Et cĩ adak nyataba
(Bẽl Marĩkõ 1:40-45; Luka 5:12-16)
8
Ma balna ngĩ aluciay Yesu thiira, õwõb meelitini cobbi õrrõt ĩnõõnõ. 2 Ma natẽ, ilibak ĩnõõnõ eeti ĩmma cĩ adak nyataba,a ĩthõng ikiyyia akatek ĩnõõnõ kuthungti nguuma cĩnnĩ, ĩthõng ethek ne, “Makayyioit, mĩ adiimi anya kũbũna, anya kũbũna.”3 Ngaatĩ atadĩcẽ Yesu athiit cĩnnĩ et nĩcẽ, ĩthõng ethek ne, “Kadiimnyi na aniitia bũna.” Ngaatĩ athiinni nyataba nĩĩco noko. 4 Ma natẽ, ethek Yesu ĩnõõnõ ne, “Nyĩ õkkõ aduwaai et ĩmma thõõth coo. Decek bĩt yelek paadĩrb ẽlẽ cunni, ĩthõng anyiwu ĩnõõnõ anyinit wũ baa aduwa Mutha,c kĩĩ katĩ kagaacõ eeta vẽlẽk ngatĩ ũbũnaẽ niia.”
Leminit cĩ gaalinit cĩ nyĩcẽkẽru
(Bẽl Luka 7:1-10; Yoanẽ 4:43-54)
5 Ma balna ngĩ õkkõ Yesu õlõõ ĩcĩ gaalawu ĩcĩ Kaparnaumi, ũũk gaalinti cĩ nyĩcẽkẽrud ĩcĩnnĩ adiim elinit. 6 Ĩthõng ethek nẽ Yesu ne, “Makayyioit, apĩrna ticciannioiti cannie õlõõ õrrõt alalaniay ẽlẽ.”
7 Ngaatĩ ẽthẽcĩ Yesu ĩnõõnõ ne, “Kõkkõ katĩ na kẽẽla ĩnõõnõ kũbũna.”
8 Ethei kẽnnẽ gaalinti cĩ nyĩcẽkẽru ĩnõõnõ ne, “Makayyioit, athii woccia cĩ kẽtẽmanonia ngatĩ kayahani aniitia bĩt õlõõ cannĩ. Duwa nẽnnẽ niia thõõth kaganoko, kĩĩ katĩ kũbũna ticciannioiti cannie. 9 Keeni na buu gaalinit cĩ agamnya eeti ĩmma, ĩthõng keeni et cĩ kagami nyĩcẽkẽr. Mĩ kennei nyĩcẽkẽrowoc ĩmma ne, ‘Bĩtõ,’ õkkõ thẽk kĩ cĩ kaduwai nana, ĩthõng mĩ kennei ĩmma ne, ‘Ijjia,’ aku thẽk kĩ cĩ kennei na ẽẽ. Mĩ kennei na ticciannioit cannĩ ne, ‘Dĩman gimma,’ adĩman thẽk gõõla nĩĩcẽ.”
10 Ma balna ngĩ athĩrar Yesu thõõth coo wo, ukulek jien õrrõt ngaatĩ ẽthẽcĩ eet cĩk balna õwõb ĩnõõnõ ne, “Kaduwacung na thõõth dĩdĩ, ngaanĩ kũmũda et cĩ ayak leminit cĩ õgõõn ketee eetĩnẽy ĩcĩk Ĩthraĩlĩ. 11 Ĩthõng kethecung ne, mẽẽlĩ katĩ eeta cĩk avvu loociowẽy ĩcĩk alibanĩ kõr kĩ ĩcĩ okolothĩcẽ kõr kivitia kũrũmtẽ kĩ Abraham, Aĩthak kĩ Yokob ngatĩ adaĩ peyian kabicoca cĩ tammutiddino. 12 Ĩthõng thĩ, ingkawothi katĩ eeta cĩk kabicoc cĩ tammutiddino ngatĩvõrĩ muwura, ngatĩ katĩ õvvõ alue eeta, ĩthõng adait nyĩgĩt wuciitha cobbi.”
13 Ngaatĩ ẽthẽcĩ Yesu gaalinit cĩ nyĩcẽkẽru ẽẽ, ne, “Bĩtõ! Adĩmanni thẽk katĩ thõõth cĩ elemi niia ẽẽ.” Ĩthõng balna ũbũna ticciannioiti cĩnnẽ ẽẽ, itin nĩcẽ noko.
Anyĩk Yesu eet cĩk meelĩk kũbũnta
(Bẽl Marĩkõ 1:29-34; Luka 4:38-41)
14 Ma balna ngĩ aku Yesu ciith cĩ Pẽtũrũ, acĩn kẽnnẽ balna kinyik cĩ Pẽtũrũ ngĩ õõngĩ loota aaburi ẽlẽ õrrõt. 15 Ngaatĩ awumi Yesu ĩnõõnõ athiit, ithii aburthẽtĩ ẽla ĩcĩnnĩ. Ma natẽ, ĩtĩnga cawũrkũr, ĩthõng anyĩk nẽ Yesu dainit.
