Eteheedĩk Pĩlatõ Yesu daaĩth
19
Ma natẽ, ũũwĩ Pĩlatõ Yesu kibicie nyegutiaha.
2 Ĩthõng uluccia nyĩcẽkẽrĩ tĩĩ cĩ ẽẽn bĩlla,a ĩthõng upurucciek õõ cĩnnĩ. Ĩthõng itihimtẽẽĩ ĩnõõnõ cẽrẽm cĩ rẽgẽẽ.b
3 Ĩthõng atararyi ĩnõõnõ entek ne, “Kĩthawõy Alaan cĩ Yudei!” Ĩthõng apanitõ ĩnõõnõ nguuma.
4 Ma natẽ, imiirie Pĩlatõ naboo ũũk ngatĩvõrĩ, ĩthõng othoothĩk eet ethek ne, “Kẽyẽhacung katĩ na ĩnõõnõ yoko, kĩĩ katĩ agaac niigia, nga kẽgẽrẽthan eeti coo thõõth ĩmma.”
5 Ngaatĩ ẽẽktanẽ Yesu ngatĩvõrĩ ahimit tĩĩ cĩ ẽẽn bĩlla õõwa, kĩ cẽrẽm cĩ rẽgẽẽ cĩ ahimit nẽ ẽẽ. Ĩthõng othoothĩk Pĩlatõ eet ethek ne, “Et nĩcẽ coo!”
6 Ma balna ngĩ acĩn makayyiowa cĩk paadĩrnyawu, kĩ gaala cĩgĩk ĩnõõnõ wo, ivitia egerenyit nẽẽgẽ ĩĩtõ ne, “Toddowek niia ĩnõõnõ kurucea! Toddowek niia ĩnõõnõ kurucea!”
Ẽdẽcĩ Pĩlatõ ĩnõõgõ ethei ne, “Õõt õtõddõõc niigia! Kũmũda na nga kẽgẽrẽthan eeti coo thõõth ĩmma!”
7 Ẽdẽcĩ Yudei athĩ ne, “Athĩ nẽ ne, keeni Ngẽrtĩ Nyekuco! Ĩthõng Ngirana cĩnang, aruwue woccia thẽk nẽ kadaak.”
8 Ma balna mĩ athĩrar Pĩlatõ thõõth coo wo, ikiyyia õtõngõlẽ nẽ õrrõt,
9 ĩthõng imiirie nẽ ũũk ciitha ĩcĩtõ, ĩthõng ijin Yesu ethek ne, “Eeni niia et cĩ akuni ĩjang?” Athii balna Yesu cĩ ẽdẽcĩ ĩnõõnõ.
10 Ĩthõng ijin Pĩlatõ ĩnõõnõ ethek ne, “Athii cĩ edeci niia thõõth cĩ kajinni na wo nyia? Athii cĩ aga niia keyei na tiirthẽt cĩ woccia kõõgani aniitia, kõdẽ cĩ woccia kododici kurucea?”
11 Ẽdẽcĩ Yesu ethei ne, “Mĩ nga kaanyi Nyekuci tiirthẽt, athii gii cĩ woccia adĩmaneca niia aneeta tõ. Ĩnõõnõ thĩ cĩ ẽgẽrẽthanĩ eeti cĩ ẽyẽhana aneeta kĩ aniitia õrrõt wo.”
12 Ma natẽ, idiim Pĩlatõ õõga Yesu. Ẽgẽrẽny kẽggẽ meelitini cĩ Yudei naboo athĩ ne, “Mĩ oogu et coo, athii katĩ cĩ eeni niia gõõnĩ alaan cobbi cĩ Rũma!”c Ĩthõng eeti ĩmma cĩ athĩ ne, ẽẽn nẽ alaan, ẽẽn miroit cĩ alaan cobbi cĩ Rũma.
13 Ma balna mĩ athĩrar Pĩlatõ thõõth coo wo, ikiyyia ayaha nẽ Yesu ngatĩvõrĩ naboo. Ĩthõng ikiyyia aavu loota taabawa cĩnnĩ ĩcĩ ẽngẽrĩ thoothonniok, ngatĩ atdiltdilanni bĩĩyẽnĩy, ĩthõng athĩ Aramayyiey ne, Gabbatha.
14 Aavu balna kõr tiddina, kõr cĩ adĩmanothĩcẽ eeta, nyatarka Kõr cobbi cĩ Ngothio.
Ĩthõng othoothĩk Pĩlatõ Yudei ethek ne, “Alaan cunung wo coo!”
15 Ngaatĩ ẽgẽrẽnyĩ meelitini athĩnnĩ ne, “Ruk ĩnõõnõ! Ruk ĩnõõnõ! Toddowek ĩnõõnõ kurucea!”
Ma natẽ, ijin Pĩlatõ ĩnõõgõ ethek ne, “Adiimnyangũ kotodowek Alaan cunung wo kurucea?”
Ẽdẽcĩ makayyiowa cĩk paadĩrnyawu ethei ne, “Athii cĩ kẽyẽkca naaga alaan ĩmma, kayakca naaga alaan cĩnang cobbi cĩ Rũma!”
