Nyemut cĩ Abũnna cĩ
Marĩkõ
Yelinit cĩ Marĩkõ
Nyaragawa ĩcoo ẽhẽẽd balna Marĩkõ cĩ balna athĩ thar õõgĩ Yoanẽ Marĩkõ. Ẽẽn balna nẽ ngĩthorowoc ĩmma Yeruthalẽma, balna ngaanĩ aavĩ Yesu natẽ, ĩthõng ikiyyia ĩĩ nẽ wobjiait cĩ Yesu. Ma vurtia, ivitia irioit nẽ kĩ tionniait Paulo, ĩthõng naboo ma vurtia cĩ, ikiyyia ẽẽl nẽ tionniait Pẽtũrũ. Thõõtha cĩ rũgẽt cĩ Yesu, ẽkẽba nẽ thoothonniok cĩk Yudei cĩk meelĩk kĩ ngirantiok cĩgĩk. Ĩthõng thĩ, naboo, ẽhẽẽd nẽ, kĩĩ katĩ kẽẽl eet cĩk athii cĩ ẽẽn Yudei wũk balna ivitia ĩĩtõ wobjiak cĩk Kiristo.
Nyaragawa ĩcoo, aduwa Marĩkõ thoothonniok cĩk ĩdĩman Yesu õrrõt kijiar thoothonniok wũk balna aduwa nẽnẽ. Kĩcĩnĩt naaga gõõl cĩ balna adĩmanĩ Yesu thoothonniok cĩk meelĩk cĩk anatti kĩĩ kaanyĩk eet cĩk meelĩk kũbũnta, itingka nẽ ririwanĩnẽ cĩk gerthek eetĩnẽy cĩk meelĩk, ĩthõng balna atamatĩk thoothonniok cĩk gerthek cĩk eetu. Ẽyẽla tiicanẽ cĩkkõ makathĩt cĩ Yesu, Et cĩ aku Nyekuca, kikiyyia kadaak, ĩthõng õõga eet tiirthẽta cĩ gerthetino.
Aduwa Marĩkõ iyiaintiok cĩk rũgẽt cĩ Yesu kĩ tiic cĩnnĩ, ithiananĩ batithimowa cĩnnĩ wũ balna agameei ĩnõõnõ Yoanẽ. Ẽkẽba thoothonniok cĩk wathinniok cĩk aturna baa ngĩ ododowothi Yesu kurucea, kĩ ngatĩ arũknanĩ nẽ daaĩtha.