Patudu bona maroho peparahaya
12
1 Aji, linga bewa karoho peparahayara tauna to natuwu ilodo apa mamala rauli hira ee mai ewa habi to nadea to nokangkore i humangkulilita nampahilo bewa ingkuta natuwu i dunia ei. Pade kita ei lairapaika tauna to nokumeno i rara polumbaa. Etu pade kana tabakaha humawee to nampakantomo katuwuta pade doha to nampaweweta, pade kana matigu dolata mantuku polumbaa to laipakatantuka Alatala hi kita. 2 Maitamo mobabei humaweena lauria hante mepenoto hi Yesus, to nobeakata dala bona meparahayata pade nampakagana peparahayata ee mai. Moma-'I laitapari-Na laipopore, nantaha-'I nangkolo humawee kahehaa i kau salib apa laincani-Na Alatala mampawaika-'I kasanaa ane mahudupi humawee kahehaa ee mai. Tempo ei mai, Yesus noncuna mali pangkana Alatala noparenta hingkani-ngkani hante Alatala. 3 Kana milinga moto oa-'I to nantaha nangkolo kahehaa habana moma iodera to nadoha nampaewa-'I, bona nemo komi mawali malente pade maronto harumakaami. 4 Apa poma komi naria namate laipatehi habana nampehimukui nampaewa dohami. 5 Nemo mikalingani patudu Alatala to iulika-Na komi halaku ana-ana-Na. Iwei iuli-Na,“Ana-ana-Ku, pairara belo mpuu patudu Pue,
pade nemo mahau rarami ane Napakahodo komi.
6 Apa Pue nopatudu tauna to laipotowe-Na,
pade nampaweba tauna to laipangaku-Na ana-ana-Na.”
7 Kana mantaha komi rara kahehaa, apa kahehaa ee mai mamala rauli peweba Alatala hi komi to laipowali-Na ana-Na. Apa moma naria ngana to moma laiweba tuamana. 8 Naupawee ane moma komi raweba ewa to lairasaira ngana-ngana ntanina, moma komi anana mpuu, naupawee ana to ntanina. 9 Lako hi tuamata i dunia ei laitarimata peweba pade laibilatara. Neparauli hi Tuamata to i huruga. Kana matundu mpuuta hi Hia bona tatarima katuwua to moma maria kahuduana. 10 Tuamata i dunia nopatuduta hangoni aga mantuku napa to laipekirira nabelo. Naupawee Alatala nopatuduta bona mabelo katuwuta pade mamalata matuwu magaha ewa Hia. 11 Moma ami naria peweba to laiwaikata nampakasana rarata, wule nampakadua rarata. Naupawee, ane tapairara oa patudu lauria, manoromi ingkuta pade manonemi katuwuta.
12 Etumo, pakaroho rarami pade peparahayami to nalente. 13 Batena motomoko momako i dala to nakono bona paamu to nalente moma matepapunga, naupawee mawali marohoki.
14 Pehimukui mpuu matuwu mohingkabelo hante tau ntanina pade matuwu magaha, apa moma hema haduaa mampahilo Pue ane moma magaha katuwuna. 15 Kana mainga komi, nemo maria haduaa to mentuu meharumaka hi Alatala pade moma mantarima kabohe towe Alatala, bona nemo maria lako hi komi to madaa rarana to mampopeumba pogehoa pade mampakadoha madea tauna. 16 Nemo maria tauna to mogau hala ba mampomaihi gagu dunia. Apa ane iwee ingkuta, nahibalita hante Esau to nampobalu bagiana halaku ana ulumbua hante hancuraya konia. 17 Apa laincanimi motomi, naratapi tempona Esau rawaika rahi halaku ana ulumbua, rahi ee momami laiwaika hi hia, naupa laiperapina hante keona. Moma'i laiwaika apa momami naria logana nobaliki kahalaana.
Potipa Alatala to nabou i Bulu Sion neliupi kabelona lako potipa Alatala to nahae i Bulu Sinai
18 Ompi-ompi, moma komi nahibali hante to Israel owi, to kana rau i Bulu Sinai mampotomuka Pue. Bulu Sinai ee mai bulu biaha. Tempora rau nampotomuka Pue i bulu ee, naria apu to nabohe baana, kalimaua pade ngolu bohe nantawiri. 19 Laiepera moni tarompe to narimboho pade to pojarita nahimuku hampena laiperapira bona nemopi mojarita hi hira. 20 Apa moma ibukura nangepe parenta to laiuli to pojarita ee, iwei, “Ane maria to rau i bulu ee, belo manuhia, belo binata, kana rawunu hante watu hampe mamate.” 21 Nepaekai mpuu napa to laihilora to Israel ee hampena Musa moto nanguli, “Nokaridi'a keni ekaku.”
22 Naupawee naratamo komi i Bulu Sion, i ngata Alatala to natuwu, Yerusalem to i huruga, i kahiromua to naroa, hante ncobuna malaeka Alatala. 23 Naratamo komi hi todea to laitiroi Alatala halaku ana ulumbua, to hangara laitulihi i huruga. Naratamo komi notomu hante Alatala to nampabotuhi humawee tauna. Naratamo komi notomu hante tau-tauna to nanoro to namateramo, to laipakagaha Alatala pade laibabei-Na moma nakahalaia. 24 Naratamo komi hi Yesus to nampaoloti Alatala hante manuhia nantuku potipa to nabou. Pade naratamo komi mantarima titi raa-Na to nampakagahata. Raa Yesus ee mai nampojarita poampuni doha. Aji, raa Yesus ee neliupi kabelona lako raa Habel to nekakai namperapi pobalahi kamatena.
25 Etumo, kana mainga komi. Nemo hampe moma komi madota mangepe lolita Alatala. Hema-hema to moma nadota nangepe peboha Alatala to laiparata Musa owi i dunia ei, momara natebakaha lako pehuku Alatala. Neparauli kita to nangepe Alatala nololita lako huruga, ane momata madota mangepe-'I natantu amimi Nahukuta. 26 Tempo ee mai, pojarita Alatala nampopolengka dunia. Naupawee, tempo ei Hia notipa iwei, “Hangkanipi Kulengka dunia, moma wuwu dunia, hante langi muipi.” 27 To laiuli “hangkanipi,” batuana Alatala mei mampakaropu humawee to laipajadi-Na i dunia ei to namala lailengka. To maboli, to moma namala lailengka aga.