پرڀُو يسُوع رو ڪوڙھئي نَي ݾاجو ڪرڻ
8
جڏي پرڀُو يسُوع جبل ݾون ھيٺو اُتريو، تو تموم گھڻا مِنک اُوئي لاري بيوَڻ لاگا۔ 2 پَڇي اوچتو ھيڪ مِنک پرڀُو يسُوع ڪڍي آيو، جڪَي نَي ڪوڙھ رِي بيمارِي ھتِي۔ او پرڀُو يسُوع رَي پگون ۾ کِريو ھانَ ڪيوَڻ لاگو ڪہ، ”اي پرڀُو، جي ٿارِي مرضِي ھووَي، تو مھنَي ݾاجو ڪري آڇو اُوجݪو ڪر۔“ 3 اِيئي تي پرڀُو يسُوع آپرو ھاٿ اُوئي ماٿَي راکي ڪھيو ڪہ، ”مھارِي مرضِي ھَي ڪہ تُو ݾاجو ھو۔“ اِيئي تي او يڪدم ڪوڙھ رِي بيمارِي ݾون ݾاجو ھويو۔ 4 پرڀُو يسُوع اُوئي نَي ڪھيو ڪہ، ”خبردار، اَي بات ڪينَي ڀِي نِي ݾُڻائي ڪہ مھَي ٿنَي ݾاجو ڪيئو ھَي، پڻ جائي آپنَي ايشوَر رَي پُوجاري نَي بتا ھانَ او چڙھائو ڪر، جڪَي رَي بارَي ۾ مُوسيٰ رَي شاستر ۾ حُڪم ھَي، جڪَي ݾون ݾجون نَي خبر پڙَي ڪہ تُو ݾاجو ھويو ھَي۔“رُومي صُوبيدار رو وِشواس
5 پَڇي پرڀُو يسُوع ڪفرنَحُوم شھر ۾ آيو۔ اوٿ اُوئي ڪڍي ھيڪ رُومي صُوبيدار آيو ھانَ اُوئي نَي مِنٿ ڪري ڪيوَڻ لاگو ڪہ، 6 ”اي پرڀُو، مھارو غُلوم اَڌرنگَي رِي بيمارِي رَي ڪري گھر ۾ پڙيو ھَي ھانَ تموم گھڻو پريشون ھَي۔“ 7 تو پرڀُو يسُوع اُوئي نَي ڪھيو ڪہ، ”ھُون آئي، اُوئي نَي ݾاجو ڪرين۔“ 8 صُوبيدار ڪھيو ڪہ، ”اي پرڀُو، ھُون اِيئي رَي لائق ڪونھي ڪہ ٿي مھارَي گھري آئو۔ ٿي رُگو ايٿ ݾون ڪو، تو مھارو غُلوم ݾاجو ھوئي جاشَي۔ 9 مھنَي خبر ھَي ڪہ اِختياري ڪِي ھَي، ڪيونڪہ ھُون آپ حڪُومت ھيٺا ھون ھانَ فوجي مھارَي ھيٺا ھَي۔ جڏي ھُون ڪينَي ڪونھ ڪہ جا، تو او جاوَي ھَي ھانَ جي ڪينَي ڪونھ ڪہ آ، تو او آوَي ھَي۔ اِيئي نمُونَي جڏي ھُون آپرَي غُلوم نَي ڪونھ ڪہ اَي ڪوم ڪر، تو او ڪرَي ھَي۔“ 10 اَي بات ݾُڻي پرڀُو يسُوع تموم گھڻو حيرون ھويو ھانَ پاڇل ڦوري لاري آوڻ آݪَي مِنکون نَي ڪھيو ڪہ، ”ھُون ٿونَي ݾاچِي ڪونھ ھون ڪہ مھَي اترَي موٽَي وِشواس آݪو مِنک آپرِي اِسرائيلي قوم ۾ ڪڏي ڀِي ڪونھي ڏيٺو۔ 11 ھُون ٿونَي ڪونھ ھون ڪہ تموم گھڻا مِنک اُوگوڻَي آٿوڻَي ݾون آشَي ھانَ آپڻَي ٻاپ ڏاڏَي اڀراھيم، اضحاق ھانَ يعقُوب ڀيڙا آڪاش رِي بادشاھي رِي دعوت ۾ ڀيڙا ھوشَي۔ 12 پڻ اِسرائيلي قوم آݪا، جڪو آپنَي اُوئي رِي بادشاھي را حقدار ݾمجَھي ھَي، اُوئون نَي ٻاھر انڌارَي ۾ نوکيا جاشَي، جيٿ او روشَي ھانَ ڏونت پيݾتا ريشَي۔“ 13 پَڇي پرڀُو يسُوع صُوبيدار نَي ڪھيو ڪہ، ”گھري جا، جون ٿارو وِشواس ھَي، اِيئوج ٿارَي ݾارُو ھوئي جاشَي۔“ تو اُوئيج ٽيم صُوبيدار رو غُلوم ݾاجو ھوئي گيو۔
پرڀُو يسُوع رو تموم گھڻا مِنک ݾاجا ڪرڻ
14 پَڇي جڏي پرڀُو يسُوع پطرس رَي گھري آيو، تو اُوئي ڏيٺو ڪہ اُوئي رِي ݾاݾُو تا ۾ پڙِي ھَي۔ 15 پرڀُو يسُوع اُوئي نَي ھاٿ لگايو، تو يڪدم اُوئي رو تا اُتري گيو ھانَ او اُٺي پرڀُو يسُوع رَي ݾارُو ݾيڌو ڪرڻ لاگِي۔
