سنت متِي رو شاستر
تعارف
سنت متِي اَي شاستر اندازن سن 55 ݾون 65 عيسوِي رَي بِچ ۾ انطاڪيا شھر ݾون لِکيو ھتو۔ سنت متِي پرڀُو يسُوع رَي ٻارھَي خاص چيلون ۾ ھيڪ ھتو، جڪَي نَي لاوِي ڀِي ڪيتا۔ او پيل ناڪو ليوَڻ آݪو ھتو۔ جڏي پرڀُو يسُوع اُوئي نَي ھيلو ڪيئو، تو او اُوئي رو چيلو ھوئي اُوئي لاري بيوَڻ لاگو۔ اُوئي اِيئي شاستر ۾ پرڀُو يسُوع رِي زندگِي، پرچا، ݾيکايوڙَي باتون ھانَ پرچار رَي بارَي ۾ لِکيو۔
سنت متِي 28:19-20 ۾ پرڀُو يسُوع رو ڏينوڙو اَي خاص حُڪم ڀِي لِکيو جڪَي ۾ پرڀُو يسُوع ڪھيو ھتو ڪہ، ”ٿي جائو ھانَ ݾجَي قومون نَي مھارا چيلا ٺائو۔“
سنت متِي اَي شاستر اِيئي رَي ڪري لِکيو ڪہ او يھُودي اَگووڻون تي اَي بات ثابت ڪرَي ڪہ رُگو پرڀُو يسُوع مَسيح، ايشوَر رو چُونڊيوڙو بادشاھ ھَي جڪَي رو واعدو ايشوَر ڪيئو ھتو۔ اِيئي رَي ڪري سنت متِي پرڀُو يسُوع نَي دائُود بادشاھ ھانَ اڀراھيم نبِي رِي پيڙھِي ݾون ݾُڻايو ھَي۔ اُوئي پرڀُو يسُوع رِي زندگِي رَي بارَي ۾ پِروڻَي شاسترون ۾ اگڪٿَي ھانَ ٻيجَي باتون رَي بارَي ۾ ڀِي ݾُڻايو ھَي۔
اِيئي شاستر رَي مُطابق پرڀُو يسُوع ھيڪ ݾاچو گُرو ھَي۔ پرڀُو يسُوع جڪو ڪئين ݾيکايو اُوئي ۾ خاص بات آڪاش رِي بادشاھي ھَي۔
خاص مضمُون
پرڀُو يسُوع رِي پيڙھِي ھانَ اُوئي رو جنم 1:1-2:23
پويتر سِنون ڏيوَڻ آݪَي يُوحنا رو پرچار 3:1-12
پرڀُو يسُوع رو پويتر سِنون ليوَڻ ھانَ آزمُوتو 3:13-4:11
پرڀُو يسُوع رو گليل صُوبَي ۾ پرچار ڪرڻ 4:12-18:35
پرڀُو يسُوع رو گليل ݾون يروشلم ڏيݾا جاوڻ 19:1-20:34
پرڀُو يسُوع رِي موت، پيلڪو ھفتو21:1-25:46
پرڀُو يسُوع رِي موت 26:1-27:66
پرڀُو يسُوع رو جيتو ھوئڻ ھانَ آڪاش تي جاوڻ 28:1-20