Imam Bohe potipa to nabou
8
1 Koropoko humawee to laipojaritata lauria, naria Imam Boheta to ewa ee, to noncuna i mali pangkana poncunaa kamagaua dohe Alatala to neliu kabaraka-Na i huruga. 2 Hia ee nobago halaku Imam Bohe i rara Kamara to Neliu Kagahana, i rara Kemah to mpuu-mpuuna to laibabei Pue i huruga, moma to laibabei manuhia.3 Butu dua imam bohe laiongko bona mojuju kurban pade mangkeni pewai hi Alatala. Wee moto mui Yesus Imam Boheta, kana maria muihawo to Napopewai hi Alatala. 4 Ane ke natuwu i dunia eidipi Yesus, natantu amimi moma-'I mawali imam, apa i dunia ei nariaramo imam to nojuju kurban mantuku patudu Taurat. 5 Bago to laibabeira imam i Hou Alatala to i dunia ei wule nantuku tari napa to naria i huruga. Ee mai laikewo-Na amimi Alatala hi Musa, tempo Musa mingki mobabei Kemah Alatala. Alatala nangulika Musa iwei, “Linga! Humaweena kana mubabei mantuku tari to laitudoka-Kuko i lolo bulu.” 6 Naupawee Yesus namparata bago to neliupi kabelona lako bagora imam i dunia ei, to nantuku potipa to nahae. Wee moto mui potipa to nabou to laiuruhi-Na nampaoloti Alatala bo manuhia neliupi kabelona lako potipa to nahae, habana potipa to nabou laibabei nantuku potipa to neliupi kabelona. 7 Ane ke potipa to nahae ee moma naria kakuraana, momami paraluu maria potipa to nabou. 8 Naupawee Alatala moto nampahilo ane todea to Yahudi momara nanturuhi potipa to nahae. Etu pade iuli-Na iwei,
“Epe pura komi! Marata mei tempona,
Kubabei potipa to nabou
hante to Israel pade to Yehuda.
9 Moma ewa potipa to laibabei-Ku hi tumpulokora,
tempo-Ku nopanuntura nehuwu lako Mesir.
Habana momara natigu nanturuhi potipa-Ku,
etu pade momaramo laitarima-Ku. Weemi Lolita Pue.
10 Eimi potipa to Kubabeikara to Israel
i eo ngkapurina mei. Weemi lolita Pue.
Kuboli mei patudu-Ku i rara pekirira
pade Kutulihi i rarara.
Pade Aku mei mawali Alatalara
pade hira mawali todea-Ku.
11 Momaramo mopatudu tau ntanina ba ompira
hante manguli iwei, ‘Kana mincani Pue.’
Apa humawee tauna mei, to laipemabohe bo todea biaha,
kana mangincani-'A.
12 Apa Aku mei mampa'ampuni humawee kahalaara
pade momami Kulinga doha-dohara.”
13 Aji, panguli Alatala ane laibabei-Nami potipa to nabou, potipa-Na to nahae ee natua pade nauhami. Pade napa to natua pade nauhami momami mahae maronto.