Marĩkõ 1

Nyemut cĩ Abũnna cĩ

Marĩkõ

Irion Yoanẽ Batithta

(Bẽl Matewo 3:1-12; Luka 3:1-18; Yoanẽ 1:19-28)

Ẽẽn coo Nyemut cĩ Abũnna cĩ Ngẽrtĩ Nyekuco, Yesu Kiristo Ellioit. 2 Ĩthõng thĩ, balna eheeddi nyaragawa wũ balna ẽhẽẽd Ĩthaia eeti cĩ õthõõth molook cĩ Nyekuco athĩ ne,

“Kitionaci katĩ na Nyekuci et cĩ ẽẽn thooc cannĩ

kutuwuanei aniitia, kĩĩ katĩ kũũk kĩdĩmanek gõõl cunni.”

3 “Ẽgẽrẽny moloowĩ cĩ et ĩmma baatha cĩ õdõõĩ kak athĩ ne,

‘Ĩdĩmantek niigia gõõl cĩ Makayyiokto,

anycĩk gõõl cĩnnĩ kĩĩ mũrra.’ ”

4 Ma natẽ ikiyyia ilibak Yoanẽ Batithta eet baatha cĩ õdõõĩ kak, kĩĩ kuduwak eet vẽlẽk kennek ne, adiim thẽk nẽẽgẽ ngĩ õbõda kĩ Nyekuc, kĩĩ kagamit nẽẽgẽ batithimo, ĩthõng katĩ ẽnyẽktẽ thoothonniowa cĩgĩk cĩk gerthek. 5 Ma thĩ balna natẽ õõt meelitini cĩ eetu cĩ looc cĩ Yudea kĩ cĩk kõrõõk cĩ gaalawu cĩ Yeruthalẽmĩ ĩcĩ Yoanẽ, ĩthõng uduktiak ĩnõõnõ thoothonniok cĩk gerthek cĩgĩk, ĩthõng agameek nẽ ĩnõõgõ batithimo Lĩĩla cĩ Yordanĩ. 6 Ahimit thĩ balna Yoanẽ ceremua cĩk adĩmaniay ĩmmanẽy cĩk nyaakalo, ĩthõng ẽcẽb nyẽkẽdẽngõ, adak balna thĩ nẽ girroc kĩĩ kuduk lotec cĩ tõlõluanu kĩĩ dainit cĩnnĩ. 7 Aduwaai balna Yoanẽ eet ethei ne, “Aavĩ katĩ eeti ĩmma cĩ õwõbana aneeta cĩ ijiarya aneeta, cĩ woccia athii na cĩ kẽtẽmanona ngatĩ kõõganẽ laamũcẽ cĩk nakavacĩt cĩgĩnĩk. 8 Kagamecung na agiitia batithimo maamĩy, ĩthõng aku katĩ thĩ nẽ agamecung agiitia batithimo Ririwaca cĩ Dĩhĩmĩ.”

Abatithanẽ Yesu

(Matewo 3:13-17; Luka 3:21-22)

9 Ma itin nĩcẽ, aku balna Yesu õlõõ cĩ gaalawu cĩ Natharẽtĩ looca cĩ Galilea, ĩthõng ikiyyia agameek Yoanẽ Batithta ĩnõõnõ batithimo Lĩĩla cĩ Yordanĩ. 10 Ma thĩ tamanoko, baa ngĩ ẽtẽha Yesu maamĩy ngatĩvõrĩ, ẽdẽnya nẽ tammutiddin ngatĩ owine. Ĩthõng ikiyyia uluciak ĩnõõnõ Ririwacĩ loota cĩ aavĩ kĩ ballo. 11 Ma natẽ õthõõth thĩ moloowĩ ĩmma cĩ aku tammuatiddina a ne, “Eeni niia Ngẽrnanĩ cĩ kamĩnani õrrõt kũdũt, ĩthõng kebelbeli na, nyatarka aniitia.”

Yesu kĩ Thĩttan

(Matewo 4:1-11; Luka 4:1-13)

12 Ma balna tamanoko, ũũwĩ Ririwacĩ Yesu ngatĩvõrĩ baatha ĩcĩ õdõõĩ kak, 13 aavĩ balna nẽ natẽ wathinniok eet ramma, ma natẽ ikiyyia thĩ ĩtĩman Thĩttanĩ ĩnõõnõ. Arũmẽ balna Yesu kĩ kẽlẽgẽ cĩk bõõnak, ĩthõng arĩcana balna anjĩlẽta ĩnõõnõ.

Ũtũvvũ Yesu wobjiak cĩk ootinu

(Matewo 4:12-17; Luka 4:14-15)

14 Ma thĩ balna vurtia ĩcĩ arĩwothĩhĩ Yoanẽ kĩjan vẽlẽk, ikiyyia ũũk Yesu Galilea. Ĩthõng ũũk uduwak eet Nyemut cĩ Abũnna cĩ aku Nyekuca. 15 Õthõõth balna nẽ athĩ ne, “Õbõwẽ itini cĩ kabicoc cĩ Nyekuco ikiyyia. Ũtũngtek thoothonniok cuguk cĩk gerthek, ĩthõng oboddiawu elemtu Nyemut cĩ Abũnna cĩ Nyekuco.”

