Ũrũga Yesu daaĩtha
(Bẽl Matewo 28:1-10; Marĩkõ 16:1-8; Luka 24:1-12)
20
Ma balna ngerenniet ngaanĩpĩny Lomidikawa,a nga muwur lõõcĩ, ikiyyia Maria Madalẽna ũrũbothĩk bĩĩ amadane aavu kabanyca, cĩ balna anyũgĩ eeta ngilom wũ balna adawini Yesu.
2 Ma natẽ, ivir nẽ ũrũbothĩk Thimõnẽ Pẽtũrũ kĩ wobjiait wũ balna amĩnan Yesu õrrõt,b ĩthõng uduwak ĩnõõgõ ethek ne, “Ootti eeta ẽlẽ cĩ Makayyiokto! Ĩthõng athii cĩ kagga õvvõ aari ĩnõõnõ ngatdang!”
3 Ma natẽ, ĩtĩngathõ Pẽtũrũ kĩ wobjiait cĩ amĩnan Yesu õrrõt, õõt ĩcĩ ngilomo.
4 Avir balna nẽẽgẽ rammatuguan, ĩthõng wobjiaiti ĩmma avir õrrõt kijiar Pẽtũrũ, ĩthõng õdõlan ngilom ĩcowu.
5 Ikiyyia ĩbĩl nẽ katũga, ĩthõng ululie ĩcĩn ngilom wũ balna aarĩcẽ eeta Yesu, acĩn kẽnnẽ cẽrẽm wũ balna amũrmũranini ẽlẽ cĩ Yesu, aavĩ loota natẽ, ĩthõng balna athii cĩ iithio nẽ ngilom.
6 Ma natẽ, ikiyyia õdõlan Thimõnẽ Pẽtũrũ wũ balna õwõba ĩnõõnõ vurtia, ĩthõng edecek ũũk ngiloma ĩcĩtõ, ĩthõng ĩcĩn cẽrẽm wũ balna amũrmũranini ẽlẽ cĩ Yesu, aavĩ natẽ.
7 Ĩthõng ĩcĩn cẽrẽm wũ balna amũrmũranini õõ cĩ Yesu buu, atũlũngĩ mĩn aavĩ kabanyca.
8 Ma natẽ, ikiyyia ittio wobjiaiti nĩcĩ balna uwantẽ ẽẽ, ngilom, ĩthõng ikiyyia ĩcĩn nẽ buu, ĩthõng ẽlẽma.
9 Nyatarka balna nga kagaacõ nẽẽgẽ thõõth cĩ eheeddi Nyaragawa ĩcĩ Nyekuco cĩ athĩ ne, arũkna katĩ Yesu daaĩtha dĩdĩ.
10 Ma natẽ, ivitia imiiryie wobjiaha õõt korookjiowẽy cĩgĩk.
Ilibak Yesu Maria Madalẽna
(Bẽl Marĩkõ 16:9-11)
11 Abĩlĩ balna Maria Madalẽna ngiloma ngatĩvõrĩ alu, ĩthõng ululie ẽdẽnya ngilom ĩcĩtõ,
12 ĩthõng ĩcĩn nẽ anjĩlẽt ramma cĩk ahimit ceremua cĩk võõrĩk, aavĩ ĩmma loota nginiwa wũ balna aruwanĩ Yesu õõwa, ĩthõng aavu ĩmma ĩcĩ thoonu.
13 Ĩthõng ijinit nẽẽgẽ ĩnõõnõ ethei ne, “Ngaa coo, alu niia nyia?”
Ẽdẽcĩ nẽ ethei ne, “Kalu, nyatarka ootti eeta ẽlẽ cĩ Makayyioit cannĩ, ĩthõng athii cĩ kagga, ngĩtĩ õvvõ aari nẽẽgẽ ĩnõõnõ?”
14 Ma natẽ noko, ummudie Maria, acĩn kẽnnẽ Yesu abĩlĩ natẽ, ĩthõng thĩ, athii nẽ cĩ agawĩ ngatĩ ẽnnẽ ĩnõõnõ.
15 Ma natẽ, ijin Yesu ĩnõõnõ ethek nẽ, “Alu niia nyia? Adiimi niia ngẽnẽ?”
Ahad kẽnnẽ balna Maria athĩ ne, et cĩ manu cĩ ajin ĩnõõnõ wo, ĩthõng othoothĩk ĩnõõnõ ethek ne, “Makayyioit, mĩ da ẽẽn aniitia cĩ õkõyyẽ ẽlẽ cĩnnĩ wo, duwaha baai, kĩĩ katĩ kũũk kẽyẽha.”
16 Ngaatĩ õthõõthĩcẽ Yesu ĩnõõnõ ẽthẽcĩ ne, “Maria!”
Ĩthõng ummudie Maria othoothĩk ĩnõõnõ Aramayyiey ethek ne, “Rabboni” thara cĩkkõ athĩ ne, “Limannioit.”
17 Ma natẽ, othoothĩk Yesu ĩnõõnõ ethek ne, “Nyĩ agamnya nõõnõ, nga nõ na kũũk ĩcĩ Baangĩ. Bĩt duwak gõtõõnõga kĩ ngõõnõga ethek ne, ‘Kõkkõ na cĩ Baang cannĩ kĩ Baaba cunung, kĩ Nyekuc cannĩ kĩ Nyekuc cunung buu.’ ”
18 Ma natẽ, ũũk ũrũbothĩk Maria Madalẽna wobjiak, ĩthõng uduwak ĩnõõgõ ethek ne, “Kĩcĩna na Makayyioit!” Ngaatĩ aduwacĩ nẽ ĩnõõgõ thõõth cĩ aduwaai Yesu ĩnõõnõ.
Ilibak Yesu wobjiak cĩgĩnĩk
(Bẽl Matewo 28:16-20; Marĩkõ 16:14-18; Luka 24:36-49)
19 Ma Lomidikawa nĩcẽ jiat, anyũgĩ balna wobjiaha eleeti cĩgĩk ciith, nyatarka balna ongollie nẽẽgẽ makayyiok cĩk Yudei. Ma tamanoko, ilibak Yesu ĩnõõgõ kõrgẽna ĩcĩnĩng, ĩthõng ĩthaa ĩnõõgõ ethek ne, “Aavĩ ganõnĩ kĩ agiitia!”
20 Ma natẽ, eyelek ĩnõõgõ athĩn cĩgĩnĩk wũk balna õdõddĩ gũrũmalĩtẽy, kĩ ngĩtĩ balna acuwanni dĩlawa. Ivitia atalit wobjiaha õrrõt, ngatĩ acĩnĩ Makayyioit!
21 Ĩthõng othoothĩk Yesu ĩnõõgõ naboo ethek ne, “Aavĩ ganõnĩ kĩ agiitia! Kitionnung na agiitia kĩ cĩ itionana aneeta Baangĩ.”
22 Ĩthõng ũtũbũwẽĩ nẽ ĩnõõgõ ngõõt, ĩthõng ethek ne, “Irõt Ririwac cĩ Dĩhĩmĩ.
23 Mĩ uungniccu niigia thoothonniok cĩk gerthek cĩk et ĩmma, uungnothi katĩ thoothonniowa cĩgĩnnẽk buu, mĩ athii cĩ uungniccu niigia thoothonniok cĩk gerthek cĩk et ĩmma, athii katĩ thoothonniowa cĩgĩnnẽk buu cĩ uungnothi.”
Ilibak Yesu Tomath
24 Athii balna wobjiaiti Tomathĩ natẽ tõ, cĩ athĩ thar õõgĩ, Didimoth,c kõr wũ balna alibacĩ Yesu wobjiak cĩgĩnĩk.
25 Ĩthõng entek wobjiaha ĩnõõnõ ne, “Kĩcĩnta naaga Makayyioit!”
Ẽdẽcĩ kẽnnẽ Tomathĩ athĩ ne, “Athii woccia cĩ kẽlẽmĩ katĩ nga kĩcĩn athĩn cĩgĩnĩk wũk balna ododdi gũrũmalĩtẽy, ĩthõng kuwuma athĩn cĩgĩnĩk, ĩthõng gii ngĩ kuwuma kabanyit cĩnnĩ, ngini wũ balna acuwanni dĩlawa.”
26 Ma Lomidika cĩ aku, ivitia aavutõ wobjiaha kõdõwẽ naboo, ĩthõng balna wanĩco aavĩ Tomathĩ buu kõr nĩcẽ tõ. Anyũgĩ balna katũgẽta vẽlẽk, ma tamanoko ĩbĩl Yesu kõrgẽna cĩnĩng, kĩ balna ĩcowu naboo, ĩthõng othoothĩk ĩnõõgõ ethek ne, “Aavĩ ganõnĩ kĩ agiitia!”
27 Ĩthõng uduwak nẽ Tomath ethek ne, “Arĩk athiit cunni ngato, ĩthõng icinu athĩn cĩganĩk. Arĩk athiit cunni tubenta ĩcĩ kabanyit cĩ onyit cannĩ. Nyĩ nga ẽpẽkanna naboo, lẽmanĩ!”
28 Ẽdẽcĩ Tomathĩ athĩ ne, “Makayyioit cannĩ kĩ Nyekuc cannĩ!”
29 Ngaatĩ õthõõthĩcẽ Yesu ĩnõõnõ ẽthẽcĩ ne, “Ẽlẽmnya niia aneeta, nyatarka ĩcĩna niia aneeta. Agatan Nyekuci eet cĩk ẽlẽmnya aneeta nga kĩcĩnta aneeta.”
Nyia da kẽtẽhẽẽd Yoanẽ Nyaraga coo wo?
30 Acĩn balna wobjiaha cĩk Yesu ĩnõõnõ ngatĩ adĩmanĩ nẽ thoothonniok cĩk addi cĩk meelĩk cĩk athii cĩ eheeddi Nyaragawa ĩcoo.
31 Ĩthõng thĩ, eheeddi kaala cĩkkõ ngato, kĩĩ katĩ woccia elemit niigia ĩĩtõ ne, ẽẽn Yesu Kiristo Ngẽrtĩ Nyekuco, ĩthõng ma ngĩ elemnyu niigia, amũdanu katĩ niigia rũgẽt cĩ aavĩ kũdũt thaarĩy cĩgĩnĩk.