarima to laiharumakami lako Alatala. 12 Moma kami madota ane komi mawali malohe. Dota kami, bona komi matuwu ewa hira to nantarima tipa Alatala, apa neparahayara hi Hia pade nohabarara nopea napa to laitipaka-Nara Alatala.
Tipa Alatala moma naria pobaliana
13 Tempo Alatala notipa hi Abraham, nosumpa-'I nangkahangai hanga-Na moto ane kana Napakadupa napa to laitipa-Na, apa moma naria to neliu kabarakana lako Hia. 14 Iulika-Na Abraham iwei, “Mpuu-mpuu kana Kutiroiko hante rahi to madea pade Kupakadea mulimu.” 15 Nohabara'i Abraham nopea. Etu pade laitarimana napa to laitipa Alatala hi hia.
16 Ane manuhia nosumpa, laikahangaina hanga tauna to nalangko pangkana mampakaroho sumpana ee, bona momami hema to mampabili'i. 17 Alatala nanguli tipa-Na pade laipakaroho-Na hante nosumpa, bona to mantarima tipa Alatala ee mamparahaya mpuu ane napa to laitipa-Na ee mai kana Napakadupa. 18 Aji, rongaa to moma mobali, tipa Alatala pade sumpa-Na. Apa Alatala moma-'I nokalowo. Hante iwee, kita to narata hi Alatala nampali pengkanaolua mamala mampaharumaka mpuu ane napa to laitipaka-Nata Alatala kana Napakadupa. 19 Harumakaata ee mamala rarapaika ahe potaha kapala tahi to naroho, bona kapala ee mai marodo moto'i. Wee moto mui ane meharumakata hi Yesus, maroho bo marodo moto rarata. Mamalata marata i tingoo Alatala habana peharumakata ee mai. Ee mai nahibali hante namalatamo rau nelima i talikua powide Kamara to Neliu Kagahana rara Hou Alatala i huruga. 20 Yesus eemi to noilodo nehua i rarana nobeakata dala rau i tingoo Alatala. Apa Hiami to nawali Imam Bohe duu kahae-haena nahibali hante Imam Melkisedek.