پرڀُو يسُوع رو اَڌرنگَي نَي ݾاجو ڪرڻ
9
پَڇي پرڀُو يسُوع ٻيڙِي ۾ چڙھيو ھانَ ڊنڍ پار ڪري پاڇو آپرَي شھر ڪفرنَحُوم ۾ آيو۔ 2 ڪئينڪہ مِنک ھيڪَي اَڌرنگَي نَي جھوݪِي ۾ گھاتي لي آيا۔ جڏي پرڀُو يسُوع اُوئون رو اِترو وِشواس ڏيٺو، تو بيمار نَي ڪھيو ڪہ، ”ڏيڪرا، ھِمت راک، ٿارا پاپ معاف ھويا را۔“ 3 اِيئي تي ڌرمي گُرو آپرَي من ۾ ݾوچڻ لاگا ڪہ، ”اَي ڪُڻ ھَي جڪو آپنَي ايشوَر ݾمجَھي ھَي؟“ 4 پرڀُو يسُوع اُوئون رِي ݾوچ ݾمجھي گيو ھانَ اُوئون نَي ڪھيو ڪہ، ”ٿي آپرَي من ۾ بُڇڙَي باتون ڪيئون ݾوچو ھو؟ 5 ڪِي اَي ڪيوَڻ ݾَوَلو ھَي ڪہ، ’ٿارا پاپ معاف ھويا را‘ جون اَي ڪيوَڻ ڪہ، ’اُٺي گُھم ڦِر؟‘ 6 پڻ ھُون ٿونَي ڪري بتائين ڪہ ھُون مُنش پُتر ھون ھانَ مھنَي ڌرتي تي پاپ معاف ڪرڻ رِي اِختياري ھَي۔“ پَڇي پرڀُو يسُوع اُوئي بيمار نَي ڪھيو ڪہ، ”ھُون ٿنَي ڪونھ ھون ڪہ اُٺِي ھانَ آپرِي جھوݪِي کڻ ھانَ آپرَي گھري جا۔“ 7 اِيئي تي او مِنک اُٺيو ھانَ آپرَي گھري بُوئو گيو۔ 8 اَي جوئي ݾجائِي مِنک تموم گھڻا ٻيئاجا ھانَ ايشوَر رِي بڏائي ڪري ڪيوَڻ لاگا ڪہ، ”ايشوَر، اِنسون نَي تموم گھڻو اِختيار ڏينو ھَي۔“پرڀُو يسُوع رو متِي نَي ھيلو ڪرڻ
9 پَڇي پرڀُو يسُوع اوٿ ݾون بَئير ھويو ھانَ مارگ ۾ اُوئي متِي نون رو ھيڪ مِنک ڏيٺو، جڪو ناڪو ليوَڻ آݪِي جگھا تي ناڪو ليتو پڙيو۔ پرڀُو يسُوع اُوئي نَي ڪھيو ڪہ، ”مھارو چيلو ھوئي مھارَي لاري بَي۔“ اِيئي تي متِي اُٺيو ھانَ پرڀُو يسُوع لاري بيوَڻ لاگو۔
10 پَڇي ھيڪَي گُھمرَي جڏي پرڀُو يسُوع آپرَي چيلون ڀيڙو متِي رَي گھري ٻاٽِي کاوتو پڙيو ھانَ تموم گھڻا ناڪو ليوَڻ آݪا ھانَ ٻيجا پاپي مِنک ڀِي اُوئون ڀيڙا اُوئي دعوت ۾ ٻاٽِي کاوتا پڙيا، 11 اَي جوئي فريسي مِنکون پرڀُو يسُوع رَي چيلون نَي ڪھيو ڪہ، ”ٿونرو گُرو ناڪو ليوَڻ آݪون ھانَ پاپيون ڀيڙو ڪيئون کاوَي ھَي؟“ 12 پرڀُو يسُوع اَي ݾُڻي اُوئون نَي اَي مِثال ݾُڻائِي ڪہ، ”ݾاجون ݾُورون نَي ڊاڪٽر رِي ضرُورت ڪونھي، پڻ بيمارون نَي۔ 13 ٿي جائي اَي بات جوئو ڪہ شاستر رِي اِيئي بات رو مطلب ڪِي ھَي ڪہ،
’مھنَي ٻَليدون نا، پڻ دايا وڻَي ھَي۔
