Kana tatarima kahalamaa to laipopewai Yesus
2
1 Aji, apa neliupi baraka Yesus lako humawee malaeka, kana tapairara mpuu kareba to laiepetami, bona nemota mahalatara lako dala to nakono. 2 Apa ilodo, humawee atura rara patudu Taurat to laiparatara malaeka hi tumpulokota nakono pade kana raturuhira. Hemara to nantiboki pade moma nanturuhi atura ee, laihuku nantuku ingkura. 3 Neparauli ane moma'i tatarima kahalamaa to neliu kabelona to laipopewai Yesus hi kita, natantu amimi kana rahukuta. Pue Yesus motomi to pamulana noparata kareba nangkambelai kahalamaa ee, pade tau-tauna to pamulana nangepe Pue Yesus tempo ee, nampahiloi hi kita ane kareba nangkambelai kahalamaa ee nakono pade mamala raparahaya. 4 Pade Alatala nampakaroho pohabira tauna ee hante nobabei nadea ngaa to nepakahera bo kajadia-kajadia bohe. Moma wuwu ee, Alatala mui nampawaikara nadea ngaa pampakulea lako Inoha to Nagaha nantuku dota-Na.Pue Yesus nawali manuhia bona mampakahalama manuhia
5 Moma malaeka-malaeka to laiwaika Alatala baraka moparenta dunia bou to marata mei to laipotuturata ei mai. 6 Baraka ee mai laipopewai Alatala hi manuhia. Apa naria to nohabi rara Buku to Nagaha nanguli iwei,
“Hema gagadi manuhia ee hampena lailinga-Mu'i?
Moma mahipato manuhia Mutulungi.
7 Laipajadi-Mu natepanau'i hodi lako malaeka.
Pade laiwaika-Mu'i poncunaa to nabelo bo laibila,
8 bo laiwaika-Mu'i baraka noparenta hangu hangaa.”
Aji, ane Alatala mampawaika manuhia baraka moparenta hangu hangaa, ee mai batuana moma maria to moma naparenta. Aga tempo ei poma laihilota manuhia noparenta hangu hangaa. 9 Naupawee laihilotami Yesus noparenta. Laipopanau-'I hodi lako malaeka, bona hante kabohe towe Alatala mamala-'I mamate mampakahalama humawee manuhia. Welau ei laihilotami Yesus laiwaika poncunaa to nabelo bo laibila, apa laikolo-Nami kahehaa duu-Na namate.
10 Alatala nopajadi dunia bo langi hante ihina, pade humaweena ee mai laipajadi-Na nantuku dota-Na moto. Patuju-Na bona madea tauna mawali ana-Na pade rapemabohe hingkani-ngkani hante Yesus. Etu pade nahipato ami Alatala nampalele Yesus nangkolo kahehaa bona Yesus nawali to Pepakahalama to moma naria kakuraa-Na, to nobeaka manuhia dala kahalamaa. 11 Yesus to nampakagaha manuhia lako doha. Hia to nepakagaha, pade manuhia to laipakagaha ee, hadua moto Tuamara. Etu pade moma-'I naea Yesus nampangakura halaku ompi-Na. 12 Yesus nangulika Alatala iwei,
“Kukarebai mei hi ompi-ompi-Ku nangkambelai Iko,
pade Ku'une-Ko i rara kahiromuara to nepue hi Iko.”
13 Iuli-Na mui Yesus,
“Alatala to laiharumaka-Ku.”
Pade iuli-Na mui,
“Ei-'Amo nodohe hante ana-ana to laipopewai Alatala hi Aku.”
14 To laiuli Yesus ana-ana ee mai manuhia biaha to mamala mamate, etu pade Yesus nawali manuhia pade namparasai mui napa to lairasai manuhia. Hia nawali manuhia, bona mamala-'I mamate pade hante kamate-Na ee mai mamala-'I mampadagi Magau Heta to nabaraka mampakamate manuhia. 15 Hante iwee laibakaha-Na muira tauna to i rara katuwura laipobatua ekara mamate. 16 Apa natantumi moma malaeka to laitulungi-Na, naupawee muli Abraham. 17 Etu pade rarana hangu hangaa Hia laibabei nahibali hante ompi-ompi-Na. Hante iwee namala-'I nawali Imam Bohe to na'ahi rara-Na hi ompi-ompi-Na bo natigu hi Alatala, pade namala-'I nampa'ampuni doha humawee manuhia. 18 Hia moto laikolo-Nami kahehaa tempo-Na laipehori, etu pade namala-'I nantulungi manuhia to laipehori.