Patudu pade hambaya
13
1 Ompi-ompi, piara belo pomepotowemi hadua bo hadua! 2 Kana milinga dola mantarima to rata i houmi, apa nariara tauna to nobabei ewa ee, moma laincanira ane kakonona to laitarimara i houra ee malaeka Alatala. 3 Tulungira tauna to laitarungku, ewa hante komi muikowo to laitarungku. Tulungira tauna to laihehaki, ewa hante komi muikowo to laihehaki.4 Humawee tauna kana mampabila poncamoko. Nemo mampakagero poncamoko hante pogau hala, apa to pogau hala kana Nahuku Alatala.
5 Nemo komi napobatua doi pade pakaganami katuwumi hante to naria hi komi. Apa iuli-Na amimi Alatala iwei, “Moma komi maria hangkania Kupalele pade moma komi maria hangkania Kupalahi.” 6 Etu pade nabiata nanguli iwei,
“Pue to mantulungi'a, moma'a maeka.
Moma hema mamala mobabei napa-napa hi aku.”
7 Lingara to pangkenimi to noparataka komi peboha Alatala. Hilo bewa kahudua katuwura pade penaumi peparahayara. 8 Yesus Kristus, moma naria nobali, belo ilodo, welau ei pade duu kahae-haena. 9 Nemo komi mantuku nadea ngaa patudu to moma laincanimi bona nemo komi mahalatara. Nemo mipehoba mampakaroho rarami hante nanturuhi hangu hangaa atura nangkambelai pangkoni, to moma naria bununa. Aginapi rarami rapakaroho hante kabohe towe Alatala.
10 Hi kita naria Yesus to nawali kurban to nampatolohi doha-dohata. Kurbanta ee mai neliu kabelona lako kurban to laipopewai imam-imam i Hou Alatala to nahae. Imam-imam eera momara mamparata bagia lako kurbanta ee. 11 Nantuku patudu Taurat, raa lako binata to laihamale halaku kurban to nampatolohi doha, kana nakeni imam bohe i rara Kamara to Neliu Kagahana. Pade woto binata ee kana ratunu hampe mawali awu i hawaliku pongataa. 12 Etu pade Yesus mui laihehaki duu-Na namate i hawaliku womo pehuaa ngata bona mampakagaha todea-Na lako dohara hante raa-Na moto. 13 Etumo, maitamo mantuku Yesus rau i hawaliku ngata. Batuana, kana tapalahimi petukuata to nahae pade mahadiata rapopore ewa Yesus. 14 Apa i dunia ei, moma naria katidaata to duu kahae-haena. Kita ei nampali ngata to marata mei. 15 Aji, hante petulungi Yesus, maitamo mampaune bo mampemabohe oa hanga Alatala. Eemi pewai halaku tanda posukuruta hi Hia. 16 Nemo mikalingani mobabei ingku belo pade mantulungi tauna. Apa ingku to ewa ee nahibali hante pewai to nampakagoe rara Alatala.
17 Turuhira to pangkenimi pade matundu komi hi hira. Apa hira etu mai to nampodoo peparahayami pade kana mangkewo hi Alatala nangkambelai bagora ee. Aji, turuhiramo bona masana moto rarara mobago, moma madua rarara. Apa ane madua rarara, marugi komi.
18 Hambayani moto oa kami. Laincani kami ane rara kami nagaha apa laipehimukui kami oa nobabei to nabelo rarana hangu hangaa. 19 Pelabina lako ee mai, kuperapi mpuu hi komi mihambayani'a bona Alatala dungku mangkeni nculi'a tulau hi komi.
Hambaya kahuduana
20 Alatala puu katuwu to nanone nampakatuwu nculi Pueta Yesus lako kamatea-Na. Habana kamate-Na ee, tempo ei Hia nawali to Poewu to neliu kabelo-Na, to nampaewuta bimba-bimba-Na. Raa-Na to natudo nampakaroho potipa to laibabei Alatala hi kita to rapake duu kahae-haena. 21 Mohambaya'a bona Alatala mampakagana komi hante hangu hangaa to nabelo to laiparaluumi mobabei dota-Na. Kuperapi mui hi Hia, bona hante petulungi Yesus Kristus mamala komi mobabei napa to nampakagoe rara Alatala. Yesusmi to mahipato raune duu kahae-haena! Amin.
Kahudua hura
22 Ompi-ompi, kuperapi hi komi bona mipairara mpuu humawee patuduku ei hante pohabarami, apa huraku ei moma'i nalanga. 23 Bona mincani, Timotius ompita laibakahami lako tarungku. Ane marata'ipi doheku hei, dungku tulaumo kami mantako komi.
24 Parata tabeku hi humawee to pangkenimi pade hi humawee todea Alatala. Ompi-ompi hangu kaparahayaata i Italia nopakatu tabera hi komi.
25 Mohambaya'a bona kabohe towe Alatala mampodohe pura komi.