Ũrũga Yesu
(Bẽl Marĩkõ 16:1-8; Luka 24:1-12; Yoanẽ 20:1-10)
28
Ma balna ngĩ edecciay Kõr cĩ Yuwuthono, Lomidikawaa ngerenniet, ivitia õõt Maria Madalẽna kĩ Maria ĩmma buu, ĩcĩnĩt look cĩ Yesu.2 Aavĩ balna kirikirihi cĩ tiiri cĩ õrõĩ õrrõt, nyatarka balna allucciay anjĩlõ cĩ Makayyiokto tammuatiddina, ĩthõng ũũk ĩcĩ loowu. Ngaatĩ õkkõ õbõrbõranĩ bĩĩ cĩ anyũgẽnẽ katũk cĩ loowu ẽẽ, ĩthõng aavue ĩnõõnõ. 3 Aliba balna nẽ kĩ lanyĩtĩ cĩ borowec cĩ abadĩ thõng, ĩthõng ĩĩtõ ceremuana cĩgĩnnẽk võõrĩ pẽr kaavutõ kĩ mũllẽna. 4 Ongollie balna bekciowa ĩnõõnõ õrrõt, ĩthõng abarritit kaavutõ kĩ eeta cĩk adaaitõ vẽlẽk.
5 Ĩthõng uduwak anjĩlõ neccie ngaay nĩĩkẽ ethek ne, “Nyĩ ongolinu, kagga na ma ngĩ adiimnyu niigia Yesu wũ balna ododowothi kurucea. 6 Athii nẽ ngato tõ! Ũrũga nẽ daaĩtha kĩ balna ngĩ aduwa nẽ. Ivitia da ĩcĩnĩt ngini wũ balna ariwothi ẽlẽ cĩnnẽ. 7 Ĩthõng yoko, õõt tamanoko, ĩthõng uduktiawu wobjiak cĩgĩnĩk entek ne, ‘Ũrũga nẽ daaĩtha, ĩthõng utuwuanewung nẽ agiitia ũũk ĩcĩ Galilea. Ovvoyyu katĩ acĩnnu niigia ĩnõõnõ natẽ.’ Thõõth cĩ kakunie kaduwacung na wo coo.”
8 Ngaatĩ ayihi ngaay neekie enyeeinie loowa, ongollie balna nẽẽgẽ looc, ĩthõng balna ẽbẽlbẽl buu, ngaatĩ aviri nẽẽgẽ õvvõ aduwacĩ wobjiak cĩgĩnĩk. 9 Ma tamanoko, ikiyyia ilibak Yesu ĩnõõgõ, ĩthõng ethek ne, “Kĩthawõy!” Ngaatĩ õvõyyĩ nẽẽgẽ ĩcĩnnĩ joonui, ĩthõng agamit thoo cĩgĩnĩk, ĩthõng alaacõ ĩnõõnõ. 10 Ma natẽ, ikiyyia othoothĩk Yesu ĩnõõgõ ethek ne, “Nyĩ ongolinu! Õõt uduktiak wobjiak cĩganĩk entek ne, kõõt kurumtõy ĩcĩ Galilea, õvvõ katĩ acĩnna nẽẽgẽ aneeta natẽ.”
Nyemut cĩ Bekciowu
11 Ma balna nga õwõ ngaay cĩkkõ gõõla, ivitia õõt nyĩcẽkẽrĩ gwuak wũk balna ẽbẽk look cĩ Yesu ĩcĩ kõrõõk cĩ gaalawu, ĩthõng õõt uduktiak makayyiok cĩk paadĩrnyawu thoothonniok vẽlẽk cĩk balna acĩn nẽẽgẽ ngĩ adĩmanni. 12 Ma balna ngĩ ivitia urumtõy makayyiowa cĩk paadĩrnyawu kĩ eet cĩk obbitik, ivitia ummuit nẽẽgẽ gõõl cĩ ĩtaabĩ nyĩcẽkẽr nyarobinyay ĩcĩk meelĩk õrrõt. 13 Ĩthõng uduktiak ĩnõõgõ entek ne, “Õõt niigia entek eet ne, ‘Ivitia ogorothit wobjiaha cĩgĩnnẽk ẽlẽ cĩnnĩ balna baal, baa nganĩ kooginna naaga.’ 14 Ĩthõng ma ngĩ ũũk ĩthĩrar gaalinti cobbi thõõth coo, kothoothona katĩ naaga kĩ ĩnõõnõ, ĩthõng katĩ athii thõõth ĩmma cĩ gerthe kĩ agiitia tõ.” 15 Ngaatĩ agamanĩ nyĩcẽkẽrĩ nyarobinya nĩĩkẽ, ĩthõng ĩdĩmanit nẽẽgẽ gõõla wũ balna aduwaai makayyiowa cĩk paadĩrnyawu kĩ eet cĩk obbitik ĩnõõgõ. Ĩthõng nga ẽkẽb eeta cĩk ẽẽn Yudei nyemut cĩ athĩ ne, “Ivitia ogorothit wobjiaha cĩgĩnnẽk ẽlẽ cĩ Yesu,” kĩĩ kõr coo.
Iriontĩk thẽk wobjiaha cĩk Yesu Nyemut cĩ abũnna looc vẽlẽk
16 Ngaatĩ ĩngannĩ wobjiaha cĩk Yesu cĩk ẽẽn õmmõtõ kĩ codoi ẽẽ, õvõyyĩ ĩcĩ Galilea, ĩcĩ thiir wũ balna aduwaai Yesu ĩnõõgõ ethei ne, kõõt kurumtõy natẽ. 17 Ma balna ngĩ ĩcĩnĩt nẽẽgẽ ĩnõõnõ, ivitia alaacõ ĩnõõnõ, ĩthõng thĩ, balna nga akidan gwuak ĩnõõnõ noko. 18 Ĩthõng ikiyyia Yesu, ethek ĩnõõgõ ne, “Anyĩwothĩha balna aneeta makathĩtĩ cĩ aavĩ tammuatiddina kĩ cĩ aavĩ looca vẽlẽk. 19 Ĩthõng thĩna, yoko õõt niigia thẽk anycĩk eet loociowẽy vẽlẽk kĩĩtõ wobjiak cĩganĩk, agamtek ĩnõõgõ batithimo thaarĩy ĩcĩk Baatĩnnĩ kĩ cĩk Ngẽrĩnĩ kĩ cĩk Ririwac cĩ Dĩhĩmĩ, 20 õõt illimanit ĩnõõgõ jurrung kĩthĩraritõ thõõth vẽlẽk wũ balna kalimanecung na agiitia. Ĩthõng dĩdĩ, karũmẽ katĩ gõõ naaga kĩ agiitia dõõkĩthĩ kuumuc kõdõlan kõr cĩ ditianẽt cĩ loocu.”