16 Ngaatĩ anyĩcẽ Pĩlatõ Yesu ĩnõõgõ, kĩĩ katĩ kõõt kotoddoyyiek ĩnõõnõ kurucea.
Otodowothĩk Yesu kurucea
(Bẽl Matewo 27:32-44; Marĩkõ 15:21-32; Luka 23:26-43)
Ma natẽ, ivitia ootti nẽẽgẽ Yesu,
17 ngaatĩ õdõngĩ nẽ kuruced nẽdõ, õkõyyĩ ĩcĩ ngĩtĩ athĩ thar, “Thiir cĩ Ammẽn cĩ Õõ cĩ et cĩ adaaha,” ĩthõng Aramayyiey athĩ ne, “Gõlgõtha.”
18 Ma natẽ, ivitia otoddoyyiek eeta Yesu kurucea, ĩthõng ododdi naboo eeta ramma kurucenyiay kĩlĩktek ĩnõõnõ kõrgẽna.
19 Ĩthõng ikiyyia eteheedĩk Pĩlatõ thõõth ĩmma, kĩĩ kaarĩk kurucea ĩcĩ Yesu, ngatĩ õjõõn kĩ õõ cĩnnĩ, cĩ eheeddi athĩ ne, “Yesu cĩ Natharẽtĩ, Alaan cĩ Yudei.”
20 Ẽbẽl balna Yudei cĩk meelĩk thõõth coo, nyatarka õjõõn balna ngĩtĩ ododdinie Yesu wo, kĩ Yeruthalẽm, ĩthõng eheeddi balna thõõth coo, Aramayyiey, Latinneyyiey kĩ Girihiyyiey.
21 Ma natẽ, ivitia othooththik makayyiowa cĩk paadĩrnyawu Pĩlatõ ethei ne, “Nyĩ eheedi niia thõõth coo athĩ ne, ‘Alaan cĩ Yudei.’ Anyĩk kẽtẽhẽdẽ kĩĩ ne, ‘Athĩ balna nẽ ne, keeni Alaan cĩ Yudei.’ ”
22 Ẽdẽcĩ Pĩlatõ ĩnõõgõ ethei ne, “Gii cĩ kẽtẽhẽẽda na, anycĩk thẽk kaavu kĩ cĩ kẽtẽhẽẽda nana!”
23 Ma balna ngĩ otoddoyyiek nyĩcẽkẽrĩ Yesu kurucea, ivitia engerit nẽẽgẽ ceremua cĩgĩnĩk goolliok wec, ĩthõng engerit nẽẽgẽ vẽlẽk codoi codoi, ĩthõng ivitia ootti cẽrẽm cĩnnĩ cobbi cĩ abungi nẽ ẽlẽ, ĩthõng balna athii cẽrẽm neccie cĩ ayak goolliok cĩk engerini.
24 Ngaatĩ athĩnnĩ nẽẽgẽ ne, “Athii cĩ kẽrrẽc cẽrẽm coo, ĩthõng kengeryiek eleeti. Kĩmĩcĩt lirlir, kĩĩ katĩ kũrũbta et cĩ õkõyyĩ cẽrẽm coo.”
Adĩmanni balna thõõth neccie, kĩĩ katĩ kikiyyia thõõth cĩ eheeddi Nyaragawa ĩcĩ Nyekuco ẽẽ, kĩĩ dĩdĩ, wũ balna athĩ ne,
“Engeryiek nẽẽgẽ eleeti ceremua cĩganĩk,
ĩthõng ĩmmĩcĩt lirlir, nyatarka cẽrẽm cannĩ.”e
Ĩthõng thõõth thĩ cĩ balna adĩman nyĩcẽkẽrĩ coo.
25 Abĩlĩ balna yaatĩ Yesu õjõõn kĩ kuruce, abĩlĩ kĩ ngõõnĩ yaatĩnnĩ, kĩ Maria ngaa cĩ Kilopathĩ, ĩthõng kĩ Maria Madalẽna buu.
26 Ma balna ngĩ acĩn Yesu yaatĩnnĩ ngĩ abĩlnõy kĩ wobjiait wũ balna amĩnan nẽ wo,f ikiyyia othoothĩk yaatĩnnĩ cĩnnĩ ethek ne, “Yaang ngeruni cunni coo.”
27 Ĩthõng uduwak wobjiait buu ethek ne, “Yaaya cunni coo.” Ĩthõng balna thẽk kõr nĩcẽ, ikiyyia ũũwĩ wobjiaiti neccie yaatĩ Yesu ĩcĩ kõrõõk cĩnnĩ.
Gõõl cĩ adaaknĩ Yesu
(Bẽl Matewo 27:45-56; Marĩkõ 15:33-41; Luka 23:44-49)
28 Aga balna Yesu ẽdẽcak nẽ tiic vẽlẽk, kĩĩ katĩ kikiyyia thõõth cĩ eheeddi Nyaragawa ĩcĩ Nyekuco kĩĩ dĩdĩ, ikiyyia õthõõth nẽ ĩĩ ne, “Arukca kõrra!”
