ٻيج ڇٽڻ آݪَي رو مِثال
4
پرڀُو يسُوع ھيڪ گُھمرو گليل ڊنڍ رَي ڪپ تي ݾيکاوڻ لاگو۔ اُوئي رَي چوڌاري اِترا تو مِنک آئي ڀيڙا ھويا ڪہ او جائي ھيڪِي ٻيڙِي ۾ چڙھي ٻيٺو ھانَ ݾجائِي مِنک ڪپ تي اُڀي رھيا۔ 2 پرڀُو يسُوع اُوئون نَي تموم گھڻَي مِثالون ڏي ݾمجھايو ھانَ ݾيکاوڻ لاگو ڪہ، 3 ”ڌھيون ڏي ݾُڻو۔ ھيڪ ھاݪِي ٻيج ڇٽڻ گيو۔ 4 ٻيج ڇٽتَي بِݪا ڪئين ڏوڻا مارگ تي کِريا ھانَ پکيون اُوئون نَي چُگي ليئا۔ 5 ڪئين ڏوڻا پٿرون آݪِي ٻنِي ۾ کِريا جيٿ گھڻو بَنجُھو نِي ھوئڻ رَي ڪري او ڇيڪا اُگا۔ 6 جڏي ݾُورج نڪريو، تو او ڪُوماٽيجي گيا ھانَ اُونڏِي پاݪ نِي ھوئڻ رَي ڪري ݾُوڪي گيا۔ 7 ڪئين ڏوڻا ڪانڊيرون ۾ کِريا، ڪانڊيرا ڀِي اُوئون ڀيڙا بڌڻ لاگا پڻ ڪانڊيرون اُوئون نَي بڌڻ ڪونھي ڏينو ھانَ نَڪو اُوئون ۾ ڦل لاگو۔ 8 ڪئين ڏوڻا ڀلِي ٻنِي ۾ کِريا ھانَ او اُگا، ڪَي ۾ ٽيھ ڏوڻا تو ڪَي ۾ سٺ تو ڪَي ۾ ݾئو ڏوڻا لاگا۔“ 9 اَي مِثال ݾُڻائي پرڀُو يسُوع ڪھيو ڪہ، ”ݾُڻڻ آݪا ݾمجَھي را۔“مِثالون ۾ ݾُڻاوڻ رو مقصد
10 جڏي پرڀُو يسُوع ھيکلو ھتو، تو اُوئي رَي ٻارھون چيلون ھانَ ٻيجون چيلون اُوئي ݾون مِثال رو مطلب پُوڇو۔ 11 پرڀُو يسُوع اُوئون نَي بݪتِي ڏينِي ڪہ، ”ايشوَر تو ٿونَي آپرِي بادشاھي رَي ڀيدون رِي ݾمجھ ڏينِي ھَي پڻ ٻيجون نَي ھُون مِثالون ڏي ݾُڻائُون ھون، 12 اِيئي رَي ڪري ايشوَر رَي شاستر رِي اَي بات پُورَي ھووَي ڪہ،
’او جوتا ريشَي پڻ اوݪکَي ڪونھي
ھانَ ݾُڻشَي پڻ ݾمجَھي ڪونھي۔
متان اِيئون نِي ھووَي ڪہ او مھَي ڏيݾا ڦِرَي
ھانَ ھُون اُوئون نَي معاف ڪرون۔‘“
ٻيج ڇٽڻ آݪَي مِثال رو مطلب
13 پَڇي پرڀُو يسُوع آپرَي چيلون نَي ڪھيو ڪہ، ”ڪِي ٿي اِيئي مِثال رو مطلب ڪونھي ݾمجھتا، تو پَڇي ٿي ٻيجَي ݾجَي مِثالون رو مطلب ڪيڪر ݾمجھشو؟ 14 اِيئي مِثال ۾ ٻيج رو مطلب ھَي، ايشوَر رَي باتون۔ 15 جڪَي مارگ تي ڏوڻا کِريا، او مارگ اھڙا مِنک ھَي جڪو ايشوَر رَي باتون ݾُڻَي ھَي پڻ شيطون آئي اُوئون رَي من ݾون ايشوَر رَي باتون ڪاڍي لَي ھَي۔ 