ھُون اُوئون مِنکون رَي ݾارُو ڪونھي آيو، جڪو آپنَي نيڪ ݾمجَھي ھَي،
پڻ اُوئون رَي ݾارُو آيو ھون، جڪو آپنَي پاپي ݾمجَھي ھَي۔‘“
روزَي رَي بارَي ۾ سوال
14 پَڇي يُوحنا پويتر سِنون ڏيوَڻ آݪَي را چيلا، پرڀُو يسُوع ڪڍي آيا ھانَ پُوڇو ڪہ، ”مھي ھانَ فريسي مِنک، تو روزا راکون ھون، پڻ ٿارا چيلا روزا ڪيئون ڪونھي راکتا؟“ 15 پرڀُو يسُوع اُوئون نَي ڪھيو ڪہ، ”جترِي توڻي لاڏو جونَ ڀيڙو ھَي اُترِي توڻي ڪِي او ڏُک ڪرشَي؟ پڻ اھڙو ٽيم آشَي جڏي لاڏو اُوئون ݾون ڌار ڪيئو جاشَي، تو پَڇي او ضرُور روزا راکشَي۔ 16 ڪو ڀِي مِنک پِروڻَي گاڀون تي نُوئَي گاڀون رِي چتِي ڪونھي ڏَي۔ جي او اِيئون ڪرشَي، تو نُوئِي چتِي ڀيڙِي ھوئي پِروڻَي گاڀون نَي ڦاڙي ڇوڙشَي۔ 17 نَڪو تازو انگُورون رو رس پِروڻَي ڏيڙيون ۾ ڀرَي ھَي۔ جي اِيئون ڪرشَي، تو تازَي رس رَي پڪڻ رَي ڪري پِروڻَي ڏيڙَي ڀريجي ڦاٽي جاشَي، پَڇي ڏيڙَي ھانَ انگُورون رو رس ٻيئون رو زِيئون ھوئي جاشَي۔ اِيئي رَي ڪري تازو انگُورون رو رس نُوئَي ڏيڙيون ۾ ڀرَي ھَي ڪہ او ٻيئي بچي جاوَي۔“
يائير رِي ڏيڪرِي ھانَ بيمار لُگائِي
18 جڏي پرڀُو يسُوع اُوئون ݾون باتون ڪرتو پڙيو، تو ڀگتي گھر رو ھيڪ ݾردار اُوئي ڪڍي آيو ھانَ اُوئي رَي پگون ۾ کِري مِنٿ ڪرڻ لاگو ڪہ، ”ھڻوج مھارِي ڏيڪرِي مُئِي رِي، پڻ جي ٿي ھڻون ھالي اُوئي تي آپرو ھاٿ راکو، تو او جيتِي ھوئي جاشَي۔“ 19 اِيئي تي پرڀُو يسُوع ھانَ اُوئي را چيلا اُوئي ڀيڙا اُوئي رَي گھري جاوڻ لاگا۔
20 مارگ ۾ ھيڪ بيمار لُگائِي ھتِي، جڪَي نَي ٻارھَي ݾالون ݾون زنانِي بيمارِي ھتِي۔ او لُگائِي پرڀُو يسُوع لاري آئِي ھانَ اُوئي رَي گاڀون رَي پلَي نَي ھاٿ لگايو، 21 ڪيونڪہ اُوئي آپرَي من ۾ ݾوچو ھتو ڪہ، ”جي ھُون پرڀُو يسُوع رَي گاڀون نَي ھاٿ لگائين، تو ھُون ݾاجِي ھوئي جائين۔“ 22 پرڀُو يسُوع پاڇل ڦوري اُوئي لُگائِي ڏيݾا جويو ھانَ ڪھيو ڪہ، ”ڏيڪرِي، پريشون نِي ھو، ٿارَي وِشواس ٿنَي ݾاجِي ڪِي ھَي۔“ يڪدم او لُگائِي ݾاجِي ھوئي گئِي۔
