سنت مرقس رو شاستر
تعارف
سنت مرقس اَي شاستر اندازن سن 50 ݾون 60 عيسوِي رَي بِچ ۾ رُوم مُلڪ ݾون لِکيو ھتو۔ سنت مرقس رو پُورو نون يُوحنا مرقس ھتو۔ اُوئي سنت پولُوس ھانَ برنباس ڀيڙو مِلي پرچار رو ڪوم ڪيئو ھتو۔ سنت مرقس شرُوع ۾ پرچار رَي ڪوم ۾ سنت پطرس ڀيڙو ڀِي ھتو ھانَ جڪو باتون پطرس پرچار رَي ٽيم مِنکون نَي ݾُڻاوتو، سنت مرقس او باتون ياد راکئَي۔ دانا مِنکون رَي خيال ۾ اَي شاستر، متِي رَي شاستر، لُوقا رَي شاستر ھانَ يُوحنا رَي شاستر ݾون پيل لِکيوڙو ھَي۔
سنت مرقس اِيئي شاستر ۾ پرڀُو يسُوع رَي ݾيکايوڙَي باتون ݾون ٽاݪ وڌيڪ پرچون رَي بارَي ۾ لِکيو ھَي۔ سنت مرقس اَي ڀِي لِکيو ڪہ پرڀُو يسُوع رو ݾجون ݾون موٽو ھانَ قُدرت آݪو پرچو يعني اُوئي رو ڏُک ڏيکڻ، موت ھانَ مُوئوڙون ݾون جيتو ھوئڻ ھَي۔ پرڀُو يسُوع رَي باتون ھانَ پرچا اِيئي باتون رو ثبُوت ھَي ڪہ او ݾاچيلي ايشوَر رو ڏيڪرو ھَي۔
خاص مضمُون
پويتر سِنون ڏيوَڻ آݪَي يُوحنا رو پرچار 1:1-13
پرڀُو يسُوع رو گليل صُوبَي ۾ پرچار 1:14-9:50
پرڀُو يسُوع رو يروشلم شھر ڏيݾا جاوڻ 11:1-13:37
پرڀُو يسُوع نَي جھالڻ ھانَ اُوئي رِي موت 14:1-15:47
پرڀُو يسُوع رو مُوئوڙون ݾون جيتو ھوئڻ 16:1-8
پرڀُو يسُوع را درشن ھانَ آڪاش تي جاوڻ 16:9-20