16 اِيئي نمُونَي پٿرون آݪِي ٻنِي، جيٿ ڏوڻا کِريا، اھڙا مِنک ھَي جڪو ايشوَر رَي باتون ݾُڻَي ھَي ھانَ اُوئيج ٽيم اُوئي نَي خُوشِي ݾون منَي ھَي۔ 17 پڻ او پاݪ ڪونھي جھالتا ھانَ ٿوڙَي ٽيم رَي ݾارُو وِشواس راکَي ھَي ھانَ جڏي ڪو آزمُوتو ھووَي ھَي، تو او ڦِري جاوَي ھَي۔ 18 جڪو ڏوڻا ڪانڊيرون آݪِي ٻنِي ۾ کِريا، او ٻنِي اھڙا مِنک ھَي جڪو ايشوَر رَي باتون ݾُڻَي تو ھَي، 19 پڻ دُنيا رَي گِڻتَي ھانَ ڌن رو لالچ ايشوَر رَي باتون نَي دٻائي ڇوڙَي ھَي ھانَ اُوئون ۾ ڪو ڀِي ڦل ڪونھي لاگتو۔ 20 جڪو ڏوڻا ڀلِي ٻنِي ۾ کِريا، او ٻنِي اھڙا مِنک ھَي جڪو ايشوَر رَي باتون ݾُڻَي ھانَ منَي ھَي ھانَ اُوئون ۾ ڦل ڀِي لاگَي ھَي، ڪَي ۾ ٽيھ، ڪَي ۾ سٺ تو ڪَي ۾ ݾئو ڏوڻا لاگَي ھَي۔“
ڏِيئي رو مِثال
21 پَڇي پرڀُو يسُوع اُوئون نَي ڪھيو ڪہ، ”ڪِي ڪو مِنک ڏِيئو ٻاݪي ڪَي ٺون ھيٺا جون ڪَي موچَي ھيٺا راکَي ھَي؟ نا، پڻ اُوئي نَي اھڙِي جگھا تي راکَي ھَي جيٿ ݾون اُجاݪو ھووَي، 22 ڪيونڪہ ڪو ڀِي لِڪيوڙِي شئي اھڙِي ڪونھي جڪو ظاھر نِي ڪِي جاوَي ھانَ ڪو ڀِي اھڙو ڀيد ڪونھي جڪَي رِي خبر نِي پڙَي ھانَ او پَڌرو نِي ڪيئو جاوَي۔ 23 ݾُڻڻ آݪا ݾمجَھي را۔“
24 پرڀُو يسُوع اُوئون نَي اَي ڀِي ڪھيو ڪہ، ”مھارَي باتون ڌھيون ڏي ݾُڻو۔ جڪَي ماپَي ݾون ٿي ماپو ھو، اُوئيج ماپ ݾون ايشوَر ٿونَي ڏيشَي پڻ اُوئي ݾون ڀِي وڌيڪ ڏيشَي، 25 ڪيونڪہ جڪَي ڪڍي ايشوَر رَي باتون رِي ݾمجھ ھَي اُوئي نَي وڌيڪ ڏينِي جاشَي پڻ جڪَي ڪڍي ايشوَر رَي باتون رِي ݾمجھ ڪونھي اُوئي ݾون او ݾمجھ ڀِي کوݾِي جاشَي جڪو اُوئي ڪڍي ھَي۔“
ٻيج اُگڻ رو مِثال
26 پَڇي پرڀُو يسُوع ڪھيو ڪہ، ”ايشوَر رِي بادشاھي رِي مِثال ھيڪَي ھاݪِي آݪِي ڪار ھَي جڪَي آپرِي ٻنِي ۾ ٻيج ڇٽيو۔ 27 اُوئي ݾون پَڇي او ڀلي ݾُوئَي جون جاگَي پڻ ٻيج ھاڦي اُگَي ھانَ موٽو ھووَي ھَي ھانَ اُوئي مِنک نَي اُوئي رِي ڪو ڀِي خبر ڪونھي پڙتِي۔ 28 ٻنِي ݾون پوک ھاڦي اُگَي ھَي۔ پيل پونَ، پَڇي ݾِٽا ھانَ پَڇي ٻيج نڪرَي ھَي۔ 29 پڻ پوک پڪڻ ݾون پَڇي او مِنک ڏاترَي ݾون لُڻَي ھَي ڪيونڪہ لٻارَي رو ٽيم ھووَي ھَي۔“