Ẽbẽra Yesu eet wec cĩk agam kulugua

(Matewo 4:18-22; Luka 5:1-11)

16 Ma balna mĩ õwõ Yesu titimma cĩ Bũlũc cĩ Galilea, ikiyyia ĩcĩn nẽ Thimõnẽ kĩ gõtõnĩ cĩnnĩ Anderiya, ngatĩ atdũkẽcĩ gii cĩ agam kulugua bũlũcatõ, nyatarka balna ẽẽn nẽẽgẽ dettiok cĩk kuluguawu. 17 Ma natẽ ũtũvvũ thĩ Yesu ĩnõõgõ ethek ne, “Ivitia owobtangu aneeta, kĩĩ katĩ kaanyung na agiitia gõõl cĩ agamu eeta.” 18 Ma baa tamanoko ũtũngtek thĩ nẽẽgẽ vẽlẽk kaal cĩgĩk cĩk agamĩ kulugua kĩĩ kowobit ĩnõõnõ.

19 Ma thĩ balna mĩ õkkõ nẽ ĩcĩ owu kĩdĩĩc, acĩn kẽnnẽ Jemith kĩ Yoanẽ lõgõõ cĩk Thebedeo, cĩk balna aatĩ kovowola cĩnĩng adĩman kaal cĩgĩk cĩk detintiak kũbũnta. 20 Ma thĩ natẽ, ũtũvvũ nẽ ĩnõõgõ, ĩthõng ũtũngtek nẽẽgẽ baatĩnnĩ Thebedeo kĩ ticcianniok wũk adũmanni kovowola natẽ, ĩthõng owobit nẽẽgẽ ĩnõõnõ.

Itingkawek Yesu ririwac cĩ gerthe tuu

(Luka 4:31-37)

21 Õvvõ balna Yesu kĩ wobjiak cĩgĩnĩk õlõõ cĩ gaalawu cĩ Kaparnaumi. Ĩthõng ma balna Kõrra cĩ Yuwuthono, ũũk ittio nẽ Ciith cĩ Lawintio, ĩthõng arahaĩ ilimanõy. 22 Avvu thĩ kẽnnẽ balna atubuanni eeta limana cĩnnĩ õrrõt, nyatarka balna aliman nẽ eet makathĩta, athii cĩ aduwõnĩ kĩ limanniok cĩk Ngiran cĩ Mutha. 23 Ma thĩ balna Ciitha cĩ Lawintio ẽẽ, aavĩ eeti ĩmma cĩ ayak ririwac cĩ gerthe, ĩthõng acalcal ĩthĩ ne, 24 “Yesu cĩ Natharẽtĩ, tũngehet ageeta! Adiimi niia nyia ĩcĩnang? Akuni niia, kĩĩ katĩ ruwẽẽt ageeta? Kagayyi na aniitia dõ cĩ eeni Et cĩ Callĩ cĩ Nyekuco!”

25 Ma natẽ uduwak Yesu ririwac cĩ gerthe ẽẽ, ethek ne, “Tivanẽ! Tẽẽha ngĩtĩvõrĩ eta coo.” 26 Ma thĩ balna natẽ, ikiyyia õtõmõõĩ ririwacĩ cĩ gerthe ẽẽ, et nĩcẽ õrrõt, ĩthõng ẽgẽrẽny nẽ moloowa cobbi, ngaatĩ ẽẽktanẽ eta nĩcẽ.

27 Utubuan balna thõõth coo eet vẽlẽk õrrõt, ĩthõng ivitia thĩ ijintõy nyaguana ĩĩtõ ne, “Nyia coo? Ẽẽn coo liman cĩ jõr cĩ ayaĩ eeti coo makathĩt cĩ aduwacĩ ririwanĩnẽ cĩk gerthek thõõth, ĩthõng ĩthĩraritõ ĩnõõnõ.” 28 Ma thĩ balna tamanoko, athanothĩk nyemut cĩ Yesu wo looc cĩ Galilea vẽlẽk.

Anyĩk Yesu eet cĩk meelĩk kũbũnta

(Matewo 8:14-17; Luka 4:38-41)

29 Ma balna natẽ ẽtẽẽkta Yesu kĩ wobjiak cĩgĩnĩk Ciitha cĩ Lawintio, ĩthõng ivitia õõt nẽẽgẽ õlõõ ĩcĩ Thimõnẽ kĩ Anderiya, ĩthõng iriok nẽẽgẽ kĩ Jemith kĩ Yoanẽ. 30 Õlõõ cĩ balna õvõyyĩ nẽẽgẽ wo, ĩmmõrĩ balna kinyik cĩ Thimõnẽ aaburi ẽlẽ õrrõt, õõngĩ nẽ ciitha. Ĩthõng thĩ, balna ivitia uduktiak nẽẽgẽ Yesu. 31 Ma baa thĩ ngĩ õkkõ nẽ ĩcĩnnĩ wo, ũũk agam nẽ ĩnõõnõ athiit cĩnnĩ, kĩĩ kõdõnga ĩnõõnõ kaavu jiena, ĩthõng ikiyyia ithii aburthẽtĩ ĩcĩnnĩ, ngaatĩ adĩmanẽcĩ nẽ ĩnõõgõ dainit.

32 Ma balna thĩ yiomon nĩcẽ baa ngĩ okolothĩk kõr, ivitia ayaktak eeta Yesu eet cĩk ĩmmõrĩ vẽlẽk kĩ cĩk ẽyẽk ririwanĩnẽ cĩk gerthek. 33 Alũnganiay balna meelitini cĩ eetu cĩ kõrõõk cĩ gaalawu kivitia kĩbbĩtĩt joonui katũga. 34 Ma thĩ balna natẽ aanyĩk Yesu eet cĩk meelĩk cĩk ĩmmõrĩ ẽẽ, kũbũnta moorithiowẽy ĩcĩk aatĩ mĩn mĩn, ĩthõng itingka ririwanĩnẽ cĩk gerthek cĩk meelĩk buu eletinẽy cĩk eetu, ĩthõng ĩcaac ririwanĩnẽ cĩk gerthek ngatĩ õthõõthĩ, nyatarka balna aga nẽẽgẽ ngĩ ẽẽn nẽ ngẽnẽ.

Ũũk Yesu alawõy kabanyca

35 Ma baa ngaanĩ ngerenniet, ĩtĩnga Yesu ũtũngek kõrõõk, ĩthõng ũũk aavu nẽ ngamanĩ mĩn, ĩthõng alawõy. 36 Ma thĩ balna ĩtĩngathõ Thimõnẽ kĩ gõõnõgĩ õõgĩ, kĩĩ kõõt kẽrẽpanit ĩnõõnõ. 37 Ma balna ngĩ ijiokta nẽẽgẽ ĩnõõnõ ẽẽ, ivitia entek ne, “Ẽrẽppanni eeta vẽlẽk aniitia.”

38 Ẽdẽcĩ kẽnnẽ Yesu ethei ne, “Kõõt korookjiowẽy joonui, kĩĩ katĩ kũũk kilimanek na eet Nyemut cĩ Abũnna natẽ. Thõõth cĩ balna kakuni na kĩdĩman coo.” 39 Aku balna thĩ õwõyyĩ Yesu looc cĩ Galilea vẽlẽk, aduwaai eet Ciithẽnẽy cĩk Lawintiak Nyemut cĩ Abũnna. Ĩthõng kĩĩ kitingka ririwanĩn cĩk gerthek eletinẽy cĩk eetu.

Et cĩ adak nyataba

(Matewo 8:1-4; Luka 5:12-16)

40 Ikiyyia balna eeti ĩmma cĩ adak nyataba ũũk ĩcĩ Yesu, ĩthõng akatek ĩnõõnõ kuthungti, kĩĩ kala kennek ne, “Ngĩ adiimnya niia kũbũna, anya kũbũna.”

41 Ma thĩ balna atamatĩk Yesu ĩnõõnõ, kĩĩ kuwum ĩnõõnõ attia cĩnnĩ, ĩthõng ennek ne, “Ii, kadiimnyi na aniitia bũna, ũbũna thĩ yoko niia!” 42 Ma natẽ noko, ithii nyataba ĩcĩnnĩ, ĩthõng ũbũna nẽ.

43 Ma natẽ ĩtĩrĩth Yesu ĩnõõnõ õrrõt, ĩthõng itionĩk ĩnõõnõ gõõl kũũk, 44 kĩĩ kennek ne, “Nyĩ õkkõ aduwaai et ĩmma thõõth coo. Decek bĩt yelek ẽlẽ cunni paadĩr. Ĩthõng ĩdĩma niia anyinit, ĩthõng otodongu Ciitha cĩ Nyekuco kĩ balna mĩ aduwa Ngiranĩ cĩ Mutha, kẽyẽla ngatĩ athĩnnĩ ne, ũbũna niia ĩthĩ calla, kĩĩ katĩ kagaacõ eeta vẽlẽk.”

45 Ĩthõng thĩ, õkkõ kẽnnẽ eeti neccie athaani nyemut nĩcẽ looc vẽlẽk, kĩĩ kuduwak eet cĩk meelĩk, kĩĩ katĩ kithii Yesu cĩ õkkõ õlõõ cĩ gaalawu ĩmmanĩ, nyatarka meelitin cĩ eetu, ĩthõng avvua rẽẽna tẽrtẽra, ngatĩ athiinni eeta tõ. Ĩthõng nga alũnganiay eeta vatĩkẽy vẽlẽk, amũdaai ĩnõõnõ noko.