Ijin Pĩlatõ Yesu
(Bẽl Matewo 27:1-2, 11-14; Luka 23:1-5; Yoanẽ 18:28-38)
15
Ma thĩ balna ngerenniet,
utukwuanit makayyiowa cĩk paadĩrnyawu kĩ eet cĩk obbitik kĩ limanniok cĩk Ngiran cĩ Mutha,
kĩ eet õõgĩ cĩk lokikak thõõth cĩnĩng.
Ngaatĩ thĩ balna ẽcẽbĩ Yesu, ĩthõng eyektothĩk Pĩlatõ.
2 Ĩthõng ijin Pĩlatõ ĩnõõnõ ethek ne,
“Eeni niia alaan cĩ Yudei?”
Ẽdẽcĩ Yesu ethei ne,
“Kĩcĩ aduwa niia wo.”
3 Ayak thĩ balna makayyiowa cĩk paadĩrnyawu thoothonniok cĩk meelĩk cĩk õvõlõngĩ nẽẽgẽ Yesu.
4 Ijin thĩ naboo Pĩlatõ ĩnõõnõ ethek ne,
“Athii niia cĩ edeci thõõth coo kũdũt?
Thĩk nõõnõ thoothonniok cĩk meelĩk õrrõt cĩk abilni nẽẽgẽ aniitia wo!”
5 Ĩthõng thĩ,
athii balna Yesu cĩ ẽdẽcĩ, ngaatĩ atubuanini Pĩlatõ.
Ũtũbũr meelitini Yesu
(Bẽl Matewo 27:15-26; Luka 23:13-25; Yoanẽ 18:39-19:16)
6 Ayak balna gõõ Pĩlatõ vowoth cĩ õõganẽ nẽ et cĩ aavĩ kĩjana codoi dõ,
cĩ ẽbẽranĩ eeta et peyiana cĩ Ngothio.
7 Ĩthõng itin nĩcẽ,
aavĩ balna eeti ĩmma cĩ athĩ thar Barabath kĩjana cĩ ĩkõtha jore kĩ eet cĩk Rũma,
ĩthõng uruit eet õõgĩ jora nĩcẽ.
8 Ma thĩ balna mĩ aluttiay meelitini wo,
õõt nẽẽgẽ ijinit Pĩlatõ thõõth wũ gõõ õõganẽ nẽ et.
9 Ĩthõng ijin Pĩlatõ ĩnõõgõ ethek ne,
“Adiimnyu niigia kõõgawung alaan cĩ Yudei wo?”
10 Aga Pĩlatõ ngatĩ ayahacĩ makayyiowa cĩk paadĩrnyawu ĩnõõnõ Yesu,
nyatarka ayak nẽẽgẽ mẽdẽr kĩ ĩnõõnõ.
11 Ennei balna kẽnnẽ makayyiowa cĩk paadĩrnyawu meelitin ne,
ijinit Pĩlatõ kõõga Barabath.
12 Ĩthõng naboo ijin Pĩlatõ ĩnõõgõ ethek ne,
“Adiimnyu niigia aneeta kadaĩ thĩna et cĩ athinnu niigia ne, ẽẽn alaan cĩ Yudei wo nyia?”
13 Ẽgẽrẽny kẽnnẽ nẽẽgẽ athĩ ne,
“Toddowek ĩnõõnõ kurucea!”
14 Ẽdẽcĩ Pĩlatõ ĩnõõgõ ethei ne,
“Nyia da cĩ ẽgẽrẽthan nẽ?”
Ẽgẽrẽny kẽnnẽ nẽẽgẽ õrrõt athĩ ne,
“Toddowek ĩnõõnõ kurucea!”
15 Nyatarka balna adiim Pĩlatõ eet kebelbelit,
ngaatĩ thĩ balna õõgacẽ nẽ ĩnõõgõ Barabath.
Ĩthõng uduwak nyĩcẽkẽr cĩgĩnĩk kuukitõ Yesu,
ĩthõng aanyĩk ĩnõõgõ kõõt kotoddoyyiek ĩnõõnõ kurucea.
Atararyi nyĩcẽkẽrĩ Yesu
(Bẽl Matewo 27:27-30; Yoanẽ 19:2-3)
16 Ma balna thĩna natẽ ootti nyĩcẽkẽrĩ ĩnõõnõ õlõõtõtõ cĩ Pĩlatõ et wũ ẽẽn gaalinit cĩ Rũma,
ĩthõng utuvvuyyia nyĩcẽkẽr vẽlẽk kivitia natẽ.
17 Ivitia itihimtẽẽĩ nẽẽgẽ ĩnõõnõ cẽrẽm cĩ rẽgẽẽ,a
ĩthõng ẽtẽngẽnyca tĩĩ cĩ bĩlanu,b
ĩthõng aryihi õõwa cĩnnĩ.