ݾَرݾيون رَي ٻيج رو مِثال
30 پَڇي پرڀُو يسُوع ڪھيو ڪہ، ”ايشوَر رِي بادشاھي ڪھڙِي ھَي ھانَ ھُون اُوئي نَي ڪَي ݾون ڀيٽائُون؟ 31 او ݾَرݾيون رَي ٻيج آݪِي ڪار ھَي۔ جڏي او پوکيو جاوَي، تو او ݾجَي ٻيج ݾون نِنيو ھووَي ھَي۔ 32 پڻ جڏي اُگَي ھَي، تو او ݾجَي بَڻون ݾون موٽو ھووَي ھَي ھانَ اُوئي رَي ٽاݪَي اترَي تو موٽَي ھووَي ھَي ڪہ پکي اُوئي رِي ڇان ۾ آݪا ٺاوَي ھَي۔“ 33 پرڀُو يسُوع تموم گھڻَي مِثالون ڏي مِنکون نَي ايشوَر رَي باتون ݾُڻاوتو ڪہ او ݾمجھي ݾگھَي۔ 34 او مِثالون ݾون ٽاݪ اُوئون ݾون ڪو ڀِي باتون ڪونھي ڪرتو پڻ ھيکلائي ۾ آپرَي چيلون نَي ݾجَي باتون رو مطلب ݾمجھاوتو۔
پرڀُو يسُوع رو طُوفون نَي بند ڪرڻ
35 اُوئي ڏِن شام رو پرڀُو يسُوع آپرَي چيلون نَي ڪھيو ڪہ، ”ھالو تو آپي ڊنڍ رَي پيلوڙَي پاݾَي ھالون۔“ 36 پَڇي چيلا مِنکون نَي اوٿج ڇوڙي اُوئي ٻيڙِي ۾ چڙھيا جڪَي ۾ پرڀُو يسُوع پيل ٻيٺو ھتو ھانَ چيلا اُوئي نَي آپ ڀيڙو لي گيا۔ اُوئون ڀيڙَي ٻيجَي ٻيڙَي ڀِي ھتَي۔ 37 اوچتو ڊنڍ ۾ موٽو طُوفون آيو ھانَ ڇوليون رَي ڪري ٻيڙِي ٻُوڏڻ لاگِي۔ 38 پرڀُو يسُوع ٻيڙِي ۾ لاري اوݾيݾو ݾِروٿيئَي راکي اُونگاجوڙو ھتو۔ تو چيلون آئي اُوئي نَي جَگايو ھانَ ڪھيو ڪہ، ”گُرو جِي، مھي تو ٻُوڏڻ آݪا ھون، ٿونَي مھورو ڪو ڀِي فِڪر ڪونھي؟“ 39 اِيئي تي پرڀُو يسُوع اُٺي طُوفون نَي دڙڪو ڏينو ھانَ پوڻي رَي ڇوليون نَي حُڪم ڏينو ڪہ، ”اُڀي رو۔“ تو طُوفون يڪدم اُڀي رھيو ھانَ ٺاپر ھوئي گئِي۔ 40 پَڇي پرڀُو يسُوع اُوئون نَي ڪھيو ڪہ، ”ٿي ڪيئون ٻيئاجو ھو؟ اَڃون توڻي ٿونرو وِشواس ڪيٿ ھَي؟“ 41 اِيئي تي او تموم گھڻا ٻيئاجا ھانَ آپت ۾ ڪيوَڻ لاگا ڪہ، ”اَي ڪھڙو مِنک ھَي جڪو طُوفون ھانَ پوڻي نَي حُڪم ڏَي ھَي ھانَ او ڀِي اُوئي رِي منَي ھَي؟“