Kristus ee mai kurban poampuni doha
10
1 Patudu Taurat ee, gambara to poma narawadipi lako hangu hangaa to nabelo to madupa i eo ngkapurina, poma'i koro to nabelo ee. Butu mpaena tau-tauna nampopewai kurbanra hi Alatala nahibali ewa to laibabeira moto oa. Naupawee humawee lauria moma namala nobabeira nawali nagaha pade nakono i tingoo Alatala. 2 Ane ke namala'i kurbanra ee nampakagahara lako dohara, natantu ami momaramo mojuju kurbanra. Apa ane wee, hira to nepue ee rancanirami ane dohara laiampunimi pade rarasaira momaramo nadoha. 3 Naupawee, kakonona kurban to laijujura butu mpaena ee nampalingaira ane hira manuhia to nadoha. 4 Apa raa japi ba raa kebe moma ami namala nolali doha manuhia. 5 Etu pade karata Yesus i dunia, iuli-Na hi Alatala iwei,“Kurban bo pewai moma laipodota-Mu,
naupawee laipahadia-Mumi woto-Ku mawali kurban.
6 Kurban to laitunu pade kurban poampuni doha,
moma'i laipokagoe-Mu.
7 Etu pade iuli-Ku, ‘Ei-'Amo Alatala.
Narata-'Amo mobabei dota-Mu,
ewa to laitulihi nangkambelai Aku i rara Buku to Nagaha.’ ”
8 I wongkona he, Kristus nanguli iwei, “Kurban bo pewai moma laipodota-Mu. Kurban to laitunu pade kurban poampuni doha, moma'i laipokagoe-Mu,” naupa laipopewai nantuku atura patudu Taurat. 9 Napu ee iuli-Na mui Kristus, “Ei-'Amo Alatala! Narata-'Amo mobabei dota-Mu.” Aji, nanotomi hi kita ane momami laipake-Na Alatala atura to nahae nangkambelai kurban, laipahawa-Nami hante kurban Kristus. 10 Pade laibabei-Nami Yesus Kristus napa to laipodota Alatala. Laipakagaha-Nata lako doha-dohata hante nojuju woto-Na halaku kurban hangkani aga duu kahae-haena.
11 Imam to Yahudi nampobago bagora butu eona nampopewai kurban to nahibali moto oa. Naupawee, humawee kurban ee moma'i namala nolali doha. 12 Kristus hangkani-'I aga nojuju woto-Na halaku kurban to nolali doha manuhia duu kahae-haena. Nahudupi Kristus nampopewai kurban ee, noncuna-'Imi mali pangkana Alatala noparenta hingkani-ngkani hante Alatala. 13 Pade tempo ei, Kristus nampopea tempona humawee bali-Na rapopotingkodu i tingoo-Na. 14 Aji, hante nojuju woto-Na hangkani ee mai, laipakagaha-Natamo Kristus lako doha-dohata hampena momatamo nakahalaia i tingoo Alatala duu kahae-haena. 15 Nangkambelai lauria, Inoha to Nagaha nohabi hi kita, iwei,
16 “Eimi potipa to Kubabeikara i eo ngkapurina mei. Weemi lolita Pue.
Kuboli mei patudu-Ku i rarara,
pade Kutulihi i rara pekirira.”
17 Pade iuli-Na mui Inoha to Nagaha iwei,
“Momami Kulinga doha-dohara pade ingkura to nadaa.”
18 Aji, apa laiampunimi humawee doha, momami paraluu maria kurban poampuni doha.
Pakaroho peparahaya hi Alatala
19 Aji ompi-ompiku, tempo ei momatamo maeka mehua i rara Kamara to Neliu Kagahana motomu hante Alatala, apa namalatamo mehua habana raa Yesus. 20 Namalata mehua apa laibeaka-Natamo Yesus dala to nabou to nangkenita mamparata katuwua duu kahae-haena. Dala ee mai nampaliu powide to ilodo nampalawata marata hi Alatala. Woto Yesusmi to lairapaika powide ee. 21 Pade naria Imam Boheta to nawali kapala i rara Hou Alatala. 22 Etumo, maitamo marata i tingoo Alatala hante kabuloli rarata pade karoho peparahayata, apa rarata laipakagahami lako dota rara to nadaa pade wotota laikabohimi hante ue to nagaha.
23 Maitamo mampakaroho mpuu to laipangakuta nangkambelai napa to laiharumakata, apa Alatala to nampotipakata ee mai namala raparahaya. 24 Nemota momepalele, bona mamalata momepakaroho mampotowe hingka manuhia pade moingku to nabelo. 25 Bahangkua duara ompita, naloheramo nantuku kahiromuata nogambara hingkani-ngkani. Nemo tatuku ingkura to ewa ee. Aji, maitamo momepakaroho, pelabinapi tempo ei, apa laincanita ane momami mahae Pue marata.
26 Apa ane tatungkai mobabei dola doha, bo laincanitami patudu to nakono, momami maria kurban to mamala molali dohata ee. 27 Ane ewa ee ingkuta, maeka mpuuta mampopea pehuku Alatala pade apu to mampakapapu humawee tauna to nampaewa Alatala. 28 Tauna to nampahapuaka patudu Taurat to laitulihi Musa owi, ane naria rodua ba tolu dua habi to nanguli nahala'i, moma naria ampuna, kana rahuku mate'i. 29 Neparauli mei kantomo pehuku to rawaika tauna to nampopore Ana Alatala. Tauna ee nampahauru raa Yesus, bo raa eedi to nampakaroho potipa Alatala pade nampakagaha'i lako doha-dohana. Pade tauna ee mui nampopore Inoha to Nagaha to nangkewo kabohe towe Alatala hi todea-Na. 30 Apa laincanita Alatala to nanguli iwei, “Aku aga to mamala mebalahi. Kana Kuhukura to nadaa ingkura.” Pade iuli-Na mui, “Pue mei mobotuhi todea-Na.” 31 Nepaekai mpuu ane Alatala to natuwu mampahukuta.
32 Aji, kana milinga bewa katuwumi, pamulana komi nawali to pantuku Kristus. Natigu moto komi neparahaya hi Pue naupa nadea ngaa kahehaa to lairatami. 33 Naria komi laipopore bo laiduahi i tingoo todea. Naria mui komi nangkolo kahehaa hingkani-ngkani hante dohemi to laipopore bo laiduahi. 34 Pade lairasaimi mui kadua rarara ompi-ompimi hangu kaparahayaa to laitarungku. Nagoe moto komi ane napa to naria hi komi lairampaki, apa laincanimi ane naria hi komi to neliu kabelona to mantaha duu kahae-haena. 35 Etumo, nemo mibakaha peparahayami, apa nabohe tomo to rawaika komi mei. 36 Kana mohabara komi, bona mamala komi mampoingkuka dota Alatala hampena mitarima napa to laitipaka-Na komi. 37 Apa naria laitulihi rara Buku to Nagaha iwei,
“Hangonidimi Hia to marata ee, maratami.
Momami Napakahae-hae marata.
38 Tauna to laipemakono habana peparahayana,
kana matuwu duu kahae-haena.
Naupawee tauna to momami neparahaya hi Aku,
momami Kupokagoe.”
39 Naupawee kita ei momata to moma neparahaya pade to rahuku. Kita ei mai to neparahaya hi Alatala pade to rapakahalama.