Hura Paulus rau hi Filemon
Tabe
1
1 Lako Paulus to laitarungku habana nampotolele kareba nangkambelai Yesus Kristus pade lako Timotius ompita hangu kaparahayaa. Hura ei laipakatu kami hi iko Filemon ompi to laipotowe kami bo dohe hampobagoa kami, 2 pade hi Apfia ompita bangkele pade hi Arkhipus dohe hampobagoata, bo hi jumaa to nahiromu i houmu. 3 Mohambaya kami bona kabohe towe pade katuwu to nanone lako Alatala Tuamata, pade lako Pue Yesus Kristus mampodohe komi.Posukuru Paulus
4 Butu ngkaniku nohambaya laihambayaniku moto oako pade nosukuru'a hi Alatala to laipueku, 5 apa laiepekumi towemu hi humawee jumaa Alatala pade peparahayamu hi Pue Yesus. 6 Nohambaya'a bona pohangu raramu hante ompita hangu kaparahayaa mantambai pampahata nangkambelai humawee to laiwaika-Nata Alatala, bona Kristus raune. 7 Nagoe'a pade naroho mpuu wukuku habana towemu hi jumaa Alatala, apa iko ompiku nampakasana rarara.
Paulus nerapi hi Filemon bona natarima nculimi Onesimus
8 Kakonona, apa aku ei rasul Kristus, mamala'a moparentako mobabei napa to kana mubabei. 9 Naupawee nampalinga towemu, momako kuparenta, nabelopi ane kuperapi hi iko. Aku Paulus, natua'amo pade bulaku laitarungku habana nampotolele kareba nangkambelai Kristus Yesus. 10 Kuperapi hi iko bona mutarima nculi'i anaku Onesimus. Hia ee laipowaliku anaku habana bulaku laitarungku, akumi to nopatudu'i neparahaya hi Yesus. 11 Ane ilodo moma'i nobunu hi iko. Naupawee, tempo ei nobunumi hi iko, pade nobunu muimi hi aku.
12 Anaku to laipotoweku ei mai, kutudu nculimi tulau hi iko. 13 Kakonona, mingki kutahadipi i hei doheku mampahambeiko, mampatulungi'a bulaku laitarungku habana nangkarebai Kareba Belo. 14 Naupawee moma'a madota mampataha'i ane moma'i mupodota. Malohe'a mopahuruko, nabelopi ane humaweena mubabei hante kasana raramu. 15 Baka pade laipopogaako hangoni hante Onesimus, bona meparahaya'i hi Yesus pade mamalami mupodohe nculi duu kahae-haena, 16 momami halaku batuamu, naupawee melabimi lako ee apa nawali ompimumi i rara Kristus. Aku moto laipotoweku'i, neparauli iko. Laipotowemu'i habana hia ee batuamu pade ompimu i rara Pue.
17 Aji, ane aku ei laiulimu ompimu to hangu kaparahayaa, tarima nculimi Onesimus ei mahibali hante pantarimamu'a. 18 Ane laipakaruginako ba naria indana hi iko, akudimi mangkolo humaweena. 19 Tipaku ei laitulihiku hante paleku moto: Aku, Paulus, mobayari humaweena. Momami mingki kupalingaiko, ane naria indamu hi aku, apa lako hi aku pade lairatamu katuwua to nabou rara Kristus. 20 Etumo, ompiku, apa laiparahayata Kristus, kuperapi bona mubabei to naria bununa hi aku. Pakasana raraku halaku ompimu hangu kaparahayaa. 21 Laitulihiku hura ei, apa laincaniku ane muturuhi humaweena melabi lako to iperapiku mubabei.
22 Nariapi hangaa perapiaku. Pahadiaka'a hangu kamara i houmu, habana laiharumakaku Alatala mampahonoi hambayami bona rabakaha'a lako rara tarungku pade rapopanculi hi komi.
Tabe kahuduana