16 جڏي شام ھوئِي، تو مِنک پرڀُو يسُوع ڪڍي تموم گھڻا ڀُوت لاگوڙا مِنک لي آيا۔ پرڀُو يسُوع حُڪم ڏي ڀُوت ڪاڍيا ھانَ جڪو بيمار ھتا اُوئون ݾجون نَي ݾاجا ڪيئا۔ 17 اُوئي اَي ڪوم ڪري يسعياھ نبِي رِي بات پُورِي ڪِي ڪہ،
”اُوئي مھورا ڏُک آپ تي کڻيا
ھانَ مھورَي بيمارَي مِٽائَي۔“
پرڀُو يسُوع رو ݾاچو چيلو
18 جڏي پرڀُو يسُوع آپرَي چوڌاري تموم گھڻا مِنک ڏيٺا، تو اُوئي آپرَي چيلون نَي ڊنڍ رَي پيلوڙَي پاݾَي ھالڻ رو حُڪم ڏينو۔ 19 تو ھيڪ ڌرمي گُرو، پرڀُو يسُوع ڪڍي آيو ھانَ ڪھيو ڪہ، ”اي گُرو جِي، ٿي جيٿ ڀِي جاشو ھُون ٿونرو چيلو ھوئي ٿون لاري بيتو رئين۔“ 20 پرڀُو يسُوع اُوئي نَي ڪھيو ڪہ، ”لوڪيئون رَي ڏرون ھووَي ھَي ھانَ پکيون را آݪا ھووَي ھَي پڻ مھَي، مُنش پُتر رَي ݾارُو ماٿو لِڪاوڻ رِي ڀِي جگھا ڪونھي ھَي۔“ 21 پَڇي ھيڪَي ٻيجَي چيلَي اُوئي نَي ڪھيو ڪہ، ”اي پرڀُو، مھنَي موڪل ڏي، تو ھُون پيل جائي آپرَي اَبا رِي شيوا چاڪرِي ڪرون جڪو مرڻ آݪو ھَي۔ اُوئي نَي مٽِي حوالي ڪرڻ ݾون پَڇي ھُون ٿارو چيلو ھوئي ٿارَي لاري بيتو رئين۔“ 22 پرڀُو يسُوع اُوئي نَي ڪھيو ڪہ، ”تُو مھارَي لاري بَي، مُڙدون نَي ڇوڙ، تو ڀلي جائي آپرا مُڙدا ٻُورَي۔“
پرڀُو يسُوع رو طُوفون نَي بند ڪرڻ
23 پَڇي پرڀُو يسُوع ٻيڙِي ۾ چڙھيو ھانَ اُوئي را چيلا ڀِي اُوئي ڀيڙا بَئير ھويا۔ 24 پَڇي پرڀُو يسُوع ݾُوئي رھيو ھانَ اوچتو ڊنڍ ۾ موٽو طُوفون آيو ھانَ ڇوليون ݾون ٻيڙِي ٻُوڏڻ لاگِي۔ 25 پَڇي چيلون جائي پرڀُو يسُوع نَي جگائي ڪھيو ڪہ، ”اي پرڀُو، مھونَي بچائو، ڪيونڪہ مھي ٻُوڏڻ آݪا ھون۔“ 26 اِيئي تي پرڀُو يسُوع چيلون نَي ڪھيو ڪہ، ”ٿي ڪيئون ٻيئاجو ھو، ٿونرو وِشواس ڪيٿ ھَي؟“ پَڇي پرڀُو يسُوع اُٺيو، طُوفون ھانَ پوڻي رَي ڇوليون نَي دڙڪو ڏينو، تو ٺاپر ھوئي گئِي۔ 27 چيلا حيرون ھوئي آپت ۾ ڪيوَڻ لاگا ڪہ، ”اَي ڪھڙو مِنک ھَي جڪو طُوفون ھانَ پوڻي نَي حُڪم ڏَي ھَي ھانَ او ڀِي اِيئي رِي منَي ھَي؟“
ٻيئون مِنکون ݾون ڀُوت ڪاڍڻ
28 پَڇي پرڀُو يسُوع ھانَ اُوئي را چيلا گليل ڊنڍ رَي پيلوڙَي پاݾَي گدرينيون رَي علائقَي ۾ پُگا، تو اوٿ ٻي مِنک مُڪومون ݾون نڪري پرڀُو يسُوع ڪڍي آيا۔ اُوئون ٻيئون نَي تموم گھڻا خطرناڪ ڀُوت لاگوڙا ھتا۔ او ڀُوت اِترا تو خطرناڪ ھتا ڪہ اُوئي مارگ ݾون ڪو ڀِي ڪونھي مَٽتو۔ 29 پرڀُو يسُوع نَي ڏيکي او رڙَي ڪري ڪيوَڻ لاگا ڪہ، ”اي ايشوَر را ڏيڪرا، ٿارو مھون ݾون ڪھڙو واسطو؟ تُو ڪيئون ٽيم ݾون پيل مھونَي ايذا ڏيوَڻ آيو ھَي؟“ 30 اوٿ ݾون ڪئين اݪگو ھيڪ ݾُوئرون رو موٽو ڌڻ چرتو پڙيو۔ 31 ڀُوتون، پرڀُو يسُوع نَي مِنٿ ڪري ڪھيو ڪہ، ”جي تُو مھونَي ڪاڍَي ھَي، تو مھونَي اِيئي ݾُوئرون رَي ڌڻ ۾ ميل۔“ 32 تو پرڀُو يسُوع اُوئون نَي ڪھيو ڪہ، ”ڀلي جائو۔“ پَڇي ڀُوت اُوئون ݾون نڪري ݾُوئرون ۾ گيا ھانَ ݾجائِي ݾُوئر جبل ݾون ناݾتا ھيٺا جائي ڊنڍ ۾ کِريا ھانَ ٻُوڏي مُوئا۔