18 Ngaatĩ ẽtẽrẽhanĩ ĩthaawĩ ĩnõõnõ ẽthẽcĩ ne,
“Kĩthawõy alaan cĩ Yudei!”
19 Ma natẽ,
uukitõ nẽẽgẽ õõ cĩnnĩ tẽlẽẽa,
ĩthõng uturyik amũta,
ĩthõng akattiek kuthungti võlõnga cĩ athĩnnĩ ne, ongollie ĩnõõnõ.
20 Ma balna ngĩ edeciak nẽẽgẽ ngatĩ amĩnyĩ ĩnõõnõ wo,
ivitia upuruccia cẽrẽm cĩ rẽgẽẽ wo,
ĩthõng upurucciẽĩ ĩnõõnõ ceremua cĩgĩnĩk.
Ĩthõng thĩ, ootti ĩnõõnõ otoddoyyiek kurucea.
21 Ma gõõla,
ivitia urumtõy kĩ et ĩmma cĩ athĩ Thimõnẽ cĩ aku õlõõ ĩcĩ gaalawu cĩ Cirene,
cĩ ẽẽn baatĩ Alẽkthanda kĩ Ruvuth.
Ĩthõng õkkõ Yeruthalẽma,
ĩthõng ĩtĩngantek nẽẽgẽ ĩnõõnõ kõdõng kuruce cĩ Yesu.
Otodowothĩk Yesu kurucea
(Bẽl Matewo 27:31-44; Luka 23:27-43; Yoanẽ 19:17-27)
22 Ootti nẽẽgẽ Yesu ngatĩ athĩ ne,
Gõlgõtha,
thõõth cĩ athĩ ne, “Ngĩtĩ ammẽn cĩ owu.”
23 Ma natẽ,
õõt aanycĩk nẽẽgẽ ĩnõõnõ mẽrtẽ cĩ õngõtanothi kẽgẽrnat,
kĩĩ katĩ athii cĩ athĩhĩ wuciith, ĩthõng balna abũrĩ Yesu.
24 Ngaatĩ õdõddĩcẽ nẽẽgẽ ĩnõõnõ kurucea,
ĩthõng engerit ceremua cĩgĩnĩk gõõla cĩ balna amĩnyĩ lirlir, kẽyẽla ngẽnẽ cĩ woccia õkõyyĩ cẽrẽm cĩ adiim nẽnẽ.
25 Õdõddõ balna nẽẽgẽ ĩnõõnõ kurucea itina ĩcĩ ẽẽn tõrkõwẽc cĩ ngerethetino.
26 Ĩthõng balna eheeddi thõõth wũ balna ẽtẽdĩcẽ Pĩlatõ ĩnõõnõ daaĩth kurucea tiddina athĩ ne,
“Alaan cĩ Yudei.”
27 Ododdi balna nẽẽgẽ goryiak ramma kelebethiõy kĩ Yesu,
ododdi ĩmma attia ĩcĩ athio, ĩthõng otodowothĩk ĩmma attia cĩ angettio.
28 Ĩthõng ikiyyia thõõth wũ balna eheeddi Nyaragawa ĩcĩ Nyekuco ĩthĩ dĩdĩ,
wũ balna athĩ ne,
“Arumothi nẽ kĩ gẽrẽthanniok.”c
29 Adaac balna eeta cĩk õwõ natẽ Yesu a ne,
“Jĩĩ!
Ma kĩĩ balna athĩ niia ne,
athaani woccia niia Ciith cĩ Nyekuco, ĩthõng etengenyu wathinniowẽy ĩcĩk ẽẽn iyyio,d
30 ẽẽla thĩ da ẽlẽ cunni, ĩthõng ulucciay kurucea loota!”
31 Gõõla cĩ odoi dõ noko arannĩ balna makayyiowa cĩk paadĩrnyawu kĩ limanniok cĩk Ngiran cĩ Mutha Yesu ethei ne,
“Cĩ gõõ ẽẽla nẽ eet õõgĩ, ĩthõng thĩ, yoko athii cĩ ẽẽla ẽlẽ cĩnnĩ.
32 Ma ngĩ ẽẽn nẽ Kiristo Alaan cĩ Ĩthraĩlĩ,
aluciay koccia loota kurucea,
kĩcĩnta naaga,
ĩthõng kẽlẽmta ĩnõõnõ!” Ĩthõng adaaccitõ goryiaha wũk balna ẽẽn ramma wũk õdõddĩ kĩ ĩnõõnõ kõdõwẽ buu ĩnõõnõ.
Daaĩth cĩ Yesu
(Bẽl Matewo 27:45-56; Luka 23:44-49; Yoanẽ 19:28-30)
33 Ma balna mĩ aavu kõr tiddina,
ikiyyia ĩthĩ lõõcĩ muwur kuumuc kĩĩ itini iyyio cĩ yiomono.
34 Ma baa ngĩĩ itini iyyio,
ikiyyia utulu Yesu moloowa cobbi õrrõt ĩthĩ ne,
“Eloi,
Eloi,
lama thabaththani?”
Thõõth cĩ athĩ ne,
“Nyekuc cannĩ,
Nyekuc cannĩ,
nyia tũngẽẽa wo?”e
35 Ngaatĩ athĩknĩ eeta gwuak cĩk balna abĩlĩ natẽ,
ĩthõng ĩĩtõ ne,
“Ĩthĩrarit nõõnõ, avvũ nẽ Elija.”
36 Ma natẽ,
ivir eeti ĩmma ũũk ĩdĩma cẽrẽm ecebek kẽẽt,
ĩthõng okolek mẽrta cĩ aakaatĩ,
ngaatĩ ĩkõthĩcẽ kũtũk cĩ Yesu,
ĩthõng ĩthĩ nẽ ne,
“Kereyyiõy da kĩcĩnĩt katĩ mĩ aku ara Elija ĩnõõnõ kurucea!”
37 Utulu balna Yesu õrrõt,
ngaatĩ adaaknĩ.
38 Ma natẽ,
apaaẽ baa cẽrẽm cĩ ẽngẽr Ciith cĩ Nyekuco ẽẽ, kõrgẽnaf kĩĩ ramma, tiddina kĩ loota.
39 Ma balna mĩ acĩn gaalinti cĩ nyĩcẽkẽrug cĩ balna abĩlĩ joonui kurucea natẽ gõõl cĩ adaaknĩ Yesu wo,
ikiyyia õthõõth ĩthĩ ne,
“Ẽẽn eeti coo Ngẽrtĩ Nyekuco dĩdĩ!”
40 Ĩthõng balna aatĩ ngaay gwuak cĩk ẽdẽnya ĩnõõnõ rẽẽna.
Kõrgẽna cĩnĩng,
aatĩ balna Maria Madalẽna kĩ Maria yaatĩ Jemithi wũ dĩcĩ kĩ Yothẽth.
Aavĩ balna ngaa cĩ athĩ Thaloome buu natẽ.
41 Balna ngaanĩ aavĩ Yesu Galilea õwõb balna nẽẽgẽ ĩnõõnõ,
ĩthõng eelia ĩnõõnõ. Mẽẽlĩ balna ngaay gwuak buu cĩk iriok kĩ ĩnõõnõ õvvõ Yeruthalẽma.
Adawẽ Yesu
(Bẽl Matewo 27:57-61; Luka 23:50-56; Yoanẽ 19:38-42)
42 Ma balna ngĩ õbõwẽ ĩthĩ jiatĩn,
ĩdĩmantothĩk eeta kereyyia Kõr cĩ Yuwuthono cĩ lootha ẽẽ.h
43 Aavĩ balna eeti ĩmma cĩ athĩ Yothẽbõ cĩ kõrõõk cĩ gaalawu cĩ Arimathea,
ẽẽn balna nẽ et cĩ abulie meelitina cĩ eet cĩk obbitik cĩk lokikak.
Ĩthõng balna ẽẽn nẽ buu et cĩ ereyyi adiim ngĩ acĩn kabicoc cĩ Nyekuco. Ngaatĩ õkõyyĩ nẽ muothĩta ĩcĩ Pĩlatõ kijina ẽlẽ cĩ Yesu.
44 Ĩthõng ukulek balna Pĩlatõ jien ngatĩ athĩknĩ daaĩth cĩ Yesu,
ĩthõng ũtũvvũwa gaalinit cĩ nyĩcẽkẽru kikiyyia kijin katĩ mĩ adaak Yesu.
45 Ma balna vurtia cĩ uduwak gaalinti cĩ nyĩcẽkẽru ĩnõõnõ daaĩth cĩ Yesu vẽlẽk,
ikiyyia ẽlẽmaaĩ Pĩlatõ Yothẽbõ ẽlẽ cĩnnĩ.
46 Ngaatĩ õkkõ ũũtanẽ Yothẽbõ cẽrẽm,
ĩthõng ara ĩnõõnõ kurucea, ĩthõng ũmũrmũranek cẽrẽm kĩĩ kaarĩk loowai cĩ balna adawuay bĩĩya. Ĩthõng ũnyũk katũk cĩ loowu bĩĩya cobbi.
47 Acĩn balna Maria Madalẽna kĩ Maria yaatĩ Yothẽth thoothonniok nĩĩkẽ,
ĩthõng acĩn ngĩtĩ adawini ẽlẽ cĩ Yesu.