29 Aavĩ balna mertia cĩ vĩnõwo cĩ aakaatĩ boola loota natẽ, ma natẽ, ĩdĩmta eeta neekie kaviyioit ĩmma, ĩthõng okolliek mẽrta nĩcẽ, ĩthõng itiontĩk kẽẽta, kĩĩ kĩkõõthĩhĩ kũtũk cĩ Yesu.
30 Ma balna ngĩ ũwũd Yesu mẽrtẽ nĩcẽ, ikiyyia õthõõth nẽ ĩĩ ne, “Edeciay!” Ngaatĩ agiinyi õõ cĩnnĩ, ĩthõng ẽlẽmaaĩ ririwac cĩnnĩ, ĩthõng adaaha.
31 Ẽẽn balna kõr neccie kõr cĩ adĩmanẽcĩ Yudei Kõr cobbi cĩ Yuwuthono. Athii balna makayyiowa cĩk Yudei cĩ adiim Yesu kĩ eet cĩk ẽẽn ramma õdõddĩ kurucea ẽẽ, kaavuttia natẽ kuumuc kõdõlanek Kõr cĩ Yuwuthono. Ĩnõõnõ thĩ cĩ ajini nẽẽgẽ Pĩlatõ kẽlẽmaĩ nyĩcẽkẽr kõõt kudulitõ thoog cĩk eet cĩk õdõddĩ ẽẽ, ĩthõng aryiak eleeti looc.
32 Ma natẽ, ivitia nyĩcẽkẽrĩ uduulitõ thoo cĩk eet cĩk ẽẽn ramma ododdi kĩ Yesu ẽẽ.
33 Ĩthõng thĩ, ma balna ngĩ avvu nẽẽgẽ õvvõ cĩ Yesu wo, ũrũbtothĩk ĩnõõnõ adaaha, ĩthõng ĩthĩnga aduul thoo cĩgĩnĩk.
34 Ma natẽ, ucuwan nyĩcẽkẽrowocĩ ĩmma onyit cĩ kabanyit cĩ Yesu dĩlawa, ĩthõng iriktia biyyieta kĩ maam nĩĩco noko.
35 Aduwa eeti wũ balna acĩn thõõth coo, athĩ ne, ẽẽn thõõth dĩdĩ, ĩthõng aga nẽ athĩ ne, kaduwa thõõth cĩ ẽẽn dĩdĩ, kĩĩ katĩ ivitia woccia elemit niigia buu.
36 Aticanni thõõth coo balna ketee, kĩĩ katĩ kikiyyia kĩĩ thõõth cĩ eheeddi Nyaragawa ĩcĩ Nyekuco dĩdĩ, cĩ athĩ ne, “Kothii katĩ ammẽn cĩ aduuli ẽla cĩnnĩ.”h
37 Ĩthõng eheeddi Nyaragawa ĩcĩ Nyekuco naboo athĩ ne, “Acĩn katĩ eeta et wũ balna acuwan nẽẽgẽ ẽẽ.”i
Adawẽ Yesu
(Bẽl Matewo 27:57-61; Marĩkõ 15:42-47; Luka 23:50-56)
38 Ma vurtia cĩnnĩ, ikiyyia Yothẽbõ cĩ balna aku kõrõõk cĩ gaalawu cĩ Arimathea, cĩ balna athii cĩ ẽyẽla ẽlẽ cĩnnĩ ngatĩ ẽnnẽ wobjiait cĩ Yesu, nyatarka balna ongollie nẽ makayyiok cĩk Yudei. Ijin nẽ Pĩlatõ kaanyĩk ĩnõõnõ ẽlẽ cĩ Yesu kũũk kada. Ma balna ngĩ ẽlẽmaaĩ Pĩlatõ ĩnõõnõ wo, ikiyyia ũũwĩ nẽ ẽlẽ cĩ Yesu.
39 Ĩthõng thĩ, balna iriowa nẽ kĩ Nikodemoth buu, et cĩ balna aku acĩn Yesu baal. Ayaha balna Nikodemothĩ ngooroc cobbi cĩ ẽẽn dĩngdĩngõnĩ etĩmma kõmmõtõ kĩ tur cĩ avuudi eeta et cĩ adaaĩ.
40 Ivitia ootti nẽẽgẽ ẽlẽ cĩ Yesu, ĩthõng uvuudito ẽlẽ cĩnnĩ ngooroca nĩĩcẽ, ĩthõng ũmũrmũranit cẽrẽma cĩ wuuni. Ẽẽn thõõth cĩ adĩmanni wo vowoth cĩ Yudei.
41 Õjõõn balna ngĩtĩ ododdinie Yesu kurucea wo kĩ mana ĩmma cĩ ayak ngilom cĩ nga kadawothĩk eeti ĩmma.
42 Nyatarka õjõõn balna ngilomĩ natẽ, ĩthõng kõr cĩ adĩmanẽccĩ eeta Kõr cĩ Yuwuthono jiatĩn nĩcẽ,j ivitia aryik nẽẽgẽ Yesu loowa ngiloma.k