Atura mepue hi Alatala mantuku potipa to nahae
9
1 Rara potipa Alatala to nahae, naria amimi atura-atura mepue pade atura-atura nangkambelai kemah pepuea hi Alatala to laibabei mpale manuhia. 2 Kemah pepuea ee mai laibabeira rongu kamara to laioloti powide. I kamara to pamulana rarata, naria pobolia poindo pade meja pobolia roti to laijuju hi Alatala. Kamara ee laikahangai Kamara to Nagaha. 3 I talikua powide, naria kamara karonguna to laikahangai Kamara to Neliu Kagahana. 4 Rara Kamara to Neliu Kagahana ee naria pantunua dupa to laibabei lako bulawa. Pade naria mui Peti Potipa to laibungu hante bulawa. Rara peti ee naria kura bulawa pobolia roti manna, lua Harun to naria'i wengi nohulu, pade rongu watu to laipotulihii hampulu parenta Alatala. 5 Lolo lou peti ee naria rongu patung to laibabei ewa tari malaeka to laikahangai kerub, halaku tanda ane naria-'I Alatala i hee. Kapira rongu kerub ee mai natewole i lou peti poampunia doha manuhia. Naupawee humawee lauria moma'i mamala tapojarita welau ei hampe kaohena. 6 Weemile poaturu Kemah Alatala ee.Butu eonara imam nehua i rara kamara to pamulana i Kemah Alatala ee nampobago bagora halaku imam. 7 Naria atura to nanguli ane imam bohe aga to mamala mehua kamara to karonguna, hampae hangkani. Imam bohe ee mangkeni raa binata to rajuju hi Alatala bona mampakagaha dohana moto hante dohara todea to moma laitungkai babeira. 8 Hante atura lauria, Inoha to Nagaha nampahiloi ane dala rau mehua i rara Kamara to Neliu Kagahana ee poma'i matebea ane mariadipi Kemah Alatala to nahae. 9 Lauria nampakanoto hi kita tempo ei, ane humawee pewai pade binata-binata to laijuju halaku kurban hi Alatala, moma'i namala nampakagaha rara tauna i tingoo Alatala. 10 Humawee atura rara potipa to nahae wule nangkambelai pangkoni, panginu pade nadea ngaa ada pampegaha woto. Atura-atura ee wuwu nangkambelai wotota, moma nampakagaha rarata. Atura-atura to nahae ee laipake duuna Alatala mobabei atura to nabou.
Kristus nampaoloti Alatala hante manuhia nantuku potipa to nabou
11 Naupawee, naratami Kristus halaku Imam Bohe nangkeni kabeloa to lairasaitami tempo ei. Nehua-'Imi i rara Kemah Alatala to neliupi kabelona bo kaganana to moma laibabei mpale manuhia. Kemah Alatala to laipehuai Kristus ee moma to naria i dunia to laipajadi Alatala ei. 12 Kristus nehua i rara Kamara to Neliu Kagahana rara Kemah Alatala ee, hangkani aga duu kahae-haena. Tempo ee, moma-'I nangkeni raa kebe tuama ba raa ana japi, naupawee raa-Na moto to laikeni-Na. Hante raa-Na ee laitolohi-Natamo duu kahae-haena. 13 Mantuku potipa to nahae, raa kebe tuama, raa japi tuama pade awu lako kurban ana japi laipake notamperi tau-tauna to narumu wotora bona magahara i tingoo Alatala. 14 Aji, ane raa binata pade awu ee namala nampakagaha woto tauna to narumu, neparauli raa Kristus. Hante petulungi Inoha to Nagaha to naria duu kahae-haena, Kristus nojuju woto-Na hi Alatala halaku kurban to moma nakahalaia. Raa Kristus nampakagaha rarata lako ingkuta to moma naria bununa, bona mamalata manturuhi dota Alatala to natuwu duu kahae-haena.
15 Kristus nampaoloti Alatala hante manuhia nantuku potipa to nabou, bona humawee tauna to laikio Alatala mantarima rahi to moma maria kahuduana to laitipa Alatala. Apa Kristus namate nampatolohi manuhia lako humawee doha to laibabeira nantiboki atura potipa to nahae.
16 Ane maria totua to nobabei hura potipa nangkambelai pobagi gaguna, poma'i mamala gaguna rabagi ane totua to nobabei hura potipa ee mai poma'i mamate. 17 Hura potipa nangkambelai pobagi gagu totua, mamala'i rapake ane totua to nobabei hura ee namatemi. Hura ee mai moma'i mamala rapake ane to pobabei hura ee natuwudipi. 18 Wee mui potipa Alatala to nahae, kana maria binata to mamate. Ane poma'i ratitihi hante raa binata to laihamale, potipa ee poma'i mamala rapake. 19 Apa nahudupi Musa noparata humawee parenta patudu Taurat hi to Israel, laialana raa ana japi, raa kebe tuama, ue, wulu bimba to nalei pade rumpu to laiuli hisop, laipakena notamperi buku patudu Taurat ee pade humawee todea. 20 Tempona nobabei ee Musa nanguli iwei, “Eimi raa to nampakaroho potipa Alatala hi komi to kana mituruhi.” 21 Napu ee, Kemah Alatala pade humawee parewa to laipake nepue, laitamperina ewa ee hante raa. 22 Aji, mantuku patudu Taurat ke nono humawee kana rapakagaha hante raa. Pade ane moma maria raa matudo, doha moma namala ra'ampuni.
23 Kemah Alatala to naria i dunia ei pade parewa to i rarana, humaweena ee mai nantuku tari napa to naria i huruga. Kemah Alatala pade parewa to i rarana to naria i dunia ei laipakagaha hante raa binata to laijuju hi Alatala. Naupawee, Kemah Alatala to naria i huruga pade parewa to i rarana laipakagaha hante raa kurban to neliupi kabelona. 24 Apa Kristus moma-'I nehua rara Kamara to Neliu Kagahana to laibabei mpale manuhia to nantuku tari Kamara to Neliu Kagahana to kakonona to naria i huruga. Naupawee Kristus rau i tingoo Alatala i huruga bona mantulungi manuhia. 25 Pade Kristus hangkani-'I aga nehua i rara Kamara to Neliu Kagahana nojuju raa-Na, moma ewa imam bohe to Yahudi to butu mpaena nehua i rara Kamara to Neliu Kagahana i Kemah Alatala nangkeni raa binata. 26 Apa ane ke nadea ngkani-'I Kristus nojuju raa-Na, kana madea ngkani mui-'I mangkolo kahehaa hinungkai dunia laipajadi. Naupawee, tempo lau kahudua dunia ei, naratami Kristus hangkani aga nojuju woto-Na nolali doha manuhia. 27 Alatala nampakatantu ane manuhia hangkani aga mamate, mapu ee rabotuhi. 28 Wee moto mui Kristus, hangkani-'I aga namate halaku kurban to mangkolo doha manuhia. Mapu ee, karata-Na karongkanina, moma-'Imi mangkolo doha manuhia, naupawee mampawaika kahalamaa hi manuhia to nampopea karata-Na.