16 Ma jiatĩn nĩcẽ, ayaktak eeta Yesu eet cĩk ayak ririwanĩn cĩk gerthek, ĩthõng itingka nẽ ririwanĩn cĩk gerthek tiirthẽta cĩ thõõth cĩ aduwa nẽnẽ, ĩthõng aanyĩk eet wũk balna ĩmmõrĩ vẽlẽk kũbũnta. 17 Adĩmanni balna thõõth coo, kẽyẽla thõõth wũ baa aduwa Ĩthaia eeti cĩ, õthõõth molook cĩ Nyekuco athĩ ne,
“Ẽnyẽẽĩ nẽ moorithiok cĩgaac vẽlẽk,
ĩthõng anyet ageeta kũbũnta.”e
Eet cĩk adiim ngĩ õwõb Yesu
(Bẽl Luka 9:57-62)
18 Ma balna ngĩ acĩn Yesu meelitin cĩ eetu ngatĩ aavẽ nẽ ẽẽ, ikiyyia uduwak wobjiak cĩgĩnĩk kabaaktẽ kõõt tõõna ĩcĩ bũlũc cĩ Galilea. 19 Ma natẽ, ikiyyia limannioiti cĩ Ngiran cĩ Mutha ethek ĩnõõnõ ne, “Limannioit, kowobji katĩ na aniitia goolliowẽy vẽlẽk ĩcĩk õkõyyẽ niia.”
20 Atajan Yesu ethei ne, “Ayak kireeruana loowua, ĩthõng ayak kĩballĩ cĩk akul tammuatiddina ciithi, ĩthõng thĩ, athii Ngẽrtĩ Eetof ngĩtĩ abaaĩcẽ nẽ õõ cĩnnĩ tõ.”
21 Ma natẽ, ethek wobjiaiti ĩmma Yesu ne, “Makayyioit, nyẽ nõõnõ kũũk kada baang cannĩ.”
22 Ĩthõng thĩ, kẽnnẽ ennei Yesu ĩnõõnõ ne, “Wõba aneeta, anyĩk niia daakciak kadaacõ eleeti cĩgĩk mĩn.”g
Ĩbĩlĩ Yesu ngõõt cĩ tiiri cĩ õmõnnĩ maam
(Bẽl Marĩkõ 4:35-41; Luka 8:22-25)
23 Ngaatĩ õtõdĩ Yesu kovowol, ĩthõng otodit wobjiaha cĩgĩnnẽk buu. 24 Ma balna natẽ, ĩtĩnga ngõõtĩ ĩmma tamanoko cĩ tiiri õrrõt cĩ õmmõnnĩ bũlũc kongoththiak maama kovowol. Ĩthõng thĩ, õõngĩ kẽnnẽ balna Yesu thõng. 25 Ngaatĩ aturanĩ wobjiaha ĩnõõnõ ẽthẽcĩ ne, “Makayyioit, eleta! Kõõt kukuyyie naaga!”
26 Atajan Yesu ethei ne, “Niigia eeta cĩk ayakcu leminit cĩ dĩcĩ kaganoko wo, ongolinu nyia?” Ma natẽ, ĩtĩnga Yesu, ĩthõng egerenyek ngõõt kĩ maam kĩbĩlĩt, ngaatĩ abĩlnĩ dĩdĩ kĩĩ lõõcĩ ĩĩr.
27 Ĩthõng utubuan balna thõõth coo wobjiak õrrõt, ĩthõng ijintõy nyaguana ĩĩtõ ne, “Et woccia gõõ cĩ õgõõn kuu coo? Cĩ athĩrar ngõõtĩ kĩ maam thõõth cĩnnĩ wo!”
Eet ramma cĩk ayak ririwanĩn cĩk gerthek
(Bẽl Marĩkõ 5:1-20; Luka 8:26-39)
28 Ma baa ngĩ abaaẽ Yesu bũlũc, ikiyyia arawak titim ngatĩ õjõõn kĩ looc cĩ athĩ thar Gẽdarẽnẽth, ivitia urumtõy kĩ eet cĩk ẽẽn ramma cĩk ayak ririwanĩn cĩk gerthek cĩk avvu loowuanĩy ĩcĩk adawini daakciaha. Ĩthõng balna muotĩ nẽẽgẽ õrrõt athii eeti cĩ abaakci gõõla nĩĩcẽ tõ. 29 Ma natẽ, acalcallit ĩĩtõ ne, “Adiimi niia nyia kĩ ageeta Ngẽrtĩ Nyekuco? Ikiyyia niia uuket ageeta õrrõt ngaanĩ kõdõlan kõr wũ baa eberiay a ne, cĩ teedintio?”
30 Ẽggẽ balna tẽẽnyĩ cĩ kiborongetu rẽẽna kĩdĩĩc. 31 Ma natẽ ĩlalliek ririwanĩna cĩk gerthek ẽẽ, Yesu ethei ne, “Mĩ itingkawet ageeta, tionĩhet thẽk niia ageeta tẽẽnya cĩ kiborongetu ẽẽ.”
32 Ma natẽ, ethek Yesu ĩnõõgõ ne, “Õõtõ!” Ngaatĩ ẽẽktanẽ ririwanĩnẽ cĩk gerthek wo ngatĩvõrĩ, ĩthõng edecciek õõt itiothõ eleeti cĩk tẽẽny cĩ kiborongetu. Ngaatĩ agubuanĩ tẽẽnyĩ vẽlẽk alũcothĩcẽ thilo cĩ wuuni, ĩthõng ubukantothik bũlũc kutdududdie. 33 Ma natẽ, ivirit tũwayyiowa cĩk kiborongetu wo, õõt uduktiak eet õlõõ cĩ gaalawu thõõth coo, kĩ thõõth cĩ eet cĩk ayak ririwanĩn cĩk gerthek ẽẽ. 34 Ngaatĩ alũnganianĩ eeta cĩk meelĩk õlõõ cĩ gaalawu kõõt kurumtõy kĩ Yesu. Ĩthõng ma balna ngĩ acĩn nẽẽgẽ ĩnõõnõ wo, ivitia ĩlalliek ĩnõõnõ kũtũngek looc cĩnĩng.