Kristus pade Melkisedek
7
1 Melkisedek ee mai magau ngata Salem pade imam Alatala to i Lolona. Panculina Abraham lako nohiwali pade nampadagira magau, Melkisedek nampotomu'i pade nampatiroi'i. 2 Abraham nampopewai hi Melkisedek hampulu parahee lako napa to lairampakina i pohiwaliana. Hanga Melkisedek, batuana: Magau to Nanoro. Melkisedek ee mui magau Salem, batuana: Magau to Nangkeni Pohingkabeloa. 3 Moma naria laiuli hi kita ane naria tuamana, tinana ba tumpulokona. Moma mui naria laiuli pamula katuwuna pade kahudua katuwuna. Aji Melkisedek ee mai nahibali hante Ana Alatala, batena moto'i nawali imam duu kahae-haena.4 Aji, nanotomi hi kita ane Melkisedek ee mai tauna to neliu mpuu pobununa, hampena tumpulokota Abraham nampopewai hi Melkisedek hampulu parahee lako napa to lairampakina i pohiwaliana. 5 Rara patudu Taurat, hira lako muli Lewi to laipoimam, laiparenta mangala hampulu parahee lako popaeloara to Israel ompira, naupa hira ee hingkani-ngkani muli Abraham. 6 Naupawee Melkisedek to moma muli Lewi, nantarima hampulu parahee lako Abraham, pade hia nohambaya nerapi bona Alatala mantiroi Abraham, naupa Abraham ee mai to nantarima tipa Alatala. 7 Moma ami mamala rahapuaka ane to nalangko pangkana to kana mohambaya merapi bona Alatala mantiroi to i nauna pangkana lako hi hia. 8 Imam-imam to nantarima hampulu parahee ee mai tauna to mamala mamate. Naupawee, mantuku Buku to Nagaha, Melkisedek to nantarima hampulu parahee ee mai, batena natuwu moto'i. 9 Aji, mamala rauli ane hira muli Lewi to nantarima hampulu parahee, nampopewai mui hampulu parahee hi Melkisedek, habana Abraham tumpulokora nampopewai hampulu parahee hi Melkisedek. 10 Apa tempo Melkisedek nampotomu Abraham, Lewi ee mai poma'i laiote, mamala rauli rara woto tumpulokona Abrahamdipi.
Kristus ee mai imam to neliu pobununa lako Harun
11 Alatala nampawaika to Israel patudu Taurat, pade laiongko-Na muli Lewi nawali to pangkenira nepue hi Hia. Naupawee imam lako muli Lewi hante bagora ee, moma ibukura nangkeni to Israel nawali nakono pade nagaha i tingoo Alatala. Etu pade Alatala nampaongko hadua imam ntanina to moma lako muli Harun, to nahibali hante Melkisedek. 12 Aji, ane imam-imam lako muli Lewi rahambei, natantu ami patudu Taurat mui kana rahambei. 13 Imam to laipojarita ei, Pueta Yesus. Laincanita ane moma-'I muli Lewi. Pade poma naria hema haduaa lako tumpuloko-Na to nobago halaku imam. 14 Habana laincanirami humawee tauna ane Pueta lako muli Yehuda. Moma naria hangkania Musa nanguli ane maria tauna lako muli Yehuda to mawali imam. 15 Humawee to laipojarita ei, nawali nanotokimi hante po'ongko hadua Imam ntanina to nahibali hante Melkisedek. 16 Hia laiongko nawali Imam moma nantuku atura to nampakatantu muli hema to mawali imam. Hia laiongko habana nabaraka'I natuwu duu kahae-haena. 17 Apa nangkambelai Hia naria laitulihi rara Buku to Nagaha iwei,
“Ikomi Imam duu kahae-haena,
nahibali hante Melkisedek.”
18 Aji, tempo ei atura-atura rara patudu Taurat to ilodo laipopewai hi kita ee momami laipake, apa atura-atura ee mai moma'i naroho pade moma naria bununa. 19 Patudu Taurat ee mai moma ibukuna nangkeni tauna nawali nakono pade nagaha i tingoo Alatala. Etu pade kita tempo ei laiwaika harumakaa to neliupi kabelona, to nampakamohuta hante Alatala.
20 Ilodo, tempo Alatala nampaongko muli Lewi nawali imam, moma-'I nosumpa. Naupawee tempo Alatala nampaongko Yesus nawali Imam, nosumpa-'I. 21 Alatala nangulika Yesus rara sumpa-Na, ewa laitulihi rara Buku to Nagaha iwei,
“Nosumpami Pue,
pade natantu amimi moma Nabali pekiri-Na, iuli-Na,
‘Ikomi Imam duu kahae-haena.’ ”
22 Lako sumpa Alatala ee mai, nanotomi hi kita ane potipa Alatala to nabou neliupi kabelona lako potipa-Na to nahae, apa Yesus motomi to nampakatantu ane tipa ee mai mpuu-mpuu kana madupa. 23 Nadearamo muli Lewi to nawali imam. Pade iwee'i, apa ane mamate hadua imam, bagona ee nahambei to ntaninami. 24 Naupawee bago Yesus halaku Imam moma'i mamala rahambei tau ntanina apa Yesus natuwu duu kahae-haena. 25 Aji, habana laumiria Yesus namala nampakahalama duu kahae-haena tau-tauna to laikeni-Na namohu hante Alatala. Apa Yesus ee natuwu duu kahae-haena, bona mampohambayakara tauna ee mai hi Alatala.
26 Imam bohe to ewa Yesus eemi to laiparaluuta. Apa Hia nagaha, moma-'I nakahalaia, moma-'I nobabei doha, moma-'I nahibali hante tauna to nadoha, pade laiongkomi rau i kalangkoana i huruga. 27 Yesus ee mai moma-'I nahibali hante imam-imam bohe ntanina to butu eona kana mojuju kurban mampakagaha dohara moto pade mapu ee mampakagaha dohara todea. Apa Yesus ee hangkani aga nojuju kurban, tempo-Na nampopewai woto-Na halaku kurban. Pade to laijuju-Na ee duu kahae-haenami. 28 Patudu Taurat no'ongkora manuhia biaha to nadoha nawali imam bohe. Naupawee, naliu lako pampawaika-Na Patudu Taurat ee mai, Alatala nobabei tipa to nabou hante nosumpa nampaongko Ana-Na to moma naria kakuraa-Na nawali Imam Bohe duu kahae-haena.