23 جڏي پرڀُو يسُوع ݾردار رَي گھري پُگو ھانَ ڏيٺو ڪہ ڏُک آݪا ساز باجَي پڙيا ھانَ مِنکون رو موٽو ھُل ھَي، تو اُوئي ڪھيو ڪہ، 24 ”ݾجائِي ٻاھر جائو، ڇوڪرِي مُئِي ڪونھي، پڻ اُونگاجوڙِي ھَي۔“ اَي ݾُڻي ݾجائِي مِنک اُوئي تي ھَݾڻ لاگا۔ 25 مِنکون نَي ٻاھر ڪاڍڻ ݾون پَڇي پرڀُو يسُوع گھر ۾ گيو ھانَ ڇوڪرِي رو ھاٿ جھاليو، تو او اُٺي ٻيٺِي۔ 26 اَي بات ݾجَي علائقَي ۾ مشھُور ھوئِي۔
ٻيئون اونڌون نَي ݾاجا ڪرڻ
27 پَڇي پرڀُو يسُوع اوٿ ݾون بَئير ھويو، تو ٻي اونڌا اُوئي لاري آيا ھانَ رڙَي ڪري ڪيوَڻ لاگا ڪہ، ”اي دائُود بادشاھ را اولاد، مھون تي دايا ڪرو۔“ 28 جڏي پرڀُو يسُوع ھيڪَي گھر ۾ گيو، تو او ٻي اونڌا ڀِي اوٿ آيا۔ پرڀُو يسُوع اُوئون ݾون پُوڇو ڪہ، ”ڪِي ٿونرو وِشواس ھَي ڪہ ھُون ٿونَي ݾاجا ڪري ݾگھون ھون؟“ اُوئون ڪھيو ڪہ، ”ھاوي، پرڀُو جِي۔“ 29 پرڀُو يسُوع اُوئون رَي اونکيون تي ھاٿ لگائي ڪھيو ڪہ، ”اِيئوج ھووَي، جون ٿونرو وِشواس ھَي۔“ 30 اُوئيج ٽيم اُوئون رَي اونکَي ݾاجَي ھوئَي۔ پَڇي پرڀُو يسُوع اُوئون نَي پالي ڪھيو ڪہ، ”اَي بات ڪينَي ڀِي نِي ݾُڻايا۔“ 31 پڻ اُوئون جائي ݾجَي علائقَي ۾ پرڀُو يسُوع رِي اَي بات مشھُور ڪِي۔
گُونگَي نَي ݾاجو ڪرڻ
32 جڏي او ٻي اونڌا ݾاجا ھوئي ٻاھر جاوتا پڙيا، تو ڪئينڪہ مِنک ھيڪَي مِنک نَي لي آيا جڪو ڀُوت رَي ڪري گُونگو ھتو۔ 33 جڏي پرڀُو يسُوع اُوئي ݾون ڀُوت ڪاڍيو، تو او گُونگو ٻولڻ لاگو۔ ݾجائِي مِنک حيرون ھوئي ڪيوَڻ لاگا ڪہ، ”مھون اِسرائيليون ۾ اَگي ڪڏي ڀِي اِيئون ھوتَي ڪونھي ڏيٺو۔“ 34 پڻ فريسي مِنک ڪيوَڻ لاگا ڪہ، ”اَي تو ڀُوتون رَي ݾردار رِي مدد ݾون ڀُوت ڪاڍَي ھَي۔“
پرڀُو يسُوع رِي دايا
35 پرڀُو يسُوع ݾجَي شھرون ھانَ گون ۾ جائي يھُوديون رَي ڀگتي گھرون ۾ ݾيکاوتو ھانَ او آڪاش رِي بادشاھي رِي خُوشِي رِي خبر ݾُڻاوتو۔ او مِنکون رَي ھر نمُونَي رَي بيمارَي ھانَ ڏُک مِٽاوتو۔ 36 جڏي پرڀُو يسُوع مِنکون را ٽولا ڏيٺا، تو اُوئي نَي اُوئون تي دايا آئِي، ڪيونڪہ او اُوئون رڍون آݪِي ڪار ڏُک ۾ ھانَ بِنا سھاري ھتا، جڪون رو ڪو ڀِي ڌراڙ نِي ھووَي۔ 37 اِيئي تي پرڀُو يسُوع آپرَي چيلون نَي ڪھيو ڪہ، ”پوک تو گھڻِي ھَي، پڻ مزُور ٿوڙا ھَي۔ 38 اِيئي رَي ڪري پوک رَي مالڪ نَي مِنٿ ڪرو ڪہ آپرِي پوک رَي ݾارُو ٻيجا مزُور